Milanoviç: BE-ja të bëjë hapa më të guximshëm drejt Ballkanit

Kryeministri kroat, Zoran Milanoviç vlerësoi se Bashkimi Evropian duhet të përparojë në mënyrë më të guximshme drejt vendeve të Ballkanit.

Milanoviç vlerëson se kjo është gjeopolitiksht e nevojshme dhe një mjet efikas për qetësimin e të gjitha llojeve të tensioneve në këto hapësira.

"Nuk kemi ambicie të jemi të ashtuquajtur liderë rajonalë dhe as tutorë ose sponsorë të dikujt. Dëshirojmë të jemi shembull në ndërtimin e shteteve të qëndrueshme demokratike, ku jetojnë njerëz të lirë dhe të lumtur. Dëshirojmë të jemi miq te të cilët këto vende mund të mbështeten, gjë që u dëshmua gjatë përmbytjeve të paradokohshme, të cilat goditën fuqishëm Serbinë dhe Bosnje-Hercegovinën", deklaroi Milanoviç në parlamentin kroat gjatë raportit vjetor të punës së qeverisë.

Kryeministri theksoi se Kroacia, si anëtare e BE-së, e përforcon ndikimin e saj në krijimin e qëndrimeve të përbashkëta evropiane, posaçërisht kur bëhet fjalë për rajonin. "Kroacia ishta ajo që ndërmori iniciativën për qasjen proaktive evropiane të Bosnjes", theksoi ai./ATSH/