Kryetarja e Bashkisë së Shkodrës, Voltana Ademi thotë publikisht para ministrit të Brendshëm Sandër Lleshaj dhe drejtuesve të policisë, se ndihet e frikësuar nga bandat e krimit. "Sapo ka filluar" tha - ajo. "Nuk duhet t'i lëmë të hanë kokat e tyre. Të bashkëpunojmë për të parandaluar krimin". Ministri Lleshaj vlerëson komunikimin e sinqertë të kryetares së Bashkisë: "Krimi nuk është në ato nivele sa të shkaktojë frikë. Bashkë do i kthejmë dinjitetin Shkodrës".

***

Ka zgjedhur të flasë e zhveshur nga politika dhe ta theksojë fort këtë. Si qytetare e Shkodrës, si grua, si nënë, kryebashkiakja e Shkodrës Voltana Ademi, tha hapur dhe publikisht, se ndihet e kërcënuar nga krimi që vijon të godasë kryeqendrën e Veriut.  Foli në vetën e parë, duke thënë se ndihet e frikësuar, dhe se goditja e bandave të krimit, sapo ka filluar. Para ministrit të Brendshëm, Sandër Lleshaj, drejtuesit të policisë së Shkodrës të zgjedhur në detyrë pas atentatit të dyfishtë të së shtunës, prefektit të ri të Shkodrës dhe zyrtarëve të tjerë lokalë e të policisë, Voltana Ademi foli sinqerisht, kur tha se krimi ka marrë zemër për shkak se nuk është parandaluar. Ofroi bashkëpunimin e saj pa kushte, që bashkë me policinë, qytetarët dhe të gjitha strukturat e tjera, të luftojnë për të goditur krimin.

Një komunikim i sinqertë që mori edhe vlerësimin e ministrit të Brendshëm Sandër Lleshaj. Ai dha garancitë se me shtimin e mekanizmave në Policinë e Shkodrës, me staf edhe nga policia e Lezhës dhe Kukësit, situata do të ndryshojë. Kërkoi mbështetjen e qytetarëve dhe besimin se policia do të luftojë bandat kriminale. Mjafton edhe një mbështetje morale - tha Lleshaj - për t'i dhënë zemër, efektivëve.

Ministri u shpreh se krimi nuk është në ato nivele sa të shkaktojë frikë, por kryebashkiakja Ademi u shpreh se frika është e ndjeshme dhe se gjithçka "sapo ka filluar".

Sandër Lleshaj: Duhet të mobilizojmë gjithë shoqërinë për të luftuar krimin. Nuk ka asnjë hapësirë për të pasur frikë nga krimi. Ne do t'i fuqizojmë kapacitetet tona të policisë në Shkodër. Jo më kot kam ftuar edhe drejtuesit e Kukësit dhe Lezhës, do të mobilizojmë burime nga këto drejtori në Shkodër, që edhe në perceptim të ketë ndryshim. Nuk duhet të ndiejmë frikë. Nëse ndjen frikë kryetarja e Bashkisë, kemi një problem të madh.

Voltana Ademi: Fola në vet të parë, kur fillon tek unë...

Sandër Lleshaj: Ky qytet duhet të marrë dinjitetin e tij, ne jemi të angazhuar maksimalisht në këtë.

Në përfundim të takimit, kryebashkiakja e Shkodrës ju drejtua edhe drejtorit të Përgjithshëm të Policisë së Shtetit, Ardi Veliu, duke i folur për nevojën e bashkëpunimit të të gjithë aktorëve në këtë betejë të nisur, por kryepolici është larguar duke i lënë fjalën përgjysmë Ademit.

