Deputetët e PD sulmojnë efektivët e FNSH në Kuvend: Na drejtuan armën! Policia: S'është e vërtetë, kishin spraj! JA ME VIDEO ÇFARË KA NDODHUR

Gazment Bardhi, kryetar i Grupit të PD-së, ka dërguar një letër kryeparlamentares, Elisa Spiropali, në lidhje me incidentin e ndodhur këtë të enjte gjatë seancës plenare.

Në letrën e tij, Bardhi shpreh shqetësimin për futjen e forcave speciale të Policisë së Shtetit në Kuvend, duke e cilësuar këtë veprim si një shkelje të rregullores dhe ligjeve në fuqi.

Në letrën e tij, ai e quan këtë situatë një “puç kushtetues” dhe një provokim të paprecedent ndaj opozitës, duke theksuar se kurrë më parë në historinë e parlamentarizmit shqiptar nuk ka ndodhur një gjë e tillë.

Letra e plotë:

“Më datë 17.10.2024 gjatë zhvillimit të seancës plenare, në kundërshtim flagrant me nenin 122 të Rregullores së Kuvendit dhe ligjin për Policinë e Shtetit, Forcat Speciale të Policisë së Shtetit kanë dhunuar, penguar dhe kanosur me jetë deputetët e opozitës brenda mjediseve të Kuvendit të Shqipërisë. Është dashur ndërhyrja e Gardës së Republikës (punonjësve të Shërbimit të Sigurisë së Kuvendit) për të mbrojtur deputetët nga agresioni brenda mjediseve të Kuvendit nga ana e punonjësve të Policisë së Shtetit.

Futja e Forcave Speciale të Policisë së Shtetit brenda mjediseve të Kuvendit, gjatë aktivitetit parlamentar, pengimi i deputetëve për të lëvizur në ambientet e Kuvendit prej tyre, kanosja me jetë e deputetëve të opozitës dhe cenimi i integritetit të tyre fizik, është një akti i paprecedentë në funksionimin e Kuvendit të Shqipërisë. Kurrë në historinë e parlamentarizimit në Shqipëri, një Kryetar Kuvendi nuk ka lejuar futjen e Forcave Speciale të Policisë së Shtetit në mjediset e brendshme të Kuvendit të Shqipërisë. Kurrë në historinë e parlamentarizmit në Shqipëri nuk ka ndodhur që Forcat Speciale të Policisë së Shtetit të pengojnë një deputet të Kuvendit brenda mjediseve të tij.

Futja e Forcave Speciale të Policisë së Shtetit gjatë një aktiviteti parlamentar është një puç i rëndë kushtetues ndaj vetë Kuvendit të Shqipërisë dhe një provokim i pandodhur kurrë më parë ndaj opozitës. Për këtë arsye, kërkojmë të na:

– Informoni menjëherë se kush ishte autoriteti që dha urdhrin për futjen e Forcave Speciale të Policisë së Shtetit në mjediset e brendshme të Kuvendit të Shqipërisë?

– Vini në dispozicion kamerat e sigurisë të të gjitha ambienteve të brendshme dhe të jashtme të Kuvendit të Shqipërisë (përfshirë por pa u kufizuar: sallës plenare, korridoreve lidhëse të sallës plenare, hyrjes kryesore të Kuvendit, ambinteve të jashtme të oborrit të Kuvendit të Shqipërisë).

Duke dënuar me forcë aktin brutal, të paprecedentë, të hakërrimit të Policisë së Shtetit ndaj deputetëve të opozitës në mjediset e brendshme të Kuvendit të Shqipërisë, ju siguroj se ju personalisht dhe cilido tjetër që në mënyrë arbitrare urdhëroni Forcat Speciale të Policisë së Shtetit të dhunojnë deputetët e opozitës, do të mbaheni përgjegjës për këtë shkelje të rëndë ligjore, që ka tiparet e një puçi kushtetues ndaj integritetit të Kuvendit të Shqipërisë.”

Pak pas përfundimit të protestës së deputetëve të opozitës brenda dhe para Parlamentit ditën e sotme, ka areaguar edhe kreu i Partisë së Lirisë, Ilir Meta.

