Nata e 6 e luftës, Kievi i rrethuar! Protesta kundër Putinit në të gjithë Evropën! BE 'Ok' përjashtimit të 7 bankave ruse nga sistemi SWIFT, shpëton vetëm Gazprombank

Mbretëria e Bashkuar ka prezantuar sanksionet e reja që ka ndërmarrë ndaj Rusisë. mësohet se Britania e Madhe nuk do të lejojë anijet ruse në porrtet e saj. Ministrja e Jashtme britanike ka thënë se në bashkëpunim me aleatët do të bëjnë që Putin të humbasë.

Ambasadori rus në OKB, Genadi Gatilov, thotë se nuk ka parë asnjë dëshirë nga ana e Ukrainës për të gjetur një zgjidhje. Gatilov kërkon që të gjendet një zgjidhje legjitime dhe e balancuar e problemeve mes dy vendeve.

"Asnjë dëshirë nga ana e Ukrainës. Rusia mbështet diplomacinë, bazuar në respektin e pozicioneve të të gjitha vendeve, por tani për tani nuk shohim asgjë."-tha ai.

Banka Botërore dhe Fondi Monetar i Zhvillimit mësohet se do të ndihmojnë Ukrainën financiarisht. Sipas BBC, Banka Botërore premtoi se do të japë 3 miliardë dollarë në muajt e ardhshëm, ndërsa javën që vjen do të ndihmojë Ukrainën me 350 milionë dollarë. Ndërkohë, Fondi Monetar Ndërkombëtar, do të shqyrtojë me shpejtësi kërkesën e Ukrainës për financim emergjent. Sipas raportimeve, FMN do të ketë në dispozicion 2.2 miliardë dollarë deri në qershor.

BBC njofton se ka ndaluar transmetimin e programeve të saj në Rusi. ITV gjithashtu bën me dije se kanë marrë vendimin për të ndaluar transmetimet dhe shitjet ndaj rusëve në këtë situatë.

"Mendojmë se është e papërshtatshme të bëjmë biznes me ta në këtë moment."-thotë ITV.

Ndër programet që preken janë 'Dancing with the Stars' dhe dokumentari i fundit 'The Green Planet'.

Shumë sektorë janë distancuar nga Rusia ditët e fundit, përfshirë kompani të mëdha të Hollivudit, që kanë ndaluar publikimin e filmave në Rusi.

Për shkak të nisjes së pushtimit të Ukrainës nga Rusia, disa shtete kanë vendosur kufizime në hapësirën ajrore për avionët rusë. Fotoja tregon situatën për fluturimet ruse, ku thuajse në të gjithë qiellin e Evropës nuk lejohen.

Zëdhënësi i presidencës turke, Ibrahim Kalin, ka përjashtuar mundësinë që bisedimet në Bjellorusi mes delegacioneve të Moskës dhe Kievit të rifillojnë nesër, sepse kërkesat e presidentit rus, Vladimir Putin, janë “joreale”. "Ka shumë mundësi që ata të mos takohen", tha Kalin për CNN turk, "me shumë mundësi do të shtyhet për një ose dy ditë, ne jemi në kontakt me ekipet negociatore". Zëdhënësi i presidentit turk Erdogan shprehu më pas shpresën se Putini do t'i japë fund armiqësive duke kuptuar dëmin ekonomik që lufta po i shkakton Rusisë.

Google ka hequr median shtetërore ruse RT nga mjeti i saj i kërkimit të lajmeve.

“Në këtë krizë të jashtëzakonshme ne po marrim masa të jashtëzakonshme për të ndaluar përhapjen e dezinformatave dhe për të ndërprerë fushatat e dezinformimit në internet”, tha Kent Walker, presidenti i Google për çështjet globale.

Kompania ka kufizuar faqet e lajmeve të financuara nga qeveria ruse nga reklamimi dhe përdorimi i disa veçorive në YouTube, platforma e ndarjes së videove në pronësi të Google.