Voltana Ademi: Nuk është çështje e vullnetit të një personi, nuk është aspak politike. Nuk e bën edhe një polici vetëm në Shkodër, do duhet të ketë forca të specializuara, ne duhet të parandalonim ngjarjen. Në këto histori ka pasur edhe njerëz të pafajshëm që kanë hëngër plumb

Ardi Veliu: Para një jave nuk më the këtë opinion....(ikën)

Voltana Ademi: Ju s'mund të largoheni kështu, s'është korrekte me qenë kështu, nëse nuk e shqetëson qeverinë për mu s'ka problem

Diskutimet u bënë sot teksa ministri i Punëve të Brendshme Sandër Lleshaj,  prezantoi prefektin e ri të qytetit, Valdrin Pejtrin.

Debatet e PLOTA

Sandër Lleshaj: Nevoja për më shumë siguri e qytetarëve, është e domosdoshme.

Jemi të gjithë të informuar që niveli i sigurisë në qarkun e Shkodrës është sfiduar disa herë gjatë viteve të shkuara, kemi pasur goditje të forta dhe të rënda në drejtim të sigurisë publike që janë produkt i një krimi të organizuar dhe të pjekur ndër vite, i cili ka arritur të lëshojë rrënjë në qytetin e Shkodrës, i cili në fakt njihet për kryeqytetarinë e Shqipërisë. Ky qytet që i ka dhënë Shqipërisë pjesë të madhe të vlera për fat të keq është goditur nga krimi i akumuluar për disa dekada, me gjithë sukseset e mëdha goditjet e mëdha që janë dhënë ende mbetet sfidë e madhe.

Besoj që drejtori i ri i Policisë bashkë me stafin e tij aktual dhe me përforcimet e reja që do të marrë pa asnjë kursim dhe pa asnjë hezitim nga ministria e Brendshme besoj do jetë në gjendje ta thellojë punën e bërë deri tani për të garantuar që siguria në qarkun e Shkodrës do të jetë në nivelin që meriton.

I bej thirrje qytetarëve të bëhen palë me policinë përballë krimit dhe përballë atyre që e cënojnë qetësinë dhe jetën normale të tyre. Shpresoj dhe besoj që prefekti iri, duke pasur bashkëpunimin e drejtuesve të njësive vendore, besoj do jetë një vlerë e shtuar në përpjekjen e qeverisë për ta përmirësuar jetën e qytetarëve të Shkodrës.  Ju lus që vetëm t'i mbështesni, se pak mbështetje, qoftë edhe morale është inkurajim i madh që këta njerëz ta ndjejnë veten në shtëpinë e tyre, të punojnë fort, dhe t'i japin qytetarëve siguri.

Voltana Ademi: Du me dal jashtë politikës se kjo është e rëndësishme. Cështjet që du me trajtu nuk lidhen me detyrat e koordinimit në nivel prefekture, por me një nivel përgjegjësie që duhet të kemi përkundrejt qytetit të Shkodrës. Situata në të cilën prefekti emërohet nuk është e mirë. Ngjarjet e fundit janë bërë problematike. Nuk është vetëm Shkodra, është fatkeqësi për qytetin tonë, sidomos tani në sezonin turistik. Shkodra, por jo vetëm Shkodra, është edhe Vlora, Elbasani Durrësi, por fatkeqësisht Shkodra promovohet si qyteti ku ndodhin vrasje, grabitje, dhe kjo na shqetëson shumë.

Flas si grua, si nënë, si qytetare. Qytetarët e Shkodrës janë qytetarë shumë të mirë, e duan shumë qytetin e tyre dhe duan të jetojnë këtu. Ne kemi marrë përgjegjësi që duhet t'i çojmë deri në fund me seriozitetin që i takon.

Fakti që kemi disa vrasje, asnjë nuk është zbuluar deri më tani, nuk janë bërë veprime me parandalu, dhe ky është shqetësimi më i madh. Mos ti lëmë të hanë kokat e tyre, por duhet të bëjmë të mundur të parandalojmë me sa fuqi të kemi, policia duhet ta gjejë mënyrën, dhe ta bëjmë atë të mundur.

