Ku u depozitua rëra e ndotur
në bregdetin e Durrësit?

Vija bregdetare nga plazhi i Hekurudhës deri në sektorin Iliria e cila u mbulua nga vaji dhe hidrokarburet dy ditë më parë është pastruar e gjitha.


( Në foto bregdeti pas pastrimit)

Por mister mbetet vendi ku është depozituar rëra e mbledhur. Një ditë më parë, kryetari i Bashkisë së Durrësit Vangjush Dako, u shpreh se rëra e ndotur nga vajrat e djegura është dërguar në vendgrumbullimin e mbetjeve urbane në Porto-Romano në një vend të posaçëm ku hidhen këto lloj mbetjesh.

Por një ditë më pas në pikëgumbullimin e mbetjeve në Porto-Romano, përveç mbeturinave nuk gjendet asnjë gjurmë e rërës e cila supozohet se është depozituar aty. 
Megjithatë burime për “Shqiptarja.com” thonë se ndryshe nga mbetjet e tjera të cilat digjen, rëra e ndotur nuk është djegur me qëllim shmangien e një zjarri të mundshëm por është groposur dhe mbuluar.



Puna për pastrimin e rërës së ndotur dhe largimin e saj nga bregdeti mendohet se është bërë gjatë pasdites së të shtunës si dhe gjatë natës rreth orës 03.00 të mëngjesit së të dielës, ku 4 kamionë e kanë transportuar atë drej një vendi i cili mbetet ende mister. Burimet thonë se rëra është groposur, por ne nuk gjetëm asnjë gjurmë qoftë të saj, por edhe të gropave të freskëta të hapura.



Redaksia Online
(u.s/shqiptarja.com)