Kryeministri i Mbretërisë së Bashkuar, Keir Starmer, dhe presidenti i SHBA-ve, Donald Trump, ranë dakord se rihapja e Ngushticës së Hormuzit është “thelbësore për rifillimin e transportit global detar”, gjatë një telefonate të zhvilluar vonë të dielën.

Presidenti amerikan, megjithatë, po përgatitet për negociata. Me urdhër të tij, Kushner dhe Ëitkoff po krijojnë një ekip për të negociuar.

Teherani ka vendosur gjashtë kushte, ndër të cilat garancia për përfundimin e armiqësive, mbyllja e bazave amerikane dhe dëmshpërblime. Gjashtë kërkesa edhe nga Uashingtoni: nga ndalimi i programit raketor për pesë vjet deri te ndalimi i plotë i pasurimit të uraniumit.

Më herët gjatë fundjavës, Trump kërcënoi se do të “shkatërronte plotësisht” centralet energjetike iraniane nëse Ngushtica nuk do të rihapej brenda 48 orësh.

Irani thotë se Ngushtica është “e hapur për të gjithë përveç atyre që shkelin territorin tonë”, por paralajmëron se është i gatshëm ta mbyllë “plotësisht” hyrjen në këtë rrugë ujore nëse infrastruktura e tij energjitike sulmohet.

Kreu i Agjencisë Ndërkombëtare të Energjisë paralajmëron se asnjë vend nuk është “imun” ndaj pasojave të ngadalësimit të transportit të naftës dhe se bota përballet me një krizë energjetike më të rëndë se ajo e viteve 1970.

Forcat e Mbrojtjes së Izraelit (IDF) thonë se presin të përballen me “edhe disa javë të tjera luftime” kundër Iranit dhe Hezbollahut, ndërsa përgatiten të zgjerojnë operacionet e tyre në Liban.

IDF gjithashtu njoftoi miratimin e planeve për të zgjeruar sulmet kundër Hezbollahut në Liban, duke rritur frikën për një pushtim tokësor në shkallë të gjerë.

Presidenti Trump ka konfirmuar se do të zhvillojë në prill një vizitë në Izrael. “Po, duket pikërisht kështu”, u përgjigj Trump kur u pyet nëse ishte planifikuar ardhja e tij për të marrë Çmimin Izrael gjatë ceremonisë së Ditës së Pavarësisë më 22 prill.

Rendit zhvillimet sipas orarit:
Ora 08:58
‘Hapja e Hormuzit, thelbësore’, Trump dhe Starmer bisedojnë lidhur me krizën energjitike

Kryeministri britanik Keir Starmer dhe Presidenti i SHBA-ve Donald Trump diskutuan mbi krizën e Ngushticës së Hormuzit gjatë një bisede telefonike vonë të dielën.

“U dakordësuan se rihapja e Ngushticës së Hormuzit është thelbësore për të siguruar stabilitetin në tregun global të energjisë,” thuhej në një deklaratë zyrtare të Doëning Street, duke shtuar se ata “do të flasin përsëri së shpejti.”

Biseda erdhi pasi Trump kritikoi ashpër Kryeministrin britanik dhe aleatët e tjerë evropianë për ngurrimin e tyre për t’i ofruar ndihmë ushtarake Shteteve të Bashkuara në luftën me Iranin.

Britania është një nga 22 vendet që kanë shprehur gatishmërinë për të kontribuar në përpjekjet për të siguruar lundrim të sigurt në Ngushticën e Hormuzit, kanali jetik i mbyllur që prej fillimeve të sulmeve ndaj Iranit.

P.J/Shqiptarja.com

Ora 08:49
Kreu i Agjencisë Ndërkombëtare të Energjisë: ‘Kriza më e keqe energjitike në dekada’ nuk do të kursejë asnjë vend

Lufta në Lindjen e Mesme mund të shkaktojë një krizë energjitike më të keqe sesa kriza e viteve 1970 dhe ndikimet fillestare të pushtimit të Ukrainës nga Rusia në 2022 së bashku.

Ky ishte paralajmërimi i Fatih Birol, drejtor ekzekutiv i Agjencisë Ndërkombëtare të Energjisë, në komentet e tij për mediat australiane gjatë një eventi për shtyp në Canberra.

“Shumë prej nesh e mbajnë mend dy krizat e naftës njëra pas tjetrës në vitet 1970… atëherë, në secilën nga krizat, bota humbi rreth pesë milion fuçi naftë në ditë, dhe të dyja së bashku, 10 milion fuçi në ditë,” tha Birol. “Sot kemi humbur 11 milion fuçi në ditë, pra më shumë se dy kriza të mëdha të naftës së bashku.”

Ai shtoi se asnjë vend “nuk do të jetë imun” ndaj pasojave energjetike të krizës, pasi transportet e naftës dhe gazit natyror të lëngshëm (LNG) që kalojnë përmes kanalit jetik të Ngushticës së Hormuzit, mbeten të bllokuara nga bllokada iraniane.

P.J/Shqiptarja.com

Ora 08:48
Mediat: Avioni luftarak amerikan rrëzohet në Kuvajt, pas sulmeve iraniane

Një avion luftarak amerikan është rrëzuar në Kuvajt, sipas agjencisë së lajmeve Mehr.

Sipas transmetuesit irakian, avioni luftarak amerikan u godit në qiellin mbi Iranin dhe më pas u rrëzua në Kuvajt.

Xh.K/Shqiptarja.com

Ora 08:03
Hezbollahu paralajmëron Izraelin: Kemi shumë surpriza, veçanërisht dronë

Foto:Wafiq Safa

Hezbollahu ka kërcënuar se do ta godasë rëndë Izraelin, veçanërisht me dronë.

"Na presin surpriza, veçanërisht me dronë. Jemi përgatitur për një luftë të gjatë kundër pushtuesve sionistë", tha Wafiq Safa, anëtar i Këshillit Politik të Hezbollahut.

Ai shtoi se pas luftës, ne do të detyrojnë qeverinë të tërheqë vendimin e saj për të ndaluar aktivitetet ushtarake të Hezbollahut.

“Ne do ta bëjmë këtë sido që të jetë”, theksoi ai.

Xh.K/Shqiptarja.com