Moti i keq/ Nisin shkarkimet në Koman dhe Vaun e Dejës! Niset për në Brindisi trageti që mbeti në det të hapur

Reshjet e dendura të shiut dhe prurjet e paparashikueshme nga lumenjtë anësorë kanë rritur nivelin e ujit në hidrocentralet e kaskadës së Drinit pranë kuotave maksimale, duke detyruar KESH të nisë shkarkimet e ujit nga hidrocentralet e Komanit dhe të Vaut të Dejës. Në këtë të fundit, është hapur vetëm një turbinë e cila po shkarkon 500 metër kub ujë për sekondë. 

Ndërkohë, niveli i ujit është i lartë edhe në hidrocentralin e Komanit, ku kanë nisur shkarkimet nga dy porta, për të menaxhuar rritjen e prurjeve dhe për të shmangur tejkalimin e kuotave të sigurisë.

Sipas burimeve, shkarkimet janë diktuar kryesisht nga prurjet anësore, ndërsa lumi Valbona po sjell sasi të konsiderueshme uji në sistem.

Hidrocentrali i Fierzës ndodhet aktualisht në kuotën 280 metra, nga 296 metra që është kapaciteti maksimal i lejuar, duke vijuar operimin në parametra të kontrolluar.

Autoritetet po monitorojnë në mënyrë të vazhdueshme situatën në të gjithë kaskadën e Drinit, për të garantuar sigurinë e veprave energjetike dhe zonave përreth.

Moti i keq ka shkaktuar përmbytje në veri të vendit, ku niveli i lartë i ujit i ka bërë rrugët të pakalueshme.

Në një prononcim për Report TV, nënprefekti i Malësisë së Madhe, Hysen Hysaj, i cili thotë se situata është problematike, sidomos në Koplik. Në Përroin e Thatë në fshatin Kamicë, ku edhe ndodhet, shihet qartazi gjendja e vështirë dhe sipas Hysajt, zgjidhja e vetme është një urë.

“Duke qenë që realisht ka pasur intensitet shumë të lartë të reshjeve, ka qenë shumë problem Kopliku, qendra e lagjet e Koplikut ku ka pasur prezencë shumë të madhe të ujit, detyrimisht edhe nëpër fshatra, sidomos përrenjtë. Këtu jemi te përroi Kamicë që është çdo herë problematik që bien reshje shiu dhe zgjidhja është me një urë beli kështu që do të bëjmë çdo gjë të mundur që të lidhemi me Ministrinë e Mbrojtjes. Këtu nga momenti që do të pushojë dhe do të ndalet uji, duhet të bëhet vetëm një mbushje për të bërë lidhjen e dy lagjeve”, tha Hysaj.

Nga ana tjetër e përroit shihet një banor që s’mund të kalojë. Nënprefekti shpjegon se për momentin po përdoret një rrugë alternative. Kur niveli i ujit të bjerë, do të bëhet mbushja e përroit.

“Po përdorin një rrugë të vjetër atje, por nuk është e përshtatshme, alternative për të dalë në njësinë Kastrat, por ajo është e përkohshme se është zgjidhje momentale. Them që nga darka e dreka uji do të bjerë dhe në bashkëpunim me Emergjencat Civile do të bëjmë mbushjen që të bëhet i mundur aksesimi i rrugës”, përmbyll ai.

Moti i keq ka shkaktuar anulimin e lundrimit për një nga dy tragetet që do të nisej nga porti i Durrësit drejt Barit të Italisë mbrëmjen e 4 janarit.

650 udhëtarët e prekur nga kjo situatë janë asistuar nga kompanitë përkatëse, të cilat kanë marrë masat për ridrejtimin e tyre me nisjet pasuese. Pasagjerët janë njoftuar pasdite për të mos iu drejtuar portit dhe pritet të nisen në drekë.

Autoriteti Portual i Durrësit bën me dije se situata aktuale e lëvizjes së trageteve për ditën e sotme është si më poshtë:

-Trageti “Rigel VII” mbërrin në Portin e Durrësit në orën 11:00 dhe do të niset në orën 13:00.

-Trageti “Rigel V” pritet të mbërrijë rreth orës 15:00 dhe do të niset rreth orës 23:00.

-Trageti “Rigel III” parashikohet të mbërrijë rreth orës 21:00 dhe do të niset pas mesnatës.

-“GNV Cristal” është planifikuar të niset në orën 23:00.

Autoriteti Portual Durrës vijon të monitorojë me vëmendje situatën meteorologjike dhe lëvizjen e mjeteve detare, në bashkëpunim të ngushtë me kompanitë lundruese dhe autoritetet përgjegjëse, me qëllim garantimin e sigurisë dhe mbarëvajtjes së operacioneve portuale.

Vlorë - Prej disa ditësh vendi ynë është i përfshirë nga kushte atmosferike të paqëndrueshme. Kështu gjatë orëve të natës si pasojë e erës së fortë në zonën e Llogarasë disa pemë janë rrëzuar duke shkaktuar edhe bllokimi të këtij segmento rrugor.

Era e fortë që ka fryrë gjatë natës në jug të vendit ka shkaktuar rënien e disa pemëve, të cilat për pasojë kanë bllokuar rrugën e Llogarasë.

Nga ana tjetër si pasojë e rrëzimit të pemëve mbi linjat elektrike, zona e Llogarasë ka mbetur pa energji elektrike.

Grupet e punës ndodhen në terren dhe po punojnë për pastrimin e rrugës dhe normalizimin e qarkullimit, ndërsa ekipet e OSHEE-së janë angazhuar për rikuperimin e furnizimit me energji elektrike.