Mbledhja e 2 Kuvendeve Shqipëri-Kosovë mbahet më 27 nëntor në Tiranë! Do nënshkruhen disa marrëveshje

Me rastin e 110 vjetorit të pavarësisë Kuvendi i Shqipërisë dhe ai i Kosovës do të zhvillojnë një mbledhje të përbashkët në Tiranë. Burime për gazetarin e Report Tv, Arbi Fortuzi bënë të ditur se mbledhja do të zhvillohet më datë 27 nëntor dhe në fokus do të ketë forcimin e marrëdhënieve mes dy vendeve shqipfolëse. Gjatë mbledhjes pritet të nënshkruhen edhe disa memorandume që synojnë nxitjet më tej të bashkëpunimit.

Në mbledhjen e fundit mes dy qeverive të shqipërisë dhe Kosovës  u nënshkruan 19 marrëveshje bashkëpunimi në fushën e arsimit, doganave, enegjisë, bujqësisë, infrastrukturës rrugore, transportit, shëndetësisë dhe mbrojtjes sociale.

Një nga marrëveshjet më të rëndësishme ishte për lehtësimin e procedurës së kalimit në kufirin mes Shqipërisë dhe Kosovës. Jo vetëm qytetarët, por lehtësira qeveritë lajmëruan edhe për biznesin. Ministrat e Financave të Shqipërisë dhe Kosovës nënshkruan një marrëveshje për shkëmbimin e të dhënave për realizimin e të drejtës për pension, kërkesat për kontrolle mjekësore së një qytetari. Pra do të zbatohet marrëveshja që tregjet e dy vendeve të bashkohen dhe të ketë edhe lëvizje të lirë të fuqisë punëtore.

Edhe ndërtimi i portit të ri tregtar në Porto-Romano dhe lidhja e tij me Portin e Thatë në Prishtinë, duke përdorur hekurudhën Durrës-Prishtinë, ishte projekti ambicioz i prezantuar përpara dy qeverive nga kompania holandeze Royal Hackoning.

Marrëveshje u nënshkrua edhe për gjendjen civile, ku do të bëhet shkëmbim në kohë reale ndërmjet dy vendeve. Mes 19 marrëveshjeve, Shqipëria e Kosova nënshkruan edhe ndërtimin e linjës hekurudhore Durrës-Prishtinë me bashkëfinancim, që do të kushtojë rreth 1 milionë e 980 mijë euro.

Në kushtet e krizës, Shqipëri-Kosovë nënshkruan marrëveshje edhe për Tecin e Vlorës, nga i cili të dyja palët do të përfitojnë gazin natyror, por edhe marrëveshjen për shkëmbimin e energjisë.

Në mesin e 19 marrëveshjeve u njoftua se skema e sigurimeve shoqërore do të hyjë në fuqi prej 1 korrikut, rrugët në fshatrat ndërkufitare do investohen në të dyja anët e kufirit, mjekët do kenë mundësi punësimi, licencat e avokatëve do të njihen nga të dyja vendet, projekti madhor në albanologji do të bëhet me bashkëfinancim, ndërsa jashtë këtyre marrëveshjeve, kryeminstri Rama deklaroi se do të kërkohet abetare e unifikuar për shqiptarët në vendet e tjera të Rajonit.

A.M./Shqiptarja.com

TAG:
• kosove
• shqiperi