Komandanti i KFOR-it, gjeneralmajor Grancesco, Paolo Figliuolo, zhvilloi një takim me të ngarkuarën me punë në Ambasadën e Finlandës, Anne Meskanen, të cilën e falënderoi për profesionalizmin e Forcave të Armatosura të Finlandës, për përkushtimin dhe mbështetjen ndaj misionit në Kosovë.

Gjatë kësaj vizite zyrtare, të parën mes tyre, u bisedua për situatën e përgjithshme të komuniteteve në Kosovë dhe rolin e rëndësishëm që luan KFOR-i në regjion, me theks në bashkëpunimin efektiv me Policinë e Kosovës dhe EULEX-it, në sigurimin e lëvizjes së lirë dhe ofrimin e një ambienti të sigurtë në Kosovë.

Sipas një komunikate të KFOR-it, Gjenerali Figliuolo falënderoi Meskanen për profesionalizmin e Forcave të Armatosura të Finlandës, për përkushtimin dhe mbështetjen ndaj misionit në Kosovë. Pjesëmarrja e tanishme e Finlandës në KFOR me staf dhe oficerë është në shtabin e përgjithshëm në Prishtinë dhe Ekipet Monitoruese të Ndërlidhjes në komunën e Drenasit.

Finlanda është po ashtu e vendosur të bashkëpunojë me autoritetet vendore në fushën e bujqësisë dhe pylltarisë. Në veçanti, Meskanen në tetor ka drejtuar inaugurimin e laboratorit të pylltarisë të themeluar në Pejë, mbështetur nga FAO e Finlandës. Qeveria Finlandeze do të mbështesë sektorin e pylltarisë për vitet 2015 dhe 2016./KosovaPress/