Ambasadorja Yuri Kim ka reaguar pas mbledhjes së Këshillit Kombëtar të Integrimit Europian ditën e sotme (23 shtator).

Si mbështetëse e procesit të reformës në drejtësi, Kim shkruan në Tëitter se implementimi i kësaj reforme është shumë i rëndësishëm për të ardhmen e Shqipërisë.

Ajo thotë se nuk duhet ndalur përpara atyre që nuk duan drejtësi.

"Implementimi hap pas hapi i reformës në drejtësi është shumë e rëndësishme për të ardhmen e Shqipërisë. Duhet që t'i evitojmë pengesat, të kërkojmë zgjidhje praktike dhe të mos dorëzohemi përpara atyre që nuk duan drejtësi" - shkruan Kim.

Ndërkohë ministrja e drejtësisë Eilda Gjoni gjatë mbledhjes foli për çështjen e ngritur nga BE për fillimin e procedura për ndjekje penale të gjyqtarëve apo prokurorëve që janë shkarkuar nga vetingu.

Ajo tha se SPAK aktualisht ka në dorë një hetim të një sërë çështjesh të nivelit të lartë lidhur me ish-kryeprokurorë dhe ish-anëtarë të Gjykatës Kushtetuese. Gjithashtu ajo tha se dhe Byroja Kombëtare e Hetimit do të plotësohet me hetues brenda këtij viti.

“SPAK ka filluar procedim penal kundër 23 ish-magjistratëve, përfshirë këtu 9 çështje të gjyqtarëve dhe prokurorëve në nivel të lartë. Hetimet e pasurisë lidhur me këto raste janë ende në proces. Por padyshim do të jenë objekti kryesor i punës së SPAK ashtu sikurse dhe veprat penale në fushën e korrupsionit me qëllim që të krijohet databaza e të dhënave për subjektet që do të ndëshkohen lidhur me veprat penale të korrupsionit. Edhe BKH do të plotësohet brenda vitit me hetuesit, që do të jenë shumë të rëndësishëm për të ndjekur të gjitha dosjet e krimit të organizuar dhe korrupsionit”, u shpreh ministrja.