Zëvendës kryeredaktorja e RT-së, Anna Belkina, tha se masa ishte dëshmi se kompanitë perëndimore janë " tmerruar nga prania e zërit të jashtëm nga frika e humbjes së audiencës së tyre historikisht të robëruar, nëse ajo audiencë ndeshet me një këndvështrim tjetër".

RT dhe Sputnik, një faqe tjetër e financuar nga qeveria, konsiderohen nga Departamenti Amerikan i Shtetit si dy "elementë kritikë në ekosistemin e dezinformimit dhe propagandës së Rusisë".

Mobilizimi i qytetarëve evropianë kundër pushtimit rus të Ukrainës ka vazhduar edhe sot. Nga Londra në Marsejë, duke kaluar nëpër Athinë dhe Milano e në shumë e shumë qytete evropiane, ka dhjetëra demonstrata në mbështetje të popullit ukrainas dhe kundër Putinit.

Apple ka vendosur të ndalojë shitjet e produkteve të saj në Rusi

Një seri shpërthimesh u dëgjuan në një distancë të afërt nga kufijtë e qytetit të Kievit raporton CNN.

Shtëpia e Bardhë ka refuzuar kërkesën e Ukrainës për zonën e ndalim-fluturimit për Rusinë. Kjo sipas SHBA, sepse do të kërkonte përdorimin e forcës ushtarake amerikane për ta zbatuar atë. 

Presidenti amerikan Joe Biden ka zhvilluar një telefonatë me liderin ukrainas Volodymyr Zelensky për pushtimin rus. Të dy udhëheqësit diskutuan sanksionet kundër Rusisë dhe ndihmën ushtarake për Ukrainën, tha Zelensky në një postim në Twitter. Presidenti amerikan shkroi në Tëitter për thirrjen përpara fjalës së tij që do të mbajë në Kapitol në Washington. 

'Sapo fola me Presidentin Zelenskyy për të diskutuar mbështetjen tonë të vazhdueshme për Ukrainën – duke përfshirë ndihmën e sigurisë dhe ndihmën humanitare – pasi ajo po mbrohet nga agresioni rus. Ne do ta mbajmë Rusinë përgjegjëse dhe sanksionet tona tashmë kanë një ndikim shkatërrues.'- shkruan presidenti Biden në Twitter.

Presidenti i SHBA Joe Biden nga ana tjetër u tha gazetarëve përpara fjalimit të tij: se ai do të sigurojë që aleatët e Amerikës të jenë të bashkuar në përgjigjen ndaj pushtimit rus të Ukrainë.

Ish-ministri i Jashtëm rus u bën thirrje diplomatëve të vendit të japin dorëheqjen në shenjë proteste për luftën në Ukrainë

Ish-ministri i Jashtëm rus Andrei Kozyrev u ka bërë thirrje diplomatëve rusë të japin dorëheqjen në shenjë proteste për luftën në Ukrainë.

'U bëj thirrje të gjithë diplomatëve rusë të japin dorëheqjen në shenjë proteste. Të dashur diplomatë rusë, ju jeni profesionistë dhe jo propagandues të lirë. Kur punoja në Ministrinë e Jashtme, isha krenar për kolegët e mi”, shtoi Kozyrev.

"Tani është thjesht e pamundur të mbështetet lufta e përgjakshme vëllavrasëse në Ukrainë."

Kozyrev ishte ministër i Jashtëm nga viti 1991 deri në 1996 nën Presidentin Boris Jelcin.