Ai tha se e dënon me ashpërsi kërcënimin me armë zjarri dhe kanosjen e jetës së deputetëve të opozitës, teksa efektivët blu i cilësoi edhe si “narkopolicia”.

Me një postim në rrjetin social Facebook, presidenti i PL e cilëson si “akt të rëndë kriminal dhe antiligjor, në shërbim të mafias në pushtet dhe ngjarje të paprecedentë”. Meta shton se përballë kësja junte, e vetmja zgjidhje mbetet “përballja dhëmbë për dhëmbë”.

Reagimi i Ilir Metës:

“Dënoj me ashpërsinë më të madhe kërcënimin me armë zjarri dhe kanosjen me jetë të deputetëve të opozitës, në ambientet e Kuvendit, nga Narkopolicia. Ky akt shumë i rëndë kriminal dhe antiligjor është dëshmi tronditëse e inkriminimit të strukturave të Policisë së Shtetit, që në emër të mafias në pushtet dhe për llogari të saj, guxojnë të kanosin me jetë përfaqësuesit e zgjedhur të popullit.

Kjo ngjarje e paprecedent është prova e radhës e fytyrës kriminale të Narkoshtetit, që jo vetëm burgos dhe përndjek politikisht opozitën, por edhe e kërcënon me jetë. Përballë kësaj junte që i drejton armën deputetëve të opozitës, e vetmja alternativë mbetet përballja dhëmb për dhëmb deri në përmbysje!”.

Reagimi i Ilir Metës në Facebook

Opozita protestoi dhunshëm sot para parlamentit, duke u konfrontuar fizikisht me Gardën dhe forcat e Policisë që iu bashkuan në një moment me përforcime.

Një prej çasteve ishte sulmi në bllok i ligjvënësve të PD-së ndaj forcave të sigurisë, teksa pretendonin largimin e FNSH-ve, pasi ishin në shkelje të ligjit. Fillimisht deputeti Dashnor Sula dhe Gazment Bardhi dhe pas tyre ishte Flamur Noka që sulmuan policët duke i goditur edhe fizikisht dhe shtyrë.

Një prej momenteve ishte deputeti Noka që shtyn fortë efektivët e FNSH-ve deri te gardhi i lulishtes, në oborrin e Parlamentit.

Noka u pa teksa goditi fizikisht njërin prej efektivëve. Disa prej tyre edhe u rrëzuan në lulishte, teksa qetësia u rikthye pasi efektivët u distancuan nga oborri.

Situata në fjalë u tensionua në momentin kur protestuesit që ndodheshin para Bashkisë së Tiranës të udhëhequr nga Klevis Balliu, shkuan përpara Parlamentit ku u përplasën me policinë.

Partia Demokratike ka reaguar sërish pas njoftimit të policisë që njoftoi se efektivët e FNSH s’kanë pasur armë me vete, por spraj piper.

PD në një reagim për shtypm, thotë se policia mashtron, pasi pretendojnë se në video ka pasur armën poshtë bomobolës së gazit.

Garda nxjerr pistoletën në drejtim të deputetëve të opozitës. Video e publikuar nga Policia mashtrim. Pamjet hedhin poshtë dizinformimin e shpërndarë në media.

Policia e Shtetit ka shpërndarë një video ku tenton të mbulojë aktin e rëndë të gardistit  i cili i drejtoi armën dy deputetëve të opozitës, Luan Baçi dhe Bledion Nallbati. Në një video e cila i është shpërndarë medias nga vetë Policia, tregohet qartë se bombola e gazit është në pozicionin e brinjës ndërsa pistoleta poshtë saj.

Kjo hedh poshtë mashtrimin e policisë për të fshehur një tentim vrasje të deputetëve të opozitës.

Pak pasi është mbyllur protesta e dhunshme e opozitës para Parlamentit, ku u pretendua edhe për një kërcënim me armë nga efektivi i Policisë ndaj ligjvënësit Luan Baçi, por që rezultoi blof, Gazment Bardhi ka reaguar përsëri.

Kreu i grupit të PD ka akuzuar me një postim në rrjetin social Facebook mazhorancën, se ka përdorur Gardën dhe Forcat e FNSH për të sulmuar deputetët e opozitës.

