Ministri për Evropën dhe Punët e Jashtme, Ferit Hoxha, ka marrë pjesë në Luksemburg në takimin e mëngjesit me ministrat për Çështjet Evropiane të Bashkimit Evropian, zhvilluar në kuadër të Këshillit të Çështjeve të Përgjithshme, ku në fokus ishte bashkëpunimi në kuadër të nismës “Democracy Shield”.

Në një postim në rrjetet sociale, Hoxha tha se shoqëritë demokratike po përballen me sfida gjithnjë e më të mëdha nga dezinformimi, manipulimi dhe ndërhyrjet e huaja në informacion, si edhe nga kërcënimet hibride.

“Ndërsa shoqëritë demokratike përballen me sfida në rritje nga dezinformimi, manipulimi dhe ndërhyrja e huaj në informacion, si edhe nga kërcënimet hibride, forcimi i qëndrueshmërisë sonë të përbashkët nuk ka qenë kurrë më i rëndësishëm”, shkroi ai.

Hoxha theksoi se Shqipëria mirëpret hapjen e mekanizmave kryesorë evropianë të rezistencës për vendet kandidate dhe e sheh këtë si pjesë të procesit të integrimit gradual në Bashkimin Evropian.

“Shqipëria mirëpret hapjen e mekanizmave kyç evropianë të rezistencës për vendet kandidate, gjithashtu si pjesë e integrimit gradual, dhe mbetet e angazhuar të punojë ngushtë me partnerët tanë evropianë për të mbrojtur institucionet demokratike, besimin publik dhe integritetin e hapësirës sonë të informacionit”, u shpreh ministri.

Ai nënvizoi gjithashtu rolin e medias, qytetarëve dhe institucioneve në mbrojtjen e demokracisë.

“Në botën e sotme, faktet mbeten vija e parë e mbrojtjes së demokracisë. Një shoqëri e shëndetshme ka nevojë për qytetarë të informuar, media të lira, të pavarura dhe etike, një shoqëri civile pjesëmarrëse dhe besim publik te institucionet demokratike”, shkroi Hoxha.

Sipas tij, pa qytetarë dhe pa një shoqëri të pajisur për të njohur dhe për t’i rezistuar manipulimit dhe ndërhyrjeve keqdashëse që përhapen në rrjetet sociale, rrezikohet besimi publik dhe vetë kohezioni shoqëror.

“Pa qytetarët dhe të gjithë shoqërinë të pajisur dhe të fuqizuar siç duhet për të njohur dhe për t’i rezistuar manipulimit dhe ndërhyrjeve keqdashëse, të shpërndara me kujdes në botën e rrjeteve sociale, rreziqet mund të gërryejnë besimin publik dhe të shkatërrojnë strukturën shoqërore. Mbrojtja e demokracisë është një përgjegjësi e përbashkët”, deklaroi ai.