Monedha evropiane e mbylli muajin qershor më e dobët se kurrë në raport me lekun. Referuar kursit të Bankës së Shqipërisë 1 euro u këmbye këtë të martë me mesatarisht 94.1 lekë, ose gati 4 lekë më pak se 30 qershori i vitit të kaluar.

Në rënie edhe pse më të lehtë është edhe dollari, i cili po këmbehet mesatarisht 82.64 lekë rreth 1% më pak se në 2025-ën.

Kursi i këmbimit të valutave
                                      EURO                   DOLLARË
30 qershor 2025        1 €=98.08 lekë           1 $=83.67 lekë
30 qershor 2026        1 €=94.14 lekë           1 $=82.64 lekë
Zhvlerësimi                 - 3.94 lekë                    - 1.03 lekë

Institucionet thonë se rënia ka ardhur si rezultat i hyrjeve të larta valutore nga turizmi, remitancat dhe investimet e huaja, dhe se ky forcim i lekut ka ndikuar pozitivisht në mbajtjen e inflacionit në kontroll. Por e kundërta ka ndodhur me të ardhurat, pasi gjatë 2025-ën humbja në të ardhura si rezultat i zhvlerësimit të valutave ishte afro 100 milionë euro.

Nga ana tjetër për të stabilizuar kursin, dhe për të frenuar një zhvlerësim edhe më të fortë, Banka e Shqipërisë po ndërhyn në treg me blerje valute.

Rezerva valutore ka arritur në shifrën rekord prej 7 miliardë e 669 milionë euro, nga 6 miliardë e 780 milionë euro në maj të vitit të kaluar. Pra brenda një viti është shtuar me 889 milionë euro.

Rezerva valutore
Maj 2025           6,780
Dhjetor 2025     7,309
Maj 2026           7,669

Pavarësisht ndërhyrjeve gjasat janë që zhvlerësimi i euros të mos ndalë, pasi me afrimin e sezonit turistik, pritet që presionet mbi kursin të vijojnë, duke mbajtur euron në nivele të ulëta historike edhe në muajt në vijim.

Ndërsa Kuvendi i rekomandon Bankës së Shqipërisë të ndërhyjë në tregun valutor vetëm në rastet kur këto ndërhyrje konsiderohen të nevojshme për rritjen e rezervës valutore, për funksionimin normal të tregut valutor, ose për ruajtjen e stabilitetit monetar e financiar të vendit.