Mbahet sot në GJKKO seanca gjyqësore për 11 të pandehurit e dosjes "Veliaj". SPAK pritet të lexojë pretencën për të pandehurit të cilët gjykohen me procedurë të shkurtuar.

Biznesmeni Elman Abule, ish-deputetja e PS Klotilda Bushka e 10 të tjerë, kërkuan të gjykoheshin sipas procedurës së shkurtuar. Ndërkohë kryebashkiaku, bashkëshortja e tij Ajola Xoxaj dhe 17 të pandehur të tjerë, do të gjykohen sipas procedurës së zakonshme.

Biznesmenët akuzohen për korrupsion aktiv të funksionarëve të lartë shtetëror ose të zgjedhurve vendorë, fshehje të ardhurash dhe pastrim parash.

Ish-deputetja Klotilda Bushka akuzohet për veprime që pengojnë zbulimin e së vërtetës. Kurse Fatjon Baci është gardiani i burgut të Durrësit, i cili i dha telefonin Erjon Veliaj gjatë transferimit të tij nga qelia në gjykatë, në dy raste.

Të pandehurit që do të gjykohen me gjykim të shkurtuar
Elman Abule- “Pastrimi i produkteve të veprës penale ose veprimtarisë kriminale”, kryer në bashkëpunim më shumë se një herë, në emër të shoqërisë tregtare “Rametal” shpk;
“Rametal” shpk;- “Pastrimi i produkteve të veprës penale ose veprimtarisë kriminale”, kryer në bashkëpunim më shumë se një herë
Fatmir Bektashi- “Korrupsioni aktiv i personave i funksionarëve të lartë shtetërore ose të zgjedhurve vendorë”, në emër të shoqërisë tregtare “Kontakt” shpk;
Kontakt shpk- “Korrupsioni aktiv i personave imirton  funksionarëve të lartë shtetërore ose të zgjedhurve vendorë”
Mirton Lika- “Fshehja e të ardhurave”, kryer në bashkëpunim, në emër të shoqërisë “Lani” shpk;
Lani shpk- “Fshehja e të ardhurave”, kryer në bashkëpunim
Frosina Bollo- “Korrupsioni aktiv i personave i funksionarëve të lartë shtetërore ose të zgjedhurve vendorë”, në emër të organizatës jofitimprurëse “Frobolous”;
OJF ‘Frobolus’- “Korrupsioni aktiv i personave i funksionarëve të lartë shtetërore ose të zgjedhurve vendorë"
Adela Kondakçiu- “Pastrimi i produkteve të veprës penale ose veprimtarisë kriminale”, kryer në bashkëpunim më shumë se një herë
Fatjon Baci- “Futja ose mbajtja e sendeve të ndaluara në institucionin e ekzekutimit të vendimeve me burgim”
Klotilda Bushka- “Veprime që pengojnë zbulimin e së vërtetës”

Kryebashkiaku Veliaj i vetmi me masë arresti në burg nga grupi i të pandehurve, ndodhet në paraburgim që prej 10 shkurtit 2025.

-------------------------------
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.