TIRANË- Një ditë pasi 7-vjeçarja Jonada Avdia u përcoll për në banesën e fundit, në dyert e familjes Avdia është shfaqur për ngushëllim Drejtori i Përgjithshëm i Policisë së Shtetit, Gledis Nano. Ai tha se vizita e tij nuk duhet të keqkuptohet, pasi ka shkuar si një prind dhe si një qytetar, teksa falënderoi familjen e cila edhe në këtë ditë tepër të trishtë, mirëpriti ngushëllimet e tij.

“Nuk dua të keqinterpretohet, kam marrë pjesë për t’i shprehur me shumë hidhërim nga shpirti ngushëllimet e mia për humbjen tragjike të fëmijës, kam ardhur si prind e si qytetar dhe falënderoj familjen Avdia e cila i mirëpriti ngushëllimet e mia dhe përveç përgjegjësive se çfarë ka ndodhur, i mirëkuptoj dhe i falënderoj që ngjyrime të caktuara i kanë lënë mënjane dhe janë duke vuajtur të gjithë atë se çfarë ndodhi”, tha Nano.

Pas Nanos, për vizitën në familjen Avdia kanë shkuar edhe ish-kryeministri Sali Berisha dhe më pas ish-presidenti Ilir Meta.

Krimi është një dëshmi e një shteti të mbushur me xhelatë. Nuk është rasti për t’i numëruar me radhë vdekjet në stacionet e policisë, nuk është rastësi, ky xhelat skafist, nuk bëri gjë tjetër veçse imitoi ministrin e tij me skaf. Edi Rama është një vampir politik.’- u shpreh Berisha ndër të tjera. 

Meta e cilësoi se vrasja e 7-vjeçares si një vrasje të paralajmëruar.  

"Ishte një vrasje e paralajmëruar se kanë ndodhur edhe plagosje të tjera dhe askush nuk e ka vënë ujin në zjarr. Të gjithë ministrat përgjegjës për zbatimin e ministrisë duhet të ishin dorëhequr, ose të ishin shkarkuar bashkë me kryetarin e Bashkisë ku ka ndodhur ngjarja”, tha Meta.

Si ndodhi ngjarja? 
Ngjarja e rëndë ndodhi një ditë më parë (2 gusht) në Plazhin e Potamit në Himarë, ku 7-vjeçarja Jonada Avdia, u godit për vdekje nga një gomone, teksa po lahej në det. E mitura u përplas fillimisht nga pjesa ballore e gomones dhe më pas trupi i saj është prerë nga helikat duke ndërruar jetë në vend. Fëmija, me origjinë nga Tropoja jetonte jashtë shtetit me familjen e saj në Angli, por ishte kthyer në atdhe për pushime. Drejtuesi i gomones është shefi i policimit në komunitet në Elbasan, Arjan Tase u shoqërua në polici, ndërsa drejtuesi i Policisë së Shtetit, Gledis Nano e përjashtoi Arjan Tasen përfundimisht nga policia.

Rendit zhvillimet sipas orarit:
Ora 13:13
Meta pas vizitës në familjen Avdia: Vrasja e paralajmëruar! Ministrat përgjegjës dhe kryetari i Bashkisë të shkarkoheshin ose dorëhiqeshin

 

Pas vizitës në familjen Avdia, ish-presidenti Ilir Meta tha se të gjithë ministrat përgjegjës duhet të kishin dhënë dorëheqjen ose të ishin shkarkuar nga kryeministri Edi Rama, së bashku me kreun e Bashkisë së Vlorës. Ai e cilësoi se vrasja e 7-vjeçares si një vrasje të paralajmëruar.

“Është një tragjedi e jashtëzakonshme, tepër tronditëse, për çdo familje shqiptare, për babain që e përjetoi këtë tmerr aq pranë, për vëllanë e vogël, për gjyshin i cili mezi e kishte pritur mbesën që ajo t’i tregonte se kishte mësuar shqipen dhe t’i bënte shqiponjës, është një rast i pangushëllueshëm, edhe pse jam i i presionuar nga karakteri i kësaj familjeje shqiptareje, nuk ka asnjë justifikim nga askush, jo vetëm nga autori i papërgjegjshëm, por edhe nga shteti, nga qeveria e Bashkia se ka një ligj për sigurinë në plazhe që nuk është respektuar në asnjë element të tij, ishte një vrasje e paralajmëruar se kanë ndodhur edhe plagosje të tjera dhe askush nuk e ka vënë ujin në zjarr, dhe në një moment kur duhet të shfaqet pendesa dhe marrja e vendimeve distancimit, na shpallet që jemi të parët në rajon sa i përket sigurisë në plazhe nuk ka tallje dhe fyerje më të madhe për të gjithë popullin shqiptar që e ka përjetuar këtë tragjedi, si një tragjedi të vetme. Ka ligje, por këtu nuk zbatohet se këtu ligjin e bëjnë të fortët, dhe tregohen pamjet e një shteti brutal me disa qytetarë të pambrojtur. Çdo qytetar duhet t’i bashkohet protestës jo vetëm për solidaritetin, por për të parandaluar ngjarje të tilla në të ardhmen, sepse nuk është e para, të gjithë ministrat përgjegjës për zbatimin e ministrisë duhet të ishin dorëhequr, ose të ishin shkarkuar bashkë me kryetarin e Bashkisë ku ka ndodhur ngjarja”, tha Meta.

B.K./Shqiptarja.com

Ora 11:37
Berisha vizitë ngushëllimi në familjen Avdia: Krimi horror u krye nga një njeri i qeverisë

 

Sali Berisha, mëngjesin e sotëm ka kryer një vizitë ngushëllimi në familjen e Avdia, e cila humbi vajzën 7-vjeçare, pasi u godit për vdekje nga një gomone me drejtues Arjan Tasen, teksa po lahej në plazhin e Potamit në Himarë. Sali Berisha tha se ky akt u krye nga një njeri i qeverisë.

‘Unë erdha për të shpreh ngushëllimet më të ndjera të mia të PD-së erdha si qytetar. Për familjen e Jonadës e cila humbi jetën në një krim horror dhe ka tronditur thellë çdo shqiptar çdo njeri, si ngjarje si krim i shëmtuar, duhet të ishe vetëm një individ si ai që e kreu se kurrë nuk mund ndodhte një akt i tillë. Një akt i tillë është jashtë përfytyrimit po të kryhej nga një njeri i thjeshtë. Ky akt u krye nga një njëri i qeverisë, me një mjet monstruoz krimin. Ky akt u krye në distancën më të afër me rërën, në prani që qindra fëmijëve. Krimi është një dëshmi e një shteti të mbushur me xhelatë. Nuk është rasti për t’i numëruar me radhë vdekjet në stacionet e policisë, nuk është rastësi, ky xhelat skafist, nuk bëri gjë tjetër veçse imitoi ministrin e tij me skaf. Edi Rama është një vampir politik.’- u shpreh Berisha.

M.Q./Shqiptarja.com