Zv/ministri i Financave në Kosovë akuzon kryetarin e komunës Skënderaj për dhunë, Mehani : Policia të mbrojë familjen time! Reagon Kurti: Sulm qyqar me mendësi banditeske!

Zëvendëskryeministrja dhe ministrja në detyrë e Punëve të Jashtme, Donika Gërvalla, ka reaguar pas sulmit fizik ndaj zëvendësministrit të Financave, Hysni Mehani, që ndodhi në Skenderaj. Përmes një reagimi publik, Gërvalla e cilësoi incidentin si “sulm kriminal e banditesk”, duke thënë se akte të tilla janë sulm i drejtpërdrejtë ndaj institucioneve dhe funksionimit të shtetit.

“Ky akt, përveçse është i papranueshëm, përbën një sulm të drejtpërdrejtë ndaj institucioneve dhe funksionimit të shtetit të Kosovës, si dhe mbarëvajtjes së zgjedhjeve. Synojnë që fushata zgjedhore të jetë e përcjellë nga dhuna, frikësimi dhe logjika e forcës, të cilat nuk kanë vend në Republikën tonë”, deklaroi ajo.

Ajo shtoi se këto janë “metoda primitive” të atyre që, sipas saj, shtetin e shohin si pronë private dhe sundimin e ligjit si provokim. Në fund, Gërvalla kërkoi reagim të menjëhershëm nga organet e rendit dhe drejtësisë.

“Pres që institucionet e rendit të reagojnë menjëherë dhe pa kompromis. Autorët e sulmit duhet të përballen me drejtësinë pa asnjë vonesë. Kjo Republikë e ky shtet nuk i nënshtrohet dhunës. Pikë”, përfundoi ajo.

Ushtruesja e detyrës së presidentes së Kosovës, Albulena Haxhiu, e ka dënuar ashpër sulmin ndaj zëvendësministrit në detyrë të Financave, Hysni Mehani, duke kërkuar reagim të menjëhershëm nga organet e rendit dhe drejtësisë.

Në reagimin e saj, Haxhiu tha se dhuna fizike në jetën publike përbën “cenim të drejtpërdrejtë të sigurisë së qytetarëve, të lirisë së veprimit politik dhe të vetë kulturës demokratike”. Haxhiu theksoi se mandati publik nuk duhet të përdoret për arrogancë apo forcë ndaj kundërshtarëve politikë.

Ajo u bëri thirrje institucioneve përgjegjëse që të veprojnë pa hezitim ndaj çdo personi të përfshirë në incident.

“Ftoj organet e rendit dhe institucionet përgjegjëse që të veprojnë menjëherë, me profesionalizëm dhe pa asnjë hezitim, në mënyrë që çdo person i përfshirë të përballet me drejtësinë dhe të japë përgjegjësi para ligjit”, tha Haxhiu.

Në fund, ajo i uroi Mehanit shërim të shpejtë dhe apeloi për qetësi dhe besim në institucionet e shtetit.

Kryeministri i Kosovës, Albin Kurti, e ka dënuar sulmin ndaj zëvendësministrit në detyrë të Financave, Hysni Mehani, që ndodhi në Skenderaj. Në nisje të mbledhjes së Qeverisë, Kurti tha se incidenti është i papranueshëm dhe kërkoi reagim të menjëhershëm nga organet e rendit dhe drejtësisë.

“Sipas raportimeve, Hysni Mehani u sulmua me grushte dhe u godit në kokë me gotë teksa po pinte kafe me deputeten Arjeta Fejza dhe aktivistë të tjerë. Qeveria e Kosovës e dënon këtë sulm qyqar e të papranueshëm që shpërfaq mendësi banditeske”, deklaroi Kurti.

Ai shtoi se veprime të tilla nuk do ta ndalin Vetëvendosjen në garën politike dhe u bëri thirrje institucioneve që të ndërmarrin masa urgjente ndaj përgjegjësve.