TIRANË - Edhe këtë të shtunë Adriatik Lapaj dhe mbështetësit e tij që janë pozicionuar para Kryeministrisë prej të hënës së 8 tetorit, duke kërkuar dorëheqjen e kryeministrit Edi Rama, janë përplasur me forcat e policisë.

Ka qenë një gjenerator i vendosur nga Lapaj për të prodhuar energji elektrike me qëllim ndezjen e ngrohëseve, shkaku që Policia e Shtetit dhe Policia Bashkiake zbarkuan para godinës qeveritare. Këta të fundit thonë se me anë të gjeneratorit, i cili ishte dhe i ndezur, është zaptuar hapësira publike.

U desh që Lapaj të mos ndihej mirë dhe të humbte ndjenjat që konfrontimi fizik mes protestuesve dhe policisë të shuhej. Kreu i partisë “Shqipëria Bëhet” paraqiti dokumentacionin, që sipas tij, është  depozituar pranë Policisë së Shtetit dhe Bashkisë, për protestat e përditshme dhe lidhjen e nevojshme me energjinë elektrike.

Pas përmirësimit shëndetësor, Lapaj u ngjit mbi gjeneratorin që policia kërkonte të largonte nga sheshi para kryeministrisë dhe kërkoi dorëheqjen e qeverisë.

Sipas kreut të “Shqipëria Bëhet” gjeneratori është sjellë nga Dritan Toci, i cili jeton në Londër, dhe u zotua se për sakrificën e këtij emigranti nuk do të lejojë sekuestrimin.