Klosi në 'Repolitix' pranon dështimin me mbeturinat në lumenj: T'i vëmë gishtin kokës! Qytetarët të denoncojnë faturat e 'kripura' në bregdet!

Në lidhje me mbetjen urbane dhe 'bombat ekologjike' që Report Tv i ka denoncuar prej ditësh, ministri Klosi pranoi dështimin me menaxhimin e tyre duke thënë se fatkeqësisht nuk gjen forcën që kjo problematikë të menaxhohet ndryshe. Klosi tha se nëse personat përgjegjës nuk i vënë gishtin kokës, atëherë ta harrojnë turizmin.

"Nëse nuk ndryshon vendi i depozitimit të mbetjeve urbane në qytetet tona dhe të mos përdoren më shtratet e lumenjve dhe komunave ku ende e kanë lumin si vend të deponimit të mbetjeve.  Ende nuk po gjejmë forcën ta menaxhojmë ndryshe këtë problematike që nxit shumë debat me të drejtë. Mbetjet spitalore janë më të kontrolluara dhe kanë një tjetër mënyrë trajtimi, por për aq kohë sa vendet e grumbullimet e mbeturinave janë pranë lumenjve janë problem, pasi një shi bie dhe i çon në det. E kemi tashmë të përcaktuar në kodin penal që dëmtimi i pyjeve dhe vend depozitimi i mbetjeve në mënyrë të gabuar të dënohet me ligj", tha Klosi.

Ministri Klosi tha se dezinfektimi i plazheve është i nevojshëm dhe se do të bëhet brenda këtij muaji, për të shmangur të gjitha problematikat që lidhen me të.

"Dezinfektimi i plazhit duhet bërë dhe po e shohim me shumë vëmendje. Kurdo që të hapen plazhet, pjesa e dezinfektimit është e nevojshme dhe do të bëhet brenda këtij muaji", tha Klosi.

Ministri Klosi tha se është jashtë çdo logjike që të ketë rritje çmimesh në këtë periudhë. Ai ftoi qytetarët që nëse përballen me çmime të 'kripura' t'i denoncojnë menjëherë ato.

"Nuk gjykoj dot faturat që publikohen, janë kthyer të gjithë në gazetarë ku çdo celular është kthyer në redaksi lajmesh. Nuk mund të kemi rritje çmimesh në këto kushte, nuk është logjike. Për sa kohë sa do të kemi më pak njerëz do të kemi dhe ulje të çmimeve. Ftoj të gjithë qytetarët që të denoncojnë çmimet abuzive", tha Klosi.

Ministri Klosi tha se nuk dihet ende kur do të hapen plazhet dhe se në këtë periudhë është e rëndësishëm që të gjithë të respektojë masat që të mos kthehemi pas me pandeminë.

"Lungomare është pjesë e një strategjie të madhe turistike dhe ka pasur një punë shumë të madhe në kthimin e tyre në qendra turistike. Falë mundësisë së mirëmenaxhimit të pandemisë na ka bërë që sot të konkurrojmë me 'ujqërit' në turizëm si Greqinë, Kroacinë e Italinë falë dhe situatës që ndodhet vendi. Plazhi nuk është lejuar ende në asnjë vend të rajonit dhe ne nuk mund ta hapim. Po përpiqemi fort që të kemi një situatë të kontrolluar dhe jo të na kthehet kundër. Ju lutem të gjithëve të mos harrojnë që ndodhemi në gjendje të jashtëzakonshme dhe situatë pandemie ku duhet të ruhemi të gjithë. nuk mund të çedojmë në hapjen graduale. Operatorët kanë protokollet e plazhit në mënyrë që të përgatiten, por ende nuk është marrë një vendim për hapjen e tyre", tha Klosi.

Ministri Klosi tha se deri tani 130 mijë persona nga operatorët turistikë kanë marrë pagesën prej 40 mijë lekë nga paketa e dytë financiare.

"Paketa e dytë i dha mbështetje 100 % të gjithë hoteliereve me pagat e luftës dhe shumica e ka marrë. Paga e luftës prej 40 mijë lekë, deri para pak ditësh është marrë nga 130 mijë veta", tha Klosi.