Kourtney Kardashian Barker ka ndarë me ndjekësit disa pamje nga festa e 3-vjetorit të djalit të saj Rocky, duke zbuluar një festë të këndshme plot ngjyra dhe detaje të veçanta, të organizuar në një atmosferë familjare.

Një ditë më parë, ylli i familjes Kardashian publikoi në Instagram Story një fotografi nga festa e vogëlushit. Në qendër të vëmendjes ishte torta e ditëlindjes, e zbukuruar me numrin 3 në ngjyrë ari dhe me figura dinosaurësh.

Rreth tortës ishin vendosur disa nga lodrat e preferuara të Rocky-t, mes tyre personazhe të njohur si Mickey Mouse, Kermit the Frog dhe figurat nga filmi Monsters, Inc.. Ajo që e bënte edhe më të veçantë dekorin ishte fakti se lodrat mbanin kapele festive me kuadrate jeshile, ndërsa sipër tyre qëndronin tullumbace shumëngjyrëshe.

Rocky është djali që Kourtney ka me bashkëshortin e saj, muzikantin Travis Barker. Përveç tij ajo është gjithashtu nënë e tre fëmijëve të tjerë nga marrëdhënia e mëparshme me Scott Disick: Mason, 16 vjeç, Penelope, 14 vjeçe dhe Reign, 11 vjeç.

Ndërkohë, familja Kardashian-Barker ka qenë në qendër të vëmendjes edhe për një moment gazmor në episodin e fundit të The Kardashians. Gjatë një udhëtimi në Palm Springs, Kourtney vendosi të nxirrte djalin e saj Rocky për të parë perëndimin e diellit.

Por ishte Reign ai që tërhoqi vëmendjen me një koment të papritur ndaj së ëmës. “Mami, çfarë po bën?”, e pyeti ai, ndërsa Kourtney iu përgjigj se po shijonte pamjen e bukur.

“Ti nuk e bën kurrë këtë. Po e bën vetëm për kamerat”, i tha Reign me humor, duke vënë në dukje praninë e kamerave të emisionit.

Kourtney u përpoq të justifikohej duke i thënë se kishte dalë jashtë dhe se ekipi i kamerave thjesht e kishte ndjekur. Përgjigjja e Reign ishte e shkurtër, por mjaft domethënëse: “Oh, dreqi!”.