POP 5

Lajmet më të lexuara të 5 minutave të fundit

Opinion

Loja e shëmtuar europiane me vaksinat dhe ballkanasit e varfër

Nëse Brukseli dhe shtetet e tjera të pasura do të aplikojnë politika individualiste dhe peshën e më të fortit, përballë vlerave të solidaritetit me pjesën tjetër të kontinentit, atëherë është mirë që burokratët e E, apo ata gjermanë, francezë e britanikë të “rrudhin gojën” e të mos hedhin premtime boshe. Nëse Ballkani Perëndimor është vërtet rajoni që shumëkush në Bruksel na thotë se është, tregojeni!

Loja e shëmtuar europiane me vaksinat dhe ballkanasit e varfër

Lajmet e orëve të fundit konfirmojnë atë që shumëkush në lagjet e varfra të kontinentit evropian, kishte parashikuar me cinizëm dhe frikë: edhe vaksinat, ashtu siç ndodh me çdo aspekt tjetër të shëndetit publik, po rezultojnë të jenë një lojë të pasurish! Diçka e ngjashme me operacionet e shtrenjta të zemrës, tumoreve, apo bisturitë milionëshe të plastikës që heqin rrudhat dhe ulin vitet. Bashkimi Evropian premtoi se 27 dhjetori do të ishte dita evropiane e vaksinës dhe ashtu ndodhi: të pasurit e kontinentit mundën të vaksinohen. Qoftë edhe simbolikisht, me pak mijëra doza, por gjithsesi të mjaftueshme për të bërë lajm dhe për të ndezur shpresat e 440 milion banorëve të klubit të pasur evropian.

Pjesa tjetër, ato pak vende që kanë mbetur jashtë “zonës së gjelbër” ku gëlon solidariteti dhe ngrihen lart virtytet më fisnike të racës tonë, duhet edhe një herë të ngushëllohen me premtime, para të ofruara në letër dhe në minutën e fundit dhe…fjalë boshe që i merr era. Megjithëse në Bruksel e dinë se kjo emergjencë dimërore e Covid 19 ka krijuar një situatë të habitshme ku ka para por s’ka doza vaksine, mesazhet drejt Ballkanit Perëndimor, një grushti vendesh që kanë banorë sa një e treta e Italisë, janë plot entuziazëm dhe oferta financiare. Asnjë plan konkret i afërt për vaksina, asnjë solidaritet i konkretizuar me ndonjë gjest sado të vogël donacioni, megjithëse miliona doza të Pfizer po vërshojnë këto orë drejt vendeve të BE.

Pas 200 milion dozave të prenotuara prej kohësh, Bashkimi Evropian njoftoi se ka përfunduar marrëveshjen me Pfizer edhe për 100 milion doza të tjera. Një stok gjigand vaksinash, që do të shpërndahet nëpër shtete ku tashmë kanë nisur fushatat më ambicioze të vaksinimit publik që mbahen mend.

Bëni si them unë por mos bëni si bëj unë. Është lajm i orëve të fundit që Gjermania, megjithëse pjesë e BE, ka negociuar paralelisht me kompaninë Moderna për të blerë 50 milionë doza shtesë vaksine. Shtetet e pasura të Perëndimit po tregojnë gjithçka këto orë, përveç solidaritet me fqinjët, të varfrit dhe të vegjlit. Çfarë etike ka, fjala vjen, që një shtet si Kanadaja të porosisë vaksina sa për t’i vaksinuar pesë herë banorët e saj?!

Sezoni dimëror dhe kurba në ngritje e infektimeve kudo në hemisferën veriore, e bën urgjent vaksinimin në këtë moment. Jo më vonë! Është e pritshme që në pranverë prodhimi global i vaksinave do të bëjë të mundur që ato të gjenden shumë më lehtë se sot. Por është gjithashtu e vërtetë që në atë periudhë, me shumë gjasë, shumë vende do të kenë numra të tillë infektimesh, që do ta bëjnë shumë relative peshën e vaksinave. Do të na “vaksinojë” Covidi, jo shkenca!

Nëse Brukseli dhe shtetet e tjera të pasura do të aplikojnë politika individualiste dhe peshën e më të fortit, përballë vlerave të solidaritetit me pjesën tjetër të kontinentit, atëherë është mirë që burokratët e BE, apo ata gjermanë, francezë e britanikë të “rrudhin gojën” e të mos hedhin premtime boshe. Nëse Ballkani Perëndimor është vërtet rajoni që shumëkush në Bruksel na thotë se është, tregojeni! Ndryshe, na bëni një favor të vogël në këto kohë të zymta: na i kurseni fjalët e bukura! Ose pastaj, mos u acaroni nga miklimet dhe joshjet e rusëve apo kinezëve ndaj të tretëve, që po shëtisin nëpër botë me vaksinat e tyre në xhep!

Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Eri: 30/12/2020 06:57

    Cdo shtet mendon per veten e tij.Akoma me prralla ju.Ndertoni shtet dhe ekonomi te forte mos prisni lemosha budallenj te dreqit.

    Përgjigju
  • Desi: 29/12/2020 23:04

    Duket qe te tille shkrime behen ne nje kohe kur lekundet pozita e liderit pertac e te korruptuar. Greqia dhe Serbia kane siguruar vaksinat pasi kane punuar me kohe e me vakt. Shqiperia me te tille pertaci dhe mungese profesionalizmi ne qeveri, punet e jashtme dhe mjeksi ka bere dhe ben sehir. Nuk ka nevoje tia hedhim fajin te tjereve. Dhe nuk eshte pune financash. Mjafton te mos jepeshin koncensione pa hesap dhe ishin siguruar vaksinat. Nuk eshte kolektive por individuale pergjegjesia e cilitdo shtet ndaj popullit te tij. Palo gazetar.

    Përgjigju
  • Turi: 29/12/2020 21:01

    Kryeministri jone mos te tallet me oferten e Rusise por te shikoj interesat e popullit dhe ti lere paragjykimet se UE dhe SHBA nuk na konsiderojne si kane bere gjithmone keshtu qe zoti Rama leri dengklat dhe mer vaksinat

    Përgjigju
  • Bledar: 29/12/2020 20:52

    Ja te shohim kush do ta beje vaksinen i pari kur te vije ne Shqiperi o Minxhoz ti dhe soji e sorollopi jot qe e keni kapur kete vend nga gryka dhe po e milni mire apo nje punonjes fasonerie qe me zor ju shtron buke femijeve ne tavoline .Perpiqu ta imagjinosh dhe e kupton vete perse gjermanet e francezet e bejne vaksinen para shqiptareve.

    Përgjigju
    • Flutura: 30/12/2020 07:42

      Na mallengjeve

  • Bebe: 29/12/2020 20:45

    Shume sakte shkrimi po ka kohe qe i ka dale boja vlerave perendimore qe be fund mbeten fix bej si them une po jo si bej une

    Përgjigju
  • Sondazhi i ditës:

    Kë doni ju që të fitojë zgjedhjet në SHBA?

Lajme të tjera



×

Lajmi i fundit

Harris apo Trump? Kush do të donin shqiptarët të ishte presidenti i SHBA-së! Ja rezultati në sondazhin e Shqiptarja.com! Votoni dhe ju

Harris apo Trump? Kush do të donin shqiptarët të ishte presidenti i SHBA-së! Ja rezultati në sondazhin e Shqiptarja.com! Votoni dhe ju

5 Nëntor, 09:12