Llalla: Doshi dhe Frroku sajuan
se donin të ndiqej penalisht Meta

TIRANE - “Ndjekja e paligjshme penale ndaj kryetarit të Kuvendit Ilir Meta”. Është ky qëllimi që sipas kryeprokurorit Adrtiatik Llalla, kanë dashur të realizojnë dy deputetët Tom Doshi dhe Mark Frroku me sajimin e historisë së atentatit të urdhëruar gjashtë muaj më parë nga Meta për vrasjen e Doshit dhe demokratit Fufi.
 
Në shkresën zyrtare ku ka urdhëruar ndalimin e deputetëve të firmosur nga vetë ai, Llalla thotë se nga hetimet e kryera, provat e mbledhura dhe dëshmitë e marra, vërtetohet se atentati i pretenduar nga deputeti i përjashtuar nga Partia Socialiste është sajuar prej tij dhe Mark Frrokut duke përdorur të ndaluarin nga Fushë-Kruja Durim Bamin, për të implikuar kreun e Kuvendit Ilir Meta.
 


Dokumenti i firmosur nga Llalla të cilin A1 Report e siguron

Nga momenti kur Doshit bëri publike në fillim të marsit akuzat se Meta ka paguar 600 mijë euro për vrasjen e tij dhe të Fufit, (500 mijë euro për ekzekutimin e Doshit dhe 100 mijë euro për eliminimin fizik të demokratit mhill Fufi) politika u nda në dy kampe, ku opozita u radhit si besnike e versionit të Doshit duke kërkuar dorëheqjen e Metës nga Kuvendi, ndërsa mazhoranca ja la në dorë përfundimit të hetimeve.
 
Kur nuk ka kaluar as një muaj nga bërja publike e këtyre pretendimeve, Prokurori i Përgjithshëm Adriatik Llalla i jep një motiv inskenimit që sipas tij bënë deputetët Doshi dhe Frroku: Ndjekja e paligjshme penale e Metës.

Akuza deklaron se për provimin e inskenimit të atentatit janë kryer një sërë veprimesh hetimore, pyetje personash, sekuestrim tabulatesh telefonike, sekuestrim pamje filmike, përgjime dhe nga kryerja e këtyre veprimeve hetimore krijohen dyshime të bazuara në prova se ngjarja e pohuar nga Tom Doshi publikisht si dhe e deklaruar më pas në prokurori, ka qenë e sajuar prej tij, deputetit Mark Frroku dhe të dyshuarit Durim Bami me qëllim fillimin e paligjshëm të ndjekjes penale ndaj Ilir Metës.

Redaksia Online
(Gre.M/Shqiptarja.com)

TAG:
• durim bami