PRISHTINE, 19 Dhjetor/ATSH/-Ministria e Tregtisë dhe Industrisë (MTI) ka zgjedhur top-bizneset të cilat kanë kontribuuar në krijimin e vendeve të punës dhe përmirësimin e bilancit tregtar, duke rritur eksportin.
Top-ndërmarrjet e vogla dhe të mesme (NVM), më konkurrente në nivel nacional për vitin 2014, u shpallen Ndërmarrja "GLAVBOLGARSTROY", dega në Kosovë, e cila mori vendin e parë, Kompania " ELI - AB" nga Ferizaj vendin e dytë dhe "FLUIDI" SH.P.K. Gjilan vendin e tretë. Ndërsa top-eksportuesi për vitin 2014 u shpall Kompania "Devolli Corporation", Pejë me mbi 7 milion euro eksporte. Burim Kuraja, përfaqësues i Kompanisë "Devolli", tha se të qëllim i tyre mbetet ulja e papunësisë, duke eksportuar në shtetet e rajonit dhe me gjerë.
"Kemi filluar duke hapur fabrika të reja, mirëpo tani kemi parë që kemi mundësi më shumë, për tu hapur në tregjet e botës. Ne tri vitet e fundit kemi arritur t'i eksportojmë produktet tona në 16 shtete, duke filluar nga Zvicra, Italia, Anglia, Austria, Amerika, Kanadaja, Maqedonia, Shqipëria, Mali i Zi, Serbia, Gjermania, Holanda, Belgjika, Turqia dhe Sllovenia. Në të gjitha këto shtete, mund të gjenden dhe produktet tona, të cilat i kemi të pranishme edhe këtu. Kohëve të fundit kemi bërë ca investime dhe jashtë shtetit. Kemi bërë dhe blerjen e një brendi në Maqedoni - "Apikalin" të kafes dhe Fabrikën e miellit. Të gjitha këto produkte hyjnë në gamen e produkteve që ne ofrojmë edhe për shtetet e Evropës e Amerikës", tha ai.
Ndërsa ministrja e Tregtisë dhe industrisë Hykmete Bajrami, në konferencën përmbyllëse me temë "Roli i Edukimit në Zhvillimin Ekonomik të vendit", ku u ndanë edhe çmimet Top-NVM-ja me konkurrente dhe Top-Eksportuesi i Vitit, tha se rëndësia e sektorit privat deri më tani ka qenë më shumë deklarative dhe se janë të vetëdijshëm se kërkesat e këtij sektori janë shumë më të mëdha sesa ajo çka është bërë deri më tani, në krijimin e një baze të mirë legjislative dhe krijimin e kushteve, për një ambient më të favorshëm dhe më të mirë të biznesit. Ajo thotë se është e vetëdijshme për konditat në të cilat gjenden bizneset, duke premtuar se do të punojnë që t'ua bëjnë sa më të lehtë rrugën, për një zhvillim të mëtutjeshëm të tyre.