Marty: Keqardhje që kryeministër
do të jetë Thaçi ose Haradinaj

Senatori zviceran, Dick Marty në një intervistë për mediat zviceriane ka thënë se është për të shprehur keqardhje kur posti kryeministri në Kosovë ndahet mes Hashim Thaçit dhe Ramush Haradinajt.
 
“Jam akuzuar që jam kundër pavarësisë së Kosovës. Unë vetëm kam thënë që është shpallje e ngutshme. Nuk mundet të shpallet i pavarur një vend i cili nuk ka administratë. Por, edhe më keq, nuk ka shoqëri civile. Kjo është dashur të përgatitet më me shume seriozitet. Sikur sot, është për keqardhje që kryeministri duhet të zgjidhet në mes të Thaçit dhe Haradinajt. Ky i fundit është paraqitur dy herë para Gjykatës së Hagës. Është e vërtetë që është liruar, por është liruar pasi që nuk kishte asnjë dëshmitar. Është shumë keq që bashkësia ndërkombëtare nuk ka bërë asgjë që të ketë në krye të këtij vendi persona me duar të pastra. Në këtë drejtim, nuk i kemi ndihmuar njerëzve të cilët jetojnë në këtë vend”, ka thënë Marty. I pyetur për raportin e prokurorit Clint Williamson, ai thotë se është provuar puna e tij.
 
“Këta persona do të përgjigjen para një gjykate ndërkombëtare të themeluar për këtë çështje në vitin 2015, duke pasur parasysh që Gjykata e Hagës për ish-Jugosllavi ka pasur kufizim kohor. Këto të gjitha na e kujtojnë punën e Carla Del Pontes, e cila është ankuar shpeshherë për pamundësinë për të marr informata nga shtetet të cilat kanë bashkëpunuar me UÇK-në, si SHBA-të, Mbretërinë e Bashkuar, të cilat, ashtu sikurse edhe BE-ja kanë qenë dhe janë edhe sot partnerë kryesorë me këta përfaqësues të UÇK-së”, ka thënë senatori zviceran.

Publikimi i raportit të kryeprokurorit Clint Williamson, nga Task-Forca Speciale për Hetime, që nuk ka arritur pas tri vitesh hetime të gjejë dëshmi dhe prova për trafikim organesh, ka nxitur reagime të diplomatëve brenda Bashkimit Evropian.
 
 

TAG:
• Dick Marty