Një ditë pas marrjes së detyrës së re, ministri i Punëve të Brendshme Dritan Demiraj ka zhvilluar një takim me drejtuesit kryesorë të Policisë në Drejtorinë e Përgjithshme të Policisë së Shtetit.
 
Gjatë takimit me drejtuesit kryesorë të policisë, ministri i Punëve të Brendshme Dritan Demiraj përcolli tre porositë e tij; Për zgjedhje me standarde, ashpërsim të luftës kundër kanabisit dhe forcim të sigurisë dhe rendit publik gjatë sezonit turistik.
 

Prioriteti i parë/ Demiraj: Burg për policët që përfshihen në fushatë
“Garantimi i një procesi zgjedhor me standarde të larta profesionale nga ana e Policisë së Shtetit.
 
Mospjesëmarrja dhe mos përfshirja e Policisë së Shtetit në aktivitetet e partive politike dhe fushatës zgjedhore, si një prioritet madhor.
 
Përkushtimi i çdo strukture policore në të gjithë Shqipërinë për të zbatuar me përpikëri misionin kushtetues, ligjin për Policinë e Shtetit dhe Kodin Penal”.
 
Ministri nënvizoi se cilido person me uniformë dhe pa uniformë pjesë e strukturave të Ministrisë së Punëve të Brendshme, që përshihet në fushata duke shkelur parimet kushtetuese dhe ligjet që garantojnë procesin zgjedhor, do të mbajë përgjegjësi administrative dhe penale me largim nga detyra dhe ndjekje penale.
 
‘Shpërdorimi i autoritetit policor për të influencuar në mbështetjen e një partie politike është vepër penale dhe dënohet me burgim" u shpreh ai.
 
Prioriteti i dytë/ Demiraj: Droga, përgjegjësi i gjithë zinxhiri drejtues
“Ashpërsimi i luftës kundër kanabisit në çdo pjesë të territorit të Republikës së Shqipërisë”.
 
Ministri tha se duhet të vijojë intensifikimi në luftën ndaj fenomenit, sidomos në parandalimin e saj në mbjellje apo kultivim.
 
‘Kontrolli i territorit është detyrë që çdo individ me uniformë policore duhet të angazhohet maksimalisht. Çdo tolerim ndaj këtij fenomeni do të penalizohet rreptësisht.
 
I gjithë zinxhiri drejtues i policisë së shtetit do të mbajë përgjegjësi sipas përcaktimeve të ligjit’, tha ai.
 
Prioriteti i tretë i Demirajt sezoni turistik
Ministri u ndalua edhe tek forcimi i sigurisë dhe rendit publik gjatë sezonit turistik.
 
Demiraj kërkoi angazhim maksimal nga Policia e Shtetit për të garantuar rendin dhe qetësinë publike gjatë këtij sezoni veror dhe një përqendrim të veçantë në drejtim të parandalimit të aksidenteve dhe  përmirësimit të qarkullimit rrugor.
 
Ministri i Punëve të Brendshme Demiraj garantoi mbështetjen e tij edhe për modernizimin e reparteve të policisë.
 
Ministri i Punëve të Brendshme Demiraj u zgjodh si ministër teknik me propozimin e PD dhe zëvendësoi në këtë detyrë Fatmir Xhafajn.

[gallery]22423[/gallery]

dy.b/shqiptarja.com