Tiranës i ka mbetur vetëm fanella, Partizani 'hakmerret' dhe e mposht 0-2 në derbi! Bardheblutë mbeten në fundin e renditjes

Derbi mes Tiranës dhe Partizanit zgjat më shumë se 90 minuta në fushë. Në prag të ndeshjes, një tifoz i vogël i Tiranës i vendosi në qafë shallin bardheblu gazetarit Ernest Koçi të Report TV. Djaloshi tha se sfida është shumë e rëndësishme, pasi një fitore kundër Partizanit do zbehte ecurinë katastrofike të Tiranës këtë sezon.

Sot në 18:00 në "Air Albania" luhet derbi mes Tiranës dhe Partizanit. Trajnerët Ardian Nuhiu i Tiranës dhe Oltion Kërnaja i Partizanit kanë publikuar formacionet. 

Të dy trajnerët janë “sajuar” mes mungesave të rëndësishme. Nuhiu ka bërë një revolucion te Tirana, duke e nisur derbin me Voglin e Taren në sulm nga minuta e parë, ashtu si edhe të sapoafruarin Ndong në mbrojtje.

Ndërsa te Partizani, Kërnaja i ka besuar Kotes një vend në rreshtimin titullar, teksa ka në stol në gjendje gatishmërie emra të rëndësishëm të të kuqve si Skuka, Bintsuka, Buxhelaj e Sembene.

Tirana: Tafas, Vera, Basilio Ndong, Dembele, Rafa Silva, Haxhiu, Valerianos, Tare, Vogli, Tabekou, Meta

Partizani: Qirko, Atanaskoski, Janjeva, Bytyçi, Ismaili, Isgandarli, Human, Kote, Toma, Marku, Doumbia

Të shoqëruar nga policia në një itinerar të caktuar për të shmangur çdo përplasje, tifozët e Partizanit dhuruan spektakël me flakadanë rrugës për në stadiumin "Air Albania", aty ku sot luhet derbi kundër Tiranës në Superligën e futbollit.

Raundi i 15-të në Superligën e futbollit shqiptar ka rezervuar derbin Tirana - Partizani, i cili merr jetë sot në 'Air Albania' duke nisur nga ora 18:00.

Dueli i sotëm do të jetë përballja e 210-të në historinë mes tyre, në të gjitha kompeticionet. Në bilancin e përgjithshëm, të kuqtë e Partizanit numërojnë 82 fitore, 65 barazime dhe 62 fitore janë për bardheblutë.

Kjo epërsi vjen kryesisht nga rezultatet e arritura në kampionat, në të cilin Partizani në 179 ndeshje ka arritur 73 fitore, 57 janë barazime, ndërsa 49 janë fitoret e Tiranës.

Në ndeshjet për Kupën e Shqipërisë, bilanci është më pozitiv për bardheblutë që në 29 ndeshje kanë fituar 13, barazuar 8 dhe 8 ndeshje janë fituar nga të kuqtë.

Gjithashtu të dyja klubet kanë luajtur edhe një ndeshje finale në Superkupën e Shqipërisë më 17 gushtin e 2004, të fituar nga Partizani me rezultatin 2-0.

Përballja e parë mes Tiranës dhe Partizanit është luajtur më 30 mars 1947. “Demat e Kuq” fitonin 8-0, duke sigluar edhe fitoren më të thellë deri më tani në derbi. 38 vite më vonë, më 22 shtator 1985, Tirana do kundërpërgjigjej duke e mundur 7-3.

Rezultati më i thellë i sezoneve të fundit është ai 28 shkurtit të vitit 2020, kur bardheblutë fitonin me shifrat 5-1. Më 1 mars 2008, kur të kuqtë drejtoheshin nga Hasan Lika, fitonin në “Qemal Stafa” me shifrat 4-1.

Dy ndeshjet e fundit janë fituar nga Tirana, të dyja me rezultatin e njëjtë 3-0.

Raundi i 15-të në Superligën e futbollit shqiptar ka rezervuar derbin Tirana - Partizani, i cili merr jetë sot në 'Air Albania' duke nisur nga ora 18:00. Forma e dy skuadrave nuk është ajo e një përballje kalibri si kjo, çka mund të ketë detyruar tifozët t'i qëndrojnë larg shkallëve të stadiumit.

Deri mesditën e kësaj të diele, nuk janë shitur më shumë se 3 mijë bileta për këtë sfidë, teksa kapaciteti i impiantit është më shumë se 22 mijë e 500 ulëse. Shqiptarët i lënë gjërat për në momentet e fundit, ndaj nuk përjashtohet mundësia që tifozët të kërkojnë bileta me të mbërritur në impiant.

Pas 14 ndeshjeve të luajtura, Tirana me vetëm 7 pikë mban vendin e fundit në renditje dhe fitoren e vetme të sezonit e ka pikërisht kundër Partizanit në derbin e fazës së parë.

Partizani nga ana tjetër me 17 pikë mban pozitën e gjashtë, me nëntë pikë më pak se kryesuesit e AF Elbasanit.