Me ndryshimin e drejtuesve, janë përball me problematika të mëdha. Edhe drejtori i ri që ka ardhur...policia nuk mund ta bëjë e vetme këtu në Shkodër, do duhet të përdoren mekanizma të specializuar. Nëse nuk ndërhyhet, vështirë se do të ndalen vet.

Unë bashkëpunoj  shumë mirë me forcat e policisë. Të gjithë ne duhet të bëjmë diçka që t'i themi stop, përtej partive politike. Frika është shumë e madhe, themi se janë banda kriminale, larje hesapesh...Shteti ka në dorë dhe duhet të marrë përgjegjësinë që ta parandalojë. Ndryshe krimi merr zemër, influencon në çdo instancë. "Janë kohë të këqija për njerëzit e ndershëm", tha dikush dje. Po na bëhet përditë edhe më e papranueshme, dhe është e frikshme për të gjithë qytetarët. Kur flas si qytetare në radhë të parë Fillon frika, dhe unë e ndjej, sado të fortë jemi  qytetarë, familjarë, dhe kemi përgjegjësi pastaj. Po flas me zemër, ofroj gjithë bashkëpunimin tim. Nuk kemi më forcë me besu, që nuk gjendet autori, që nuk parandalohet. Unë nuk dua ta besoj këtë, ne duhet të gjejmë një zgjidhje. Kjo është çështja numër 1 që duhet të trajtojmë në Shkodër. Kur fillon frika tek qytetari i Parë, mendo si përfundon tek qytetari i fundit.

Sandër Lleshaj: Ndjej që është komunikim i sinqertë ky dhe e vlerësoj. Përsa kohë ka frikë nuk ka siguri, dhe nuk ka rëndësi se si jemi me shifrat. DO të vazhdojmë me ndërhyrje të forta në Shkodër, rreth 20 % të vrasjeve në nivel kombëtar i prodhon vetëm Shkodra. Ky është një paradoks i papranueshëm. Me Shkidrën kam shumë lidhje personale, kur vij këtu nuk kam nevojë për hotel, të cilat më bëjnë trefish të angazhuar që të bëj maksimumin për këtë qytet. Duhet të bëhemi bashkë përballë krimit.

Krimi nuk është i atyre përmasave sa tna shkaktojë frikë. Nuk është aq i madh krimi sa t'na bëjë të kemi frikë

Voltana Ademi: E keni gabim, sapo ka filluar.

Sandër Lleshaj: Duhet të mobilizojmë gjithë shoqërinë për të luftuar krimin. Nuk ka asnjë hapësirë për të pasur frikë nga krimi. Ne do t'i fuqizojmë kapacitetet tona të policisë në Shkodër. Jo më kot kam ftuar edhe drejtuesit e Kukësit dhe Lezhës, do të mobilizojmë burime nga këto drejtori në Shkodër, që edhe në perceptim të ketë ndryshim. Nuk duhet të ndiejmë frikë. Nëse ndjen frikë kryetarja e Bashkisë, kemi një problem të madh.

Voltana Ademi: Fola në vet të parë, kur fillon tek unë...

Sandër Lleshaj: Ky qytet duhet të marrë dinjitetin e tij, ne jemi të angazhuar maksimalisht në këtë.

Voltana Ademi: Nuk është çështje e vullnetit të një personi, nuk është aspak politike. Nuk e bën edhe një polici vetëm në Shkodër, do duhet të ketë forca të specializuara, ne duhet të parandalonim ngjarjen. Në këto histori ka pasur edhe njerëz të pafajshëm që kanë hëngër plumb

Ardi Veliu: Para një jave nuk më the këtë opinion....(ikën)

Voltana Ademi: Ju s'mund të largoheni kështu, s'është korrekte me qenë kështu, nëse nuk e shqetëson qeverinë për mu s'ka problem

Është gjithë pushteti nën presion, unë deklaratat e mia i bëj publike gjithmonë...