Mbyllen aplikimet për skemën kombëtare, ministri Salla për Report Tv: Vlera e kërkesave nga fermerët ka kaluar 7 mld lekë! Fondet IPARD? Presim përgjigje nga KE (VIDEO)

Shqipëria është në pritje të dritës jeshile nga Komisioni Evropian për të zhbllokuar fondet IPARD, të cilat janë pezulluar prej 3 vitesh. Ministri thotë për Report Tv se detyrat janë kryer, dhe se aktualisht janë në fazën përfundimtare të procesit të vlerësimit nga Komisioni Evropian.

“Për fondet IPARD jemi në një proces të vazhdueshëm me Komisionin Evropian. Javën e kaluar patëm në komisionin për fondet IPARD, dhe jemi në fazën përfundimtare ku kemi bërë të gjithë detyrat që na janë kërkuar dhe jemi në fazën e përfundimtare të vlerësimit. Ne kemi diskutuar me ta, kemi bërë të gjithë detyrat që na janë dhënë, por që mbetet në një fazë ku presim vlerësimin e tyre. Çdo detyrë që na është lënë e kemi bërë më së miri”, thekson ministri.

Ministri thekson se fondet prej 148 milionë eurosh janë të domosdoshme për zhvillimin e sektorit bujqësor, dhe se menjëherë pas përgjigjes nga KE ata janë gati të hapin thirrjet.

“Fondet IPARD III prej 148 milion eurosh, bujqësia shqiptare i ka të nevojshme dhe do ti ketë shumë shpejt. Nëse ne marrim një përgjigje të shpejtë nga IPARD-i, ne me strukturat tona kemi përgatitur gjithçka që skemën ta hapim menjëherë", deklaron Salla.

Ministri i Bujqësisë deklaroi në një intervistë për Report Tv se eksportet e produkteve bujqësore kanë vijuar në rritje gjatë gjashtëmujorit të parë të vitit, duke tejkaluar nivelin e së njëjtës periudhë të një viti më parë.

"Vjet kanë qenë 380 mijë tonë të eksportuara por këtë vit që në gjashtëmujorin e parë kemi tejkaluar eksportet e së njëjtës periudhë të vitit të kaluar”, tha Salla.

Sipas tij, deri më tani nuk janë evidentuar probleme me ngarkesat e eksportit për shkak të përdorimit të pesticideve të ndaluara.

“Në asnjë ngarkesë nuk kemi pasur probleme me pesticidet qoftë edhe ato të ndaluara. Në një kamion mund të ketë disa fermerë që ngarkohen dhe ne përmes gjurmueshmërisë së produktit kalon në çdo filtër. Mund të ketë raste kur fermeri nuk ka respektuar karenca, nëse e ka ndonjë afat një javor për karencën, fermeri e këput për tre ditë dhe del me një mbetje që nuk lejohet. Por nuk kemi në territor pesticide të ndaluara. Kemi bërë një aksion në vitin e kaluar, dhe na ka rezultuar në rezultate të mira këtë vit”, tha Salla.

Ministri bën edhe një apel për fermerët:- “Tregu evropian është i madh dhe ne duhet të prodhojmë me cilësi”.

Ministri i Bujqësisë Andis Salla ndalet edhe tek një prej shqetësimeve të fermerëve, mungesa e tregut dhe çmimet e ulëta të produkteve bujqësore, të cilat shpesh nuk mbulojnë as kostot e prodhimit. Salla thotë se çmimi përcaktohet nga raporti kërkesë-ofertë, por thekson se rol në uljen e çmimit në këtë periudhë ka edhe prodhimi i vendeve të rajonit.

“Çmimi vjen nga kërkesë oferta. Kërkesë oferta vjen nga interesi që kanë në territor. Unë vij nga Divjaka pas një takim me disa fermerë aty. Diskutuam edhe për problemin e shalqirit apo edhe për produktet të tjera që janë në territor. Eksporti që ne kryejmë ka një interes sepse ne kemi një favor ku klima, na favorizon shumë sepse dalim tre javë apo një muaj përpara vendeve të tjera të rajonit dhe kjo na bën që  të kapim një çmim shumë të lartë.  Por tani të gjitha vendet e rajonit kanë prodhimet e tyre, kjo bën që çmimi në territor të bjerë”, shpjegon ministri.

Megjithatë, ministri thotë se bashkë me Ministrinë e Financave do të monitorohen pikat e grumbullimit për të verifikuar nëse ulja e çmimeve është pasojë e tregut apo e praktikave abuzive.

“Jemi duke ngritur një monitorim edhe të pikave të grumbullimit për t'i orientuar nëse ka problematika në çmim real apo vjen nëpërmjet pikave të grumbullimit. Jemi në bashkëpunim me Ministrinë e Financave në mënyrë që ta monitorojmë të gjithë procesin që mos të kemi një abuzim për fermerin. Nuk mund të kemi një  problematikë të vazhdueshme në çmime, sepse e dëgjoj dhe nga fermerët këtë shqetësim”, Salla.