Fregata raketore Federico Martinengo, një anije e Marinës Ushtarake Italiane e klasës Fremm, është nisur pasditen e sotme nga baza detare e Tarantos me destinacion Qipron, në kuadër të përshkallëzimit ushtarak në Lindjen e Mesme. Lajmi bëhet i ditur nga “Agenzia Nova”, duke cituar burime të informuara.

Sipas këtyre burimeve, Martinengo pritet të jetë anija e parë europiane që do të mbërrijë në zonën e krizës në Mesdheun Lindor.

Dërgimi i kësaj anijeje vjen në një moment kur disa vende europiane po shtojnë praninë e tyre ushtarake në rajon, pas sulmit me dron që goditi ditët e fundit ishullin e Qipros dhe në sfondin e përshkallëzimit të konfliktit mes Iranit, Shteteve të Bashkuara dhe Izraelit.

Misioni synon të forcojë mbikëqyrjen detare dhe mbrojtjen e rrugëve strategjike në Mesdheun Lindor. Sipas “Nova”, dislokimi i Martinengo është hapi i parë i kontributit italian në një forcë detare europiane që po organizohet në këtë zonë.

Më herët, ministri italian i Mbrojtjes, Guido Crosetto, kishte deklaruar në Parlament se Italia është e gatshme të dërgojë mjete detare në rajon së bashku me partnerë të tjerë europianë.


Lajmi kryesor:

Lufta/ Trump: Irani të dorëzohet! Media: Rusia, informacione Inteligjence Teheranit për të sulmuar forcat amerikane në Lindjen e Mesme! Meloni telefonatë me Macron, Starmer dhe Merz