Bardhi theksoi ndër të tjera se “nuk kishte ndodhur kurrë rrethimi i deputetëve të opozitës, përdorimi i Gardës, ndërhyrja e Policisë në territorin e Parlamentit apo kërcënimi me jetë i një deputeti nga punonjësi i policisë”. Postimi shoqërohet edhe me pamjet e videos, ku në një moment pretendohet se efektivi kanos deputetin Luan Baçi.

Reagimi i Bardhit:

“Kurrë në historinë e Shqipërisë nuk ka ndodhur që deputetët të rrethohen nga forcat speciale të Policisë së Shtetit brenda ambienteve të Kuvendit të Shqipërisë.

Kurrë gjatë një seance plenare nuk ka ndodhur që forcat speciale të Policisë së Shtetit të futen në ambientet e brendshme të Kuvendit dhe të pengojnë lëvizjen e deputetëve. Kuvendi sipas ligjit dhe Rregullores së Kuvendit ka forcat e veta të sigurisë, që janë pjesë e Gardës së Republikës.

Kurrë nuk ka ndodhur që një punonjës policie brenda ambienteve të Kuvendit të kanosë me jetë një deputet.

Pavarësisht debateve të përhershme dhe tejkalimeve të kompetencave herë pas here nga Garda e Republikës, sot ishin pikërisht punonjësit e Gardës që mbrojtën jetën e deputetëve të kanosur nga Policia në ambientet e brendshme të Kuvendit.

Sot Kuvendi i Shqipërisë u shndërrua në fytyrën e vërtetë të Edi Ramës. Shteti që kërcënon brenda Kuvendit me polici deputetët e opozitës, nuk ka asnjë lidhje me nje shtet që pretendon të jetë pjesë e Bashkimit Europian dhe asnjë lidhje me parimet që udhëheqin një vend anëtar i NATO-s!”

Postimi i deputetit Gazment Bardhi

Opozita denoncoi publikisht sot gjatë tensioneve dhe protestës së dhunshme para Parlamentit, se një efektiv policie i FNSH i kërcënoi me armë zjarri.

Në një video ku duket efektivi që vë dorën në brez, ndezi situatën dhe tashmë PD ka njoftuar edhe kallëzim në SPAK.

Policia e Shtetit fillimisht mohoi publikisht me reagim zyrtar, duke sqaruar se efektivët nuk mbajnë armë shërbimi gjatë protestave, përveç mjeteve të tjera, si shkopi i gomës apo spraj.

Dhe në këtë video shoqëruese sqarohet më mirë se çfarë kishte në brez, te vendi i pistoletës efektivi dhe kolegët e tij. Një spraj që përdoret në protesta, kur ka sulme fizike, kundërshtim dhe thyerje të rendit dhe perimetrit.

Sprajti i policit që u akuzua se kishte armë në brez

Pak pas përfundimit të protestës dhe tensioneve para Parlamentit nga opozita, ka ardhur edhe reagimi zyrtar nga Partia Demokratike.

Selia blu deklaron se:

“Grupi Parlamentar i PD do bëjë kallëzim penal në SPAK për Kryetaren e Kuvendit, Ministrin e Brendshëm, Drejtorin e Përgjithshëm të Policisë, Drejtorin e Policisë së Tiranës, disa punonjës të paidentifikuar policie: U futën persona ta armatosur në Kuvend, kanosën me armë deputetët”.

PD pretendon se deputetët u kanosën me armë, ndaj për këtë qëllim do bëjë kallëzim në SPAK për Elisa Spiropalin, Ilir Prodën, Ervin Hoxhën, e Tonin Vocajn dhe të tjerët.

Flamur Noka foli pas largimit të deputetëve të opozitës drejt selisë së PD, para mbështetësve të tij, duke siguruar se mosbindja civile do të vazhdojë. Ai denoncoi edhe njëherë policinë se kërcënoi me armë deputetët e opozitës.

Noka akuzoi me epitete edhe kryeparlamentaren Eliza Spiropali, kryeministrin Edi Rama dhe ministrin e Brendshëm, Ervin Hoxha. Këtë të fundit e quajti edhe si “stërnipi i Enver Hoxhës”.