Sanksionet perëndimore ndaj Rusisë po kanë ndikim të madh në ekonominë ruse, tha të martën ministri gjerman i Financave, teksa grupi i shtatë vendeve më të industrializuara (G7) po shqyrtojnë masa të tjera ndaj Rusisë pas nisjes së pushtimit ndaj Ukrainës. Sanksionet “tashmë kanë pasur një ndikim masiv në tregjet e kapitalit dhe në monedhën”, tha ministri gjerman, Christian Lindner, shteti i të cilit e ka presidencën e G7-s. Ministrat e G7 po takohet për të “këmbyer sugjerime për masat e mëtejme që mund të merren”, tha Lindner, duke shtuar se vendimi për propozimet e paraqitura do të merret në ditët në vijim. Qëllimi i sanksioneve është të “izolohet Rusia politikisht, financiarisht dhe ekonomikisht”, tha Lindner.

Mbretëria e Bashkuar po vendos sanksione ndaj Bjellorusisë për rolin e saj në pushtimin rus të Ukrainës, njoftoi qeveria të martën. Sekretarja e Jashtme Liz Truss tha se sanksionet do të nisin kundër individëve dhe organizatave për shkak të rolit që vendi po luan në pushtimin rus të Ukrainës.

'Regjimi i Lukashenkos ndihmon dhe nxit në mënyrë aktive pushtimin e paligjshëm të Rusisë dhe do të detyrohet të ndjejë pasojat ekonomike për mbështetjen e tij për Putinin." nga Liz Truss

Regjimi i Lukashenkos ndihmon dhe nxit në mënyrë aktive pushtimin e paligjshëm të Rusisë dhe do të detyrohet të ndjejë pasojat ekonomike për mbështetjen e tij për Putinin”.

Turqia nuk ka plane të vendosë sanksione kundër Rusisë me shpresën se do të "mbajë të hapur" kanalin e dialogut me Moskën.

Kështu ka thënë zëdhënësi i presidentit turk, Recep Tayyip Erdogan. "Ne kemi nevojë për një aktor që mund të flasë me Rusinë' - nënvizoi Ibrahim Kalin - 'Kush flet me Rusinë nëse të gjithë prishin urat? Ne nuk po planifikojmë një paketë sanksionesh për ta mbajtur të hapur këtë kanal'.

Ambasadorët e BE-së kanë arritur marrëveshje për listën e bankave ruse që do të përjashtohen nga sistemi Swift. Lista përfshin shtatë banka dhe nuk përfshin Gazprombank, transportuesin kryesor për pagesën e gazit rus. Kjo për arsye se shtetet evropiane do të duhet të paguajnë gazin që marrin nga Rusia.

SWIFT është një platformë e sigurt komunikimi që përdoret nga bankat, ndërmjetësuesit e bankave dhe institucionet financiare që dërgojnë dhe pranojnë informacione, të tilla si udhëzime për transferimin e parave jashtë vendit apo për tregtimin e letrave me vlerë.

Megjithatë, përmes kësaj platforme nuk bëhet transferimi dhe ruajtja e parave.

Shembull, nëse një kompani gjermane blen gaz natyror rus, ajo duhet të paguajë për një produkt të tillë. Ajo mund të transferojë para nga një llogari bankare gjermane në llogarinë e një firme ruse në një bankë në Rusi, duke vendosur numrin e llogarisë së pranuesit të parave dhe kodin SWIFT.

Kompania gjermane më pas dërgon një mesazh nga llogaria e saj gjermane përmes sistemit SWIFT në bankën ruse, duke thënë se transferi i parave po ndodh. Më pas, kur fondet arrijnë në mënyrë elektronike, kompania ruse mund t’i tërheqë ato.

Përdorimi i kodeve të standardizuara për udhëzime të SWIFT-it u mundëson bankave që të bëjnë më shpejt pagesat.

Forcat ruse kanë hyrë në qytetin Kherson në jug të Ukrainës, por Kievi ende kontrollon institucionet kryesore të qytetit. Këtë e ka bërë të ditur gazeta britanike 'The Telegraph' përmes Twitter, duke saktësuar se lajmin e ka dhënë këshilltari i Ministrisë së Brendshme të Ukrainës, Vadym Denysenko.

Shërbimi Shtetëror i Ukrainës për Situatