TIRANË - Edhe lideri i Partisë Demokratike Lulzim Basha shprehu mbështetjen ndaj studentëve të shoqëruar në polici pasi qëlluan me vezë kryeministrin Edi Rama.
 
Në një deklaratë për mediat në selinë blu, Basha tha se studentët janë keqtrajtuar pas demonstrimit që bënë, dhe shprehu njëherësh mbështetjen e PD-së ndaj kauzës së tyre.
 
“Dua të them që PD dhe unë kemi qenë dhe do jemi deri në fund në krah të studentëve dhe pedagogëve kundër ligjit korruptiv dhe primitiv të arsimit të lartë. Objektivat e studentëve dhe PD bashkohen në ligjin e Arsimit të Lartë”, - tha Basha.

Lideri i opozitës u kujdes të qartësojë se studentët që ndërmorën këtë veprim kundër kryeministrit Rama nuk kanë asnjë lidhje me Partinë Demokratik.
 
 “Ashtu si para 25 vitesh si Ramiz Alia, Rama po i akuzon se kjo është lëvizje e frymëzuar nga lëvizjet në Kosovë”, - tha Basha.

Në përfundim, lideri i opozitës i kërkoi autoriteteve të rendit që të respektojnë të drejtat e njeriut. 
 
“Thirrje autoriteteve të rendit dhe policisë të hapin sytë për çdo abuzim me integritetin e tyre fizik dhe psikologjik, respektoni të drejtat e njeriut. PD qëndron në mbështetje të studentëve, kundër ligjit klientelist të Arsimit të Lartë”, tha kryedemokrati Basha.

Mes studenteve te shoqeruar tre prej tyre jane nga "Levizja Studentore e Prishtines"
 
Z Basha, cili është komenti juaj për arrestimin e studentëve sot?
Informacioni që unë kam është që studentët Anita Lushi, Bora Mema, Klodi Hoxha, Viki Çipi, Liri Kuçi, Durim Jashari, Dardan Konjuca dhe Valton Marku, aktivistë të Lëvizjes Studentore për Universitetet janë arrestuar dhe keqtrajtuar pas një demonstrimi që kanë bërë në dalje të Edi Ramës nga seminari me biznesin e vogël. Së pari dua të them se Partia Demokratike dhe unë, kemi qenë jemi dhe do të jemi deri në fund në krah të studentëve, pedagogëve dhe prindërve kundër ligjit klientelist, korruptiv dhe primitiv për arsimin e lartë në Shqipëri. Së dyti dua të them që këta studentë nuk kanë asnjë lidhje politike me Partianë Demokratike. Ndërkohë që në këto momente që po flasim, pashë ashtu si para 25 vitesh, Ramiz Alia i akuzoi studentët si vegla të kosovarëve, edhe tani, Edi Rama dhe mediat e tij servile po i akuzojnë se, kjo është një lëvizje e frymëzuar nga parti politike në Kosovë. E vërteta sipas informacioneve që ka opozita është krejt tjetër. Kjo është një lëvizje kundër ligjit të klientelist e korruptiv për arsimin e lartë. Në mbështetje të universiteteve dhe këtu objektivat e studentëve dhe objektivat politike të Partisë Demokratike me të vërtetë bashkohen. Por ky është momenti por ti bërë një thirrje autoriteteve të rendit dhe të policisë që kanë qenë në kontakt me studentët, të hapin sytë për çdo abuzim me integritetin e tyre fizik apo psikologjik, me shkeljen e të drejtave të njeriut, do të përgjigjen një për një, nga punonjësi më i thjeshtë i policisë tek oficerët komandues. Hiqni duart nga studentët, bëni takimin sipas ligjit, respektojini të drejtat e tyre ligjore, kushtetuese, të drejtat e njeriut. Partia Demokratike qëndron pa ekuivok në mbështetje të studentëve, në kauzën e tyre të drejtë kundër ligjit klientelist dhe korruptiv për arsimin e lartë.

Redaksia Online
(Gre.M/Shqiptarja.com)