Politika shqiptare uron Osmanin, Meta: Do t’i shërbejë me përkushtim dhe përgjegjësi qytetarëve! Basha: Bashkë për të gjitha sfidat e në dobi të dy vendeve

Komisioneri për Zgjerimin në BE Oliver Varhelyi ka uruar Vjosa Osmanin e cila u zgjodh Presidente e Kosovës.

Në reagmin e tij Varhelyi shkruan se BE pret të punojë me Presidentin, qeverinë e re dhe parlamentin për të çuar përpara agjendën Evropiane dhe reformat e lidhura me BE.

“Urime Presidentes Vjosa Osmani. Bashkimi Europian, pret të punojë me Presidentin, qeverinë e re dhe parlamentin për të çuar përpara agjendën Evropiane dhe reformat e lidhura me BE, në interes të njerëzve të Kosovës. Vazhdimi i dialogut me Beogradin është thelbësor”, shkruan Komisioni Varhelyi.

Kryetarja e LSI, Monika Kryemadhi ka uruar presidenten më të re të Kosovës, Vjosa Osmanin. Kryemadhi shkruan se mezi pret të shohë Kosovën të përparojë në integrimin e mëtejshëm ndërkombëtar si dhe të punojnë për marrëdhënie të shkëlqyera mes 2 vendeve.

"Urimet më të mira Presidentes Vjosa Osmani! Urime popullit të Kosovës! Pres me padurim ta shoh Kosovën të përparojë në integrimin e mëtejshëm ndërkombëtar dhe le të punojmë sëbashku për marrëdhënie sa më të shkëlqyera mes Shqipërisë dhe Kosovës, për rritjen e mirëqenies dhe realizimit të sfidës së integrimit europian", shkruan Kryemadhi.

Kreu i PD Lulzim Basha ka uruar Presidenten e Re të Kosovës, Vjosa Osmanin ku shkruan se zgjedhja e saj do të mundësojë unifikimin e faktorit politik të Kosovës, për të adresuar drejt sfidat që vendi ka përpara.

"Urimet më të përzemërta Vjosa Osmanit për zgjedhjen e saj Presidente e Republikës së Kosovës. Jam i bindur se presidentja Osmani do të mundësojë unifikimin e faktorit politik të Kosovës për të adresuar drejt sfidat që vendi ka përpara, garantimin e sovranitetit dhe integritetit territorial, antarësimin e Kosovëes në institucionet ndërkombëtare, arritjen e marrëveshjes për njohje reciproke me Serbinë dhe progresin drejt integrimit euroatlantik.

Si përherë, sot dhe nesër në qeverisje të vendit, PD dhe unë qëndrojmë në krah të Kosovës, në mbështetje të qytetarëve dhe institucioneve të saj, për ti përballuar së bashku të gjitha sfidat e për të forcuar bashkëpunimin mes nesh në dobi të zhvillimit dhe mirëqënies së qytetarëve tanë. Punë të mbarë Presidente Osmani", shkruan Basha.