Një 35-vjeçar shqiptar u arrestua nga policia në Itali, pasi kishte fshehur 9 kilogramë kokainë në dyshemenë e makinës.

Ai u ndalua policia rrugore pranë Orvieto gjatë një kontrolli rutinë në autostradë, shkruajnë mediat italiane.

Dokumentet e drejtuesit dhe të automjetit rezultuan të rregullta, por sjellja e tij e tensionuar ngriti dyshime dhe nuk dha shpjegime bindëse.

Më pas ai pranoi se poshtë sediljes ndodhej një hapësirë e fshehtë.

Ndarja hapej përmes një sistemi të sofistikuar elektromekanik që aktivizohej nga një kombinim lëvizjesh në komandat e panelit të makinës. Brenda hapësirës sekrete u gjetën tetë pako kokainë.

Me urdhër të Prokurorisë së Terni, 35-vjeçari u dërgua në burg, ndërsa automjeti dhe lënda narkotike u sekuestruan.