Mjeku infeksionist liston 10 KËSHILLAT për t'u mbrojtur nga koronavirusi me një mesazh të fortë për të gjithë

Mjeku infeksionist Tritan Kalo ka listuar 10 këshilla për të shmangur prekjen nga Koronavirusi, i cili tashmë ka mbërritur në Shqipëri. Ai thotë se kryesore janë higjiena personale, shmangia e grumbullimeve nëse nuk është e domosdoshme, kujdesi për personat mbi 65 vjeç. Kalo kujton bilancet e viktimave nga sëmundjet e epidemitë e mëparshme, duke theksuar se betejën për jetën fitojnë ata që kanë një mendje të kthjellët dhe vullnet të plotë.

"Dukuria Covid-19/Sars-Cov-2…..Hyrja në skemën e mikroorganizmave sëmundje shkaktuese me impakt shumë të madh shtrirjeje dhe lëndimesh të jetëve njerëzore sikundër ishte Novel-Coronavirus/Covid-19/Sars-Cov-2, është bërë epiqendra e lajmeve vizive e të shkruara, si dhe e diskutimeve tona të përditëshme profesionale apo jo….Një rol jo të pakët në këtë drejtim kanë luajtur edhe lajmet jo të mirëbazuara, të bëra nga mosdija apo keqdashësija, por që gjithqysh kanë ndikuar në shtimin e shkallës së ankthit e të panikut në shoqërinë tonë…..parësore në përballjen me këtë sëmundje mbeten këshillat për

1- Higjienën personale (larja e duarve shpesh dhe jo me pak se 20-30 sekonda) dhe atë kolektive

 2- Mos grumbullimi jo i domosdoshëm në mjediset publike e në të tjera mjedise,

3- Përkujdesi për “higjienën e të teshtiturës dhe të kolliturës”

4- Ruajtja e njomësisë së fytit me pirje të herë-pas-herëshme të sasive të vogla uji

5- Ushqim i variueshëm, kuptohet edhe sipas edhe mundësive financiare, i pasur me vitamina C, D, A,

6- të pasurit në vëmëndje e mos frekuentimit të shkollave, e qendrave të punës në rast shënjash klinike gripngjasuese (teshtitje, kollë, dhimbje koke, temperaturë),

7- Vetëizolim 14 ditor për personat që vinë nga vënde të prekura dhe me raste të transmetimit komunitar të sëmundjes, harta e të cilave është zgjeruar që nga Kina e deri në Itali

8- Kontaktimi me Shërbimin e Urgjencës Kombëtare me numurin 127, nëse ai/ajo ka shenja të tilla si temperatura, tështitje e kollë, vështirësi në frymëmarje, dhe mos ardhja direkte në spital

9- KUJDESI ndaj individëve mbi 65 vjeç dhe ndaj mjekimit të rregullt të sëmundjeve kronike që shumë prej tyre kanë: sëmundje kronike të zemrës, të veshkave, të mëlçisë, të mushkërive (sidimos të sëmurët me SPOK), të kyçeve, etj, si grupi më i rrezikuar për të bërë ndërlikime në rast infektimi nga Covid-19/Sars-Cov-2,

10- Vetëkontrolli e mos panikimi për një situatë detyrimisht kalimtare të kërcënimit epidemiologjik të popullatës…Nuku ka asnjë fshehje të realitit dhe gjithkush do të vihet në dijeni, që më rastin më të parë të izolimit të këtij shkaktari në Shqipëri….

Të mos harrojmë se në botë janë humbur jetët e miliona të tjerëve nga të tjera sëmundje apo arsye: Duhani ka vrarë mbi 8.000.000 individë, gripi stinor mbi 500.000 të tjerë, aksidentit kanë vrarë mbi 55.000.0000, nga AIDS kanë humbur jetën mbi 770.000 vetë, nga malaria mbi 450.000 të tjerë ( në çdo 2 minuta humb jetën një fëmijë nga kjo sëmundje)…..Beteja për jetën është e përminutëshme dhe fitimtar në të dalin kurdoherë mendje kthjelltit, vullnet plotët dhe zemërbardhët…..së bashku do të mundemi t’ja dalim mbanë përsëri edhe betejës ndaj Covid-19/Sars-Cov-2…Javë të mbarë kudo që frymoni JU bashkëkombasit e mi!!!", shkruan Tritan Kalo.

TAG:
• tritan kalo
• Koronavirus