Reagimi i Nokës:

“Sot regjimi arriti kulmin. Duke kërcënuar nën tyten e armës deputetët. Nuk kishte ndodhur kurrë që forca speciale të policisë të armatosura gjer në dhëmbë të futen në territorin e Parlamentit dhe Gardës e të kërcënojnë deputetët përfaqësues të popullit. Këtu vdes demokracia, këtu vdes shteti ligjor. Vetëm diktaturat, juntat fusin në Parlament polici dhe forca të atmarotusa. Institucionet janë të mbrojtura nga forcat e Gardës dhe jo policia. Po kur stërnipi i Enver Hoxhës, ministri Brendshëm, kërcënon deputetët nga Parlamenti i narkoshteti, çfarë nuk pret më tjetër.

E pamë sot që nga dhuna, prania e gardës dhe policisë tregon panik. Narkoregjimi është në panik nga mosbindja civile e opozitës. Elisa Spirogjoka e 5 mln eurove, apo stërnipi i Enver Hoxhës s’mund të kenë gjë tjetër përveç panikut. Asgjë s’i shpëton nga vullneti shqiptarëve. Shqiptarët kërkojnë qeveri teknike se s’mund të shkojmë në zgjedhje pa qeveri teknike, me këtë qeveri narkoshtetit. S’ka kaluar as 24 orë kur kreu i narkove tha se ka hapur grupkapitujt dhe i çeli ato me Gardën, Policinë, e tytën e armës. Jemi të vendosur në rrugën e mosbindjes civile, asgjë s’na ndal, ne do vazhdojmë në rrugën tonë. S’na ndal as Elisa Spirogjoka dhe as stërnipi i Enver Hoxhës”.

Policia e Shtetit ka reaguar pas pretendimit të PD, se efektivët e FNSH i kanë drejtuar armën dy deputetëve të PD, Bledion Nallbatit dhe Luan Baçit. Policia thotë se asnjë efektiv nuk ka qenë i pajisur me armë zjarri gjatë tubimit, po vetëm me mjete mbrojtëse dhe me shkopinj gome.

Shërbimet e Drejtorisë Vendore të Policisë Tiranë, me mbështetjen e Forcës Kombëtare të Sigurisë, kanë marrë të gjitha masat për garantimin e rendit dhe sigurisë publike, si dhe për mbarëvajtjen e tubimit të organizuar para bashkisë Tiranë.

Gjatë tubimit është bërë thirrje që pjesëmarrësit t’i drejtoheshin Godinës së Kuvendit.

Shërbimet e Policisë, konform ligjit, forcat policore kanë marrë masa për të garantuar sigurinë e institucioneve shtetërore ne rastin konkret te Kuvendit të Republikës së Shqipërisë për të parandaluar një sulm të mundshëm nga protestuesit ndaj këtij institucioni.

Bazuar në ligjin “Për tubimet”, punonjësit e Policisë, të angazhuar për mbarëvajtjen e tubimit, asnje punonjes policie nuk ka qene i pajisur me armë zjarri gjate tubimit, po vetëm me mjete mbrojtëse dhe me shkopinj gome.

Përgënjeshtrojmë lajmin që punonjës të Policisë, në tubim, iu kanë nxjerrë tubuesve, armët e zjarrit.

Policia e Shtetit është e vendosur për të garantuar të drejtën e tubimit, liritë dhe të drejtat e tjera të qytetarëve, si dhe pronën publike dhe atë private.

Ndërkohë, Policia e Shtetit do të kryejë të gjitha veprimet hetimore dhe shtetasit përgjegjës për veprimet e dhunshme ndaj punonjësve të Policisë, do të kallëzohen në Prokurori.

Deputetët e PD janë larguar nga oborri i Kuvendit pas përplasjes fizike me FNSH. Pas tyre u larguan edhe militantët, të cilët iu bashkuan para Kuvendit pas protestës te Bashkia e Tiranës.

Bardhi ka thirrur deputetët në seli dhe edhe gjatë rrugës dallohet teksa qëndron në telefon.

