Mosrealizimi i të ardhurave në buxhetin e shtetit nga administrata fiskale vazhdoi edhe gjatë muajit nëntor. Edhe pse nisi aksioni ndaj informalitetit, ku pritej një reflektim pozitiv, të ardhurat totale të buxhetit arritën 342.4 miliardë lekë, nga 358.4 miliardë lekë të parashikuar për periudhën. Sipas statistikave paraprake të Ministrisë së Financave, të ardhurat tatimore janë 10.5 miliardë lekë më pak se parashikimi, ndërsa ato jo-tatimore janë rreth 3.5 miliardë lekë nën parashikimin. Peshën kryesore të mosrealizimit të të ardhurave tatimore e mbartin të Ardhurat nga Tatimet dhe Doganat, me 10.7 miliardë lekë.