Avokatja e Popullit Erinda Ballnca, kishte mbajtur një qëndrim të çuditshëm pak kohë më parë, kur për dhunën e ushtruar nga protestuesit në pikën e kalimit të Kalimashit kishte mbrojtur në njëfarë mënyre tubuesit e paligjshëm dhe kishte kërkuar që policia, që po mbronte pasurinë publike dhe private, të vetëpërmbahej.

Por sot presidenti i Republikës Ilir Meta, gjatë një takimi me të, e ka cilësuar rolin e Ballancës, si atë të një institucioni që nxjerr në pah të vërtetën me rekomandimet e saj.

Pak pas qëndrimit që e vuri në dyshim të fortë paanësinë e Ballancës, që në të kaluar ka qenë avokate e vjehrrit të Lulzim Bashës por edhe e Sali Berishës në disa çështje gjyqësore, kjo e fundit u pa duke i dhënë shpjegime ambasadorit amerikan Donald Lu me gjestikulacione tepër të ndezura.

Komenti i Metës për takimin e sotëm me Ballancën:

Sot pata kënaqësinë të prisja në një takim dhe të diskutoja me Avokaten e Popullit Zj.Erinda Ballanca.

Avokati i Popullit më njohu me Raportin Vjetor të punës për vitin 2017, dhe me aspekte të veçanta të veprimtarisë dhe prioriteteve të këtij institucioni. Ky institucion është një garant i rëndësishëm i të drejtave dhe i lirive të qytetarëve.

Mbështes punën e Avokatit të Popullit, sepse roli i Tij është i pazëvendësueshëm, edhe për faktin se evidentimi i problematikës dhe rekomandimet e Tij, për veprimtarinë e çdo institucioni publik, janë një nga mjetet që nxjerrin në pah të vërtetën, luftojnë padrejtësitë në ushtrimin jokorrekt të pushtetit publik dhe rikthejnë besimin tek shteti i së drejtës.