Sekretari i Përgjithshëm i Partisë Demokratike, Flamur Noka ka kërcënuar ministrin e Brendshëm, Ervin Hoxha, por edhe kryetaren e Kuvendit, Elisa Spiropali.

Gjatë përplasjeve në Kuvend me FNSH, Noka tha me tone kërcënuese se ministrin, Ramën e Spiropalin do i tërheqin zvarrë siç kanë bërë me Enver Hoxhën.

"I them nipit të Enver Hoxhës, ti mund të rrish ministër aty, por duhet të dish se Enver Hoxhën e kemi tërhequr zvarrë para 34 vitesh. Ashtu do tërhiqesh zvarrë ti, Edi Rama dhe Elisa Spiro Gjoka po që se ju do dhunoni opozitën, popullin opozitar dhe përfaqësuesit e popullit opozitar që janë deputetët e saj", tha Flamur Noka. 

Debati mes shefit të Gardës dhe FNSH

Teksa opozita pretendon se një efektiv policie i FNSH ka nxjerrë armën për të kërcënuar deputetin Luan Baçi, ka ndodhur edhe një debat mes kreut të Gardës dhe atij të FNSH-së, pse Policia hyri brenda territorit të Parlamentit kur situata ishte nën kontroll.

Ermal Onuzi, shefi i Gardës debat me vartësit e tij dhe përfaqësuesit e FNSH-ve, pse u hap gardhi i sigurisë së Parlamentit. Madje ai i ka thënë pas debatit një prej vartësve që të largohej prej andej në nerva e sipër.

Sipas ligjit, Policia nuk lejohet në oborrin e Parlamentit, por nuk dihet se si kanë hyrë efektivët e FNSH me skafandra brenda oborrit, që solli edhe debatet e forta.

Gazetarja e Report TV, Esiona Konomi, raportoi se Garda nuk ka kërkuar ndërhyrjen e FNSH nga oborri i brendshëm. Këtë konflikt kishte edhe drejtori i Gardës me vartësit.

Gazment Bardhi ka hedhur akuza në drejtim të FNSH. Bardhi pretendon se FNSH i ka drejtuar armën dy deputetëve Bledion Nallbatit dhe Luan Baçit.

"I drejton armën dy deputetëve të Shqipërisë, Bledion Nallbatit dhe Luan Baçit. Kërcënojnë me armë deputetët e opozitës brenda ambienteve të tyre të punës. Një pjesë e kolegëve e kanë pamjen të filmuar, do i transmetohet secilës prej mediave që nuk e disponon. Për herë të parë janë lejuar me urdhrin e kujt nuk e di", tha Bardhi. 

Denigron situata para parlamentit të Shqipërisë. Deputetët e opozitës kanë sulmuar fizikisht gardhin e sigurisë së Gardës dhe Policisë, e cila erdhi me përforcime për të mbrojtur Kuvendin.

Edhe pse me skafandra dhe mburoja, deputetët e PD sulmuan dhunshëm efektivët, duke kërkuar pse ishte prezente Policia, pasi sipas ligjit duhet të jetë vetëm Garda në oborrin e institucionit.

Deputetët më aktivë në tensione dhe sulme kanë qenë Dashnor Sula dhe Gazment Bardhi, të shoqëruar nga Flamur Noka dhe Bledjon Nallbati.

Syula u pa i përi teksa kapte mburojat e policëve dhe skafandrat për t’i hequr dhe larguar, teksa pati edhe dëmtime. Bardhi e ka ndihmuar më tej, duke kërkuar largimin e Policisë nga territori i parlamentit.

“Çfarë do Policia këtu. Largohuni. Turp, turp. Ikni, mbajeni mend! Largohuni prej këtu, s’keni punë në Kuvend. narkobandë në shërbim të qeverisë, ky është fundi”, ishte akuza e deputetëve të opozitës.

pas këtyre tensioneve të ashpra, kreu i Gardës ka kërkuar largimin e grupit të policëve me skafandra që mbështesnin Gardën në oborrin e Parlamentit.

Përplasje mes deputetëve të PD dhe policisë në oborrin e Kuvendit.  Dash Sula agravoi deri në përplasje të ashpra, ku iu hoqi policëve edhe skafandrat.