Mandati i tretë dhe sfidat/ Rama, për prestigjiozen 'Financial Times': Shqipëria po rritet! Integrimi në BE? Unioni ka mungesë kohezioni, vuan nga amnezia

Mandati i tretë është një arritje historike nga ana e Partisë Socialiste dhe Edi Ramës dhe kjo ka tërhequr vëmendjen e mediave më të rëndësishme ndërkombëtare. Së fundmi Rama ka folur për prestigjiozen 'Financial Times', intervistë në të cilën ka prekur edhe zhvillimet më të rëndësishme të politikës në vend.

Rama tha se zgjedhjet e 25 Prillit treguan se kombi po përqafonte stabilitetin pas tre dekadave që nga përmbysja e sistemit me të egër komunist në Evropë.

"Shqipëria është një demokraci adoleshente, dhe si çdo adoleshent ajo ka probleme, por po rritet dhe do të arrijë pjekurinë për një kohë jo të gjatë," i tha ai Financial Times.

LEXO EDHE:
Takimi i Ramës në Londër/ Parashikimi i Spahiut për diasporën në Report TV: Maksimumi 6-7% e emigrantëve do votojnë në zgjedhjet e 2025!

Në shkrim është përmendur edhe vrasja në Elbasan e Pjerin Xhuvanit.

"Një mbështetës i partisë Socialiste u vra gjatë trazirave në qytetin e Elbasanit. Ajo u ndez pasi Presidenti Ilir Meta, themeluesi i Lëvizjes Socialiste për Integrim (LSI), akuzoi Ramën për drejtimin e një "regjimi kleptokratik" që "rrëmbeu të gjitha fuqitë dhe sovranitetin e popullit të Shqipërisë dhe. . . eliminoi të gjithë llogaridhënien”, ka shkruar Financial Times.

Rama hodhi poshtë ankesat e opozitës për rregullsitë zgjedhore dhe kapjen e shtetit: "Ata që nuk dinë çfarë të bëjnë me lirinë e fjalës ankohen për mungesë lirie." Ai tha se refuzimi për t'u përfshirë në institucione politike ishte arsyeja për performancën e dobët të Partisë Demokratike dhe LSI.

"Opozita ka humbur betejën e saj të pestë me radhë - tre zgjedhje të përgjithshme dhe dy lokale - sepse ata kurrë nuk kanë qenë humbës të mirë. Nëse je një humbës i keq, nuk mund të fitosh, ”tha ai.

Rama tha se ai tani ishte më i përqendruar në zbatimin e një plani zhvillimi prej 10 miliardë eurosh me një fokus në turizëm. Kjo do të përfshijë një projekt të autostradës bregdetare, një port turistik prej 2 miliardë eurosh në qytetin e Durrësit, më i madhi në historinë shqiptare, i zhvilluar nga grupi Emaar, zhvilluesi i Burj Khalifa dhe Dubai Mall.

Ndërkohë që sa i përket 'Non paper' slloven të dalë së fundmi për kufijtë në Ballkan, Rama i kosnideroi 'të rrjedhura' dhe "një mungesë vizioni".

"Kjo tregon një dobësi brenda, mungesë vizioni koheziv në lidhje me zgjerimin dhe mungesë të një procesi të qëndrueshëm për ta zbatuar atë," tha Rama.

Rama tha se anëtarësimi në BE mbeti tërheqës pavarësisht shqetësimeve të BE-së gjatë krizës së refugjatëve 2015 dhe pandemisë.

"Nëse Shqipëria është një adoleshente, Brukseli po vuan nga një amnezie për atë se kush janë, cili është qëllimi i ekzistencës së tyre. Ata janë forca më e madhe për njerëzimin e mirë që ka krijuar dhe shpresoj se do të shërohen shpejt sepse pa to bota është një vend shumë më i keq", tha ndër të tjera Rama.

Kjo është intervista e dytë që Rama jep për mediat e huaja pas fitores së 25 prillit. Para disa ditësh ai ka folur për 'La Stampa' , ku ishte dje për një të marrë pjesë në konferencën online me temë "Europa një botë që po ndryshon". Edhe për gazetarët italianë Rama shprehu kritikat e tij ndaj Brukselit. Ai tha se procesi i anëtarësimit të vendit në BE po ecën me hapa të ngadaltë, për shkak të pengesave nga disa vende anëtare dhe kërkoi ndihmën e Italisë, për të tejkaluar këto pengesa.

K.T./r.k./Shqiptarja.com

TAG:
• edi rama
• Financial Times
• zgjedhjet parlamentare 2021