Lufta/ Vritet një ushtar i huaj në Ukrainë! Kievi: Rusia po bombardon zonat e populluara në rajonin e Zaporizhzhia

Një djalë 27-vjeçar nga Varese në Itali, Benjamin Giorgio Galli, vullnetar në Ukrainë, është vrarë nga forcat ruse. Lajmin e ka konfirmuar babai i tij Gabriel Galli, duke ia komunikuar disa të njohurve të djalit.

I riu kishte nënshtetësi holandeze, ku ishte zhvendosur me familjen vitet e fundit. Galli kishte shkuar në Ukrainë nga Holanda nëpërmjet Polonisë dhe ishte bashkuar me Legjionin e Parë Ndërkombëtar të Mbrojtjes të Ukrainës. Ai dyshohet se u vra në zonën e Kharkiv.

Ushtria ruse bombardoi zonat e populluara të rajonit të Zaporizhzhia duke vrarë një civil, tha administrata ushtarake rajonale e cituar nga Ukrinform.

‘Në 24 orët e fundit janë regjistruar bombardime në Orikhiv, Chervona Krynytsia, Huliaipole, Novoselivka, Uspenivka, Dobropillia, Rivnopillia, Prymorskyi. Gjatë bombardimeve, pushtuesit rusë kanë plagosur civilë. Një person ka vdekur nga plagët e marra’, thuhet në një shënim.

Bombardimi shkaktoi gjithashtu dëme në një ndërtesë dhe në sistemin e ftohjes së termocentralit bërthamor, sipas shërbimit për shtyp të administratës së qytetit.

“Një godinë e posaçme, sistemi i ftohjes dhe një mensë, ku ishin të pranishëm punonjësit e termocentralit në fillim të sulmit, janë dëmtuar”, njoftuan mediat.

Ukraina ka rimarrë një fshat afër qytetit lindor të Lysychansk, në një fitore të vogël por simbolike që do të thotë se Rusia nuk ka më kontroll të plotë të rajonit të Luhanskut, një nga qëllimet kryesore të luftës së Vladimir Putinit. Guvernatori i Luhanskut, Serhiy Haidai, tha se forcat e armatosura të Ukrainës kishin në "kontroll të plotë" të Bilohorivka.

“Është një periferi e Lysychansk. Së shpejti do t'i përzëmë me fshesë këta plehrat. Hap pas hapi, centimetër pas centimetri, ne do të çlirojmë gjithë tokën tonë nga pushtuesit”, tha ai.

Videoja e shpërndarë në Telegram tregonte ushtarët ukrainas duke patrulluar në këmbë në një rrugë të rrënuar. Forcat ruse kishin pushtuar të gjithë provincën Luhansk për dy muaj e gjysmë të fundit. Pas një beteje të gjatë dhe të ashpër, Shtabi i Përgjithshëm i Ukrainës vendosi të tërhiqej në korrik nga qytetet Sievierdonetsk dhe Lysychansk.

Gjatë 12 ditëve të fundit, regjimentet ukrainase në veri-lindje kanë ngritur një kundërofensivë të suksesshme , duke çliruar më shumë se 300 vendbanime në të gjithë rajonin e Kharkiv dhe duke detyruar njësitë ruse të ikin në rrëmujë. Zona e rikuperuar është gjysma e madhësisë së Uellsit dhe shkon deri në kufirin rus. Kishte raporte të pakonfirmuara të hënën për avancimin e trupave ukrainase në Lysychansk. Dhe tashmë duket pak se ka pak shanse që Kremlini të jetë në gjendje të marrë kontrollin e të gjithë Donbasit, i cili përfshin rajonet Donetsk dhe Luhansk.

Në mars, Putin tha se ky ishte qëllimi i "operacionit të tij special ushtarak" në Ukrainë, pas përpjekjes së tij të dështuar për të pushtuar kryeqytetin, Kiev.

Gjatë fundjavës, trupat ruse bombarduan qytetin e Kupiansk nga pozicionet e reja mbrojtëse të ndërtuara me nxitim në lindje të lumit Oskil. Qindra njerëz u evakuuan. Ukraina tha se mori kontrollin e të gjithë qytetit të premten, duke kaluar me automjete amfibe mbi një urë ponton në bregun e majtë të lumit. Zyrtarët ukrainas thonë se 200 ushtarë rusë vdiqën në një sulm të dielën kur një raketë goditi një ish-strehë autobusi ku ata ishin vendosur, në qytetin e vijës së parë të Svatove.

Sipas Institutit për Studimin e Luftës, Rusia nuk ka arritur të dërgojë përforcime. Tani është nën presion dhe është e ndjeshme ndaj një kundërsulmi të mëtejshëm.

Kryeministrja britanike, Liz Truss, ka thënë se Mbretëria e Bashkuar do të ndajë të paktën 2.6 miliardë dollarë, si ndihmë ushtarake për Ukrainën, në vitin e ardhshëm.

Rusia ka nisur luftën në Ukrainë në fund të muajit shkurt. Perëndimi ka ndarë miliarda dollarë për të forcuar ushtrinë ukrainase me sisteme moderne të armëve. Mbështetja ushtarake e Britanisë për Ukrainën pritet të përfshijë pajisje sikurse lançuese të shumëfishta të raketave, ka thënë zyra e kryeministres përmes një deklarate.

“Fitoret e Ukrainës në javët e fundit kanë qenë inspiruese”, është thënë në deklaratë.

“Mesazhi im për popullin ukrainas është që Mbretëria e Bashkuar do të vazhdojë të jetë mbrapa jush në secilin hap. Siguria juaj është siguria jonë”.

Ushtria ukrainase ka nisur një kundërofensivë në fillim të muajit shtator, për të rikthyer kontrollin në territoret e pushtuara nga forcat ruse, prej nisjes së luftës në fund të muajit shkurt. Ushtria ukrainase pretendon se ka fituar kontrollin e mbi 8.000 kilometrave katrorë në rajonin e Harkivit, prej nisjes së kundërofensivës.

Ushtria ruse ka thënë se trupat e saj janë tërhequr nga Harkivi për t’u rigrupuar.

Megjithatë, ekspertët besojnë se Rusia ka përdorur arsyetim të njëjtë edhe kur ka dështuar që të fitojë kontrollin e Kievit, disa javë pas nisjes së luftës, dhe për pasojë është tërhequr nga ai rajon. Presidenti rus, Vladimir Putin, ka urdhëruar pushtimin e Ukrainës më 24 shkurt.

Ai e quan luftën si “operacion special ushtarak” për të çmilitarizuar Ukrainën. Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre. /REL

Presidenti turk Rexhep Tajip Erdogan, në një intervistë për televizionet amerikane deklaroi se tokat e pushtuara nga Rusia duhet t'i kthehen Ukrainës, përfshirë Krimenë.

"Nëse vendoset paqja në Ukrainë, padyshim që kthimi i tokave që janë pushtuar do të bëhet shumë i rëndësishëm. Putini ka ndërmarrë disa hapa. Ne kemi ndërmarrë disa hapa. Tokat e pushtuara do t'i kthehen Ukrainës.  Ne kemi folur për këtë me mikun tim të dashur Putin që nga viti 2014 dhe kjo është ajo që ne i kërkuam atij… për fat të keq nuk është bërë asnjë përparim. Gjithçka që duam të bëjmë dhe duam të shohim është ta përfundojmë këtë betejë me paqe, qoftë Putin, qoftë Zelensky, unë gjithmonë e kam kërkuar dhe rekomanduar këtë. Ky është një konflikt që përfundoi me viktima.  Njerëzit po vdesin dhe askush nuk do të fitojë në fund të ditës”, u shpreh presidenti turk.

Më e rëndësishmja është se lideri turk gjatë intervistës ka bërë të ditur se ka folur me presidentin rus Vladimir Putin dhe se ai duket i gatshëm që t'i japë fund luftës sa më shpejt të jetë e mundur.

"Në Uzbekistan, u takova me presidentin Putin dhe patëm diskutime shumë të thella me të. Dhe ai po më tregon se është i gatshëm t'i japë fund kësaj situate sa më shpejt të jetë e mundur. Kjo ishte përshtypja ime, sepse si po shkojnë gjërat, tani është mjaft problematike. 200 pengje do të shkëmbehen pas një marrëveshjeje mes palëve. Mendoj se do të bëjë një hap të rëndësishëm përpara." , tha Erdogan, raporon "The Guardian".

Një burrë ukrainas ka rrëfyer një ngjarje të rëndë që ka përjetuar, i cili thotë se është  lidhur, rrahur dhe torturuar me elektroshok, gjatë kohës që fshati i tij ishte i pushtuar nga rusët. Por, nuk ishin forcat ruse, Andrii Matiazh, 46 vjeç, thotë se ishin policët lokalë ukrainas që kishin kaluar në anën e kundërshtarëve dhe kishin tradhtuar vendin e tyre.

"Dikush më torturoi," tha ai, duke folur në shtëpinë e tij në Volokhivka, e cila është rreth katër milje nga kufiri i Ukrainës me Rusinë.

“Ata kanë qenë në forcat e policisë (ukrainase)para pushtimit dhe më pas janë kthyer në anën ruse”.

Ukraina ka akuzuar forcat ruse për përdorimin e torturës në zonat që ata kontrollonin, duke thënë se më shumë se 10 dhoma torture janë gjetur në zonat e sapoçliruara të rajonit të Kharkiv, në verilindje të vendit.

Asambleja e Përgjithshme e Kombeve të Bashkuara, nis të martën punimet teksa bota përballet me kriza të shumta, duke nisur nga lufta në Ukrainë. Pas dy vjetëve të kufizimeve për shkak të pandemisë së koronavirusit, dhe adresimeve përmes videove, OKB-ja u ka kërkuar liderëve botërorë që të marrin pjesë fizikisht në organizim.

Përjashtim bën presidenti ukrainas, Volodymyr Zelensky.

Vdekja e Mbretëreshës Elizabeta II e ka ndryshuar agjendën e samitit. Presidenti amerikan, Joe Biden, i cili sipas traditës flet në ditën e parë të samitit, kësaj here do të marrë pjesë të mërkurën.

Në ditën e parë do të mbajnë fjalime presidenti francez, Emmanuel Macron dhe kancelari gjerman, Olaf Scholz – liderët e dy ekonomive më të mëdha në Bashkimin Evropian.

“Këtë herë, Ukraina do të jetë shumë lart në agjendë. Do të jetë e pashmangshme”, ka thënë kryediplomati i BE-së, Josep Borrell në Nju Jork.

“Ka shumë probleme tjera, e dimë. Mirëpo lufta në Ukrainë ka dërguar valë shoku në gjithë botën”.

Megjithatë, Sekretari i Përgjithshëm i Kombeve të Bashkuara, Antonio Guterres u ka bërë thirrje liderëve që të mos harrojnë prioritetet tjera sikurse edukimi, një nga temat që do të diskutohen.

“Edukimi është në krizë të thellë. Në vend që të rrisë mundësitë, edukimi është duke u bërë shpejt arsye për ndasi të mëdha”, ka thënë Guterres në samit.

Ai ka paralajmëruar se pandemia e koronavirusit ka shkaktuar ndikim shkatërrues në procesit e të mësuarit, pasi nxënësit e varfër nuk kanë pasur qasje në teknologji të avancuar. Në një raport të publikuar më herët gjatë këtij muaji, Programi i Kombeve të Bashkuara për Zhvillim, ka thënë se pandemia e koronavirusit ka kthyer mbrapa përparimin njerëzor për pesë vjet.

Organizata Botërore e Shëndetësisë e pati shpallur koronavirusin si pandemi më 11 mars të vitit 2020. Më shumë se 6.5 milionë njerëz kanë vdekur prej shpërthimit të pandemisë në gjithë botën. Shtetet e Bashkuara kanë regjistruar numrin më të madh të viktimave, të përcjella nga India dhe Brazili./REL