VLORE-  Operacioni për bllokimin e automjeteve të blinduara dhe që përdoren kryesisht nga anëtarë të grupeve kriminale në vend, ka vijuar në qytetin e Vlorës. Pritet që javën e ardhshme oficerët e Operacionit “Forca e Ligjit”, të shkojnë në Vlorë, ku do vihen në sekuestro prenventive dhjetëra pasuri.

Vetëm dy ditë më parë në Vlorë, nga ana e strukturave të policisë kriminale janë sekuestruar katër automjete të blinduara. Burime nga policia e Vlorës, thonë se njëra prej këtyre automjeteve përdorej nga Lorenc Sadiku, i cili njihet në Vlorë si shoku i Edison Harizajt, i vrarë në Durrës në 7 nëntor 2018.  Ndërkohë një makinë tjetër e bllokuar nga policia e Vlorës, është dhe ajo e një biznesmeni nga Tirana. Gjithashtu mes makinave të bllokuara nga policia e Vlorës, janë ato të Eduart Xhezos dhe Shpati Lena ose siç njihet ndryshe si Çelik Lena.

Të dy këta persona janë akuzuar nga prokuroria e Vlorës për vrasjen e Arben Beqirajt, ose siç njihet ndryshe në Vlorë “Beni i Çeçesë”. Bllokimi i këtyre automjeteve pritet të dërgohet për referim në prokurori. Eduart Xhezo, është njëri nga autorët kryesorë të akuzuar nga prokuroria për vrasjen e Arben Beqirajt. Për vrasjen e Beqiraj, është dyshuar dhe shpallur në kërkim dhe Çelik Lena.

Postoblloku i policisë në Vlorë