Krimet e luftës, Demaçi: Dick Marty
mori para nga Serbia dhe shpifi

PRISHTINE - Për veprimtarin Adem Demaçi, formimi i gjykatës për ish-pjesëtarët e UÇK-së, është i papranueshëm dhe nuk do të jetë produktiv. Sipas tij, ndërkombëtarët e kanë parë të arsyeshme të fshehin krimet e Serbisë dhe kjo sipas tij është krim mbi krimet.

Ai thotë se bëmat e shqiptarëve po lihen mënjanë dhe po diskutohen siç thekson ai disa shpifje e trillime që të gjitha vijnë nga pala serbe.

“Unë mendoj që Evropa e ka gabim, fort gabim e ka që një popull i cili ka qenë i detyruar të luftojë për lirinë e vet, një popull i cili ndaj, të cilit janë bërë padrejtësi të mëdha, shtypje të mëdha, vrasje të mëdha masive, bombardime etj, ne nuk kemi shkuar në luftë prej qejfit, ne kemi shkuar në luftë sepse lufta nga Serbia dhe çetnikë, regjimi çetnik na është imponuar, kështu që të insistohet gjoja po kërkojmë fajtor njerëz që kanë shkelur rregullat e luftës nga ana e atyre që kanë luftuar për lirinë e vet, për lirinë e popullit, kurse, i kanë me qindra e qindra të dhëna e argumente që një gjyq i tillë do të duhej të formohej për palën serbe, për çetnikët e Serbisë dhe jo për ne, ka aq shumë krime të bëra nga çetnikët serb, saqë është e çuditshme se si bota këto krime i harron, merreni me mend ju edhe sot zbulohen vrasjet e tyre, dhe i kanë vra dhe e kanë parë të arsyeshme t’i fshehin krimet e tyre, kjo është krim mbi krimet dhe Evropa sillet në një mënyrë tolerante ndaj këtyre krimeve “, shprehet Demaçi.

Sipas tij, formimi i gjykatave të tilla nuk do të jetë produktiv dhe po krijon pakënaqësi të mëdha tek populli. Madje sipas tij, nuk është në favor të Evropës që të përkrahë një shtet si Serbia që ka bërë katër luftra.

“Për palën shqiptare që luftoi për lirinë e vet, që iu imponua lufta, e shohin të arsyeshme që duhet të formohen gjyqe me disa shpifje që i ka bërë Serbia dhe një farë zotri Dick Marty atje, i cili merr para nga Serbia dhe shpif, dhe parlamenti evropian i kalon ato kërkesat e tyre nëpër procedura dhe e turpëron edhe drejtësinë edhe demokracinë e Evropës të cilën ne e them shumë shpesh herë, e kemi nënën e madhe, ne presim prej tyre që të na mbrojnë, jo se duhet të na mbrojë, por sepse kemi të drejtë dhe të na kursejë nga këto farë gjykatash nga këso akuzash të shpifura nga ana e Serbisë”, tha ai.

Demaçi thotë se Dick Marty shërbehet vetëm nga të dhënat që vetë Serbia i shpif, e kështu po e krijojnë gjithë këtë gjendje. Sipas tij, Kosova nuk ka ditur të mbrohet edhe pse ishte në anën e drejtë dhe e bëri një luftë të tërë./KosovaPress/

TAG:
• Dick Marty