'Intelektualët po largohen'/ Rama, Metës: Propagandë e shëmtuar, përdor shifrat e para 6 viteve! Shqiptarët më 25 prill e shqelmojnë ndërmarrjen private LSI

Në mes të debatit mes presidentit Ilir Meta dhe kryeministrin Edi Rama, është futur edhe kryedemokrati Lulzim Basha. Ai e bëri Ramën përgjegjës kryesor për largimin e shqiptarëve nga vendit, duke thënë se ky është një nga dështimet kryesore të tij.

"Edhe sot Rama u përpoq të fajësojë të tjerët për dështimet e tij. Largimi masiv i shqiptarëve është një nga dështimet më të mëdha të Ramës. Shqipëria po humb një brez të tërë prej largimeve masive të 8 viteve të fundit. Rama duhet të largohet që vendi të shpëtojë nga kjo katastrofë", shkruan Basha.

Presidenti i republikës së Shqipërisë Ilir Meta, përmes një postimi në rrjetin e tij social Facebook ka shkruar se largimi i personave me aftësi të larta për punë dhe i intelektualëve nga Shqipëria, është një tjetër rekord i zi.

Ai në postim shkruan se me largimin e “ajkës” së shoqërisë, po largohen edhe qytetarët që kanë një standard të mirë jetese por për të cilët niveli i shërbimeve publike është i papranueshëm dhe janë të pashpresë.

“Referendumi i 25 prillit 2021 është vendimtar për të ardhmen e Shqipërisë, jo vetëm për 4 vite, por për dekadat që vijnë”, shtoi Meta, duke thënë se ajo është një mundësi për të rikthyer standardet cilësore të shërbimeve, respektin dhe dinjitetin njerëzor, për ta bërë Shqipërinë një vend të jetueshëm për të gjithë, me mundësi dhe shpresa të reja, veçanërisht për rininë.

Kreu i Partisë Demokratike, Lulzim Basha ka vijuar edhe këtë të martë më premtimet elektorale. Kësaj here fokusin e ka vënë te punësimi, ku akuzon kryeministri Edi Rama se nuk ka mbajtur një nga premtimet kryesore.

 Basha hedh akuza duke thënë se në vend të punësimit, Rama nuk ka bërë gjë tjetër veçse ka detyruar shqiptarët që të largohen nga vendi.

Nisur nga kjo, Basha premton se do të kthejë shpresën dhe se do të bëjnë ndryshimin në Shqipëri.

"Rama premtoi punësim për shqiptarët por sot numri i të larguarve nga Shqipëria është më i larti në Europë. Ne do të kthejmë shpresën për shqiptarët, ne do ta ndryshojmë Shqipërinë", shkruan Basha.