Kosovë, riatdhesohen mbetjet mortore nga Rashka-Serbia

PRISHTINË, 12 Shtator/ATSH-B.Jashari/.- Mbetjet mortore të 24 personave të zhvarrosur gjatë gërmimeve të fundit në Rashkë u riatdhesuan sot në Kosovë.
EULEX njofton se mbetjet mortore do të transportohen në selinë e DML-së në Prishtinë, ku do të bëhet identifikimi i tyre. Përveç punës së identifikimit, një numër i pjesëve të shkëputura duhet të ri-bashkohen me disa prej mbetjeve mortore. Në përfundim, mbetjet mortore do t'u dorëzohen familjeve me ndihmën e Komisionit të Kosovës për Persona të Zhdukur.
Ky ishte riatdhesimi i dytë i lehtësuar nga EULEX-i. Deri tani, në Kosovë janë riatdhesuar mbetjet mortore të 40 personave të gjetur në varrezën masive në Rudnicë (komuna e Rashkës në Serbi).
DML ka kryer gjithsej 456 operacione në terren gjatë të cilave familjeve u janë dorëzuar mbetjet mortore të 413 personave. 315 prej tyre kanë qenë në listën e personave të zhdukur, përfundon njoftimi.
Autoritetet kosovare kanë njoftuar se pas dorëzim-pranimit zyrtar të mbetjeve mortore të personave të identifikuar nga varreza masive në Rudnicë, lokalitet afër Rashkës në Serbi, sot pasdite, bëhen homazhe në nderim të viktimave të riatdhesuara.
Në Kosovë, këtë vit, Dita Ndërkombëtare për Personat e Zhdukur, 30 gushti, u shënua në qytetin e Drenasit, rajoni i Drenicës, për të nderuar personat nga kjo anë të identifikuar kohëve të fundit nga varreza masive në Rudnicë-Serbi, si dhe 1700 personat e tjerë të zhdukur mbetjet mortore të të cilëve nuk janë gjetur ende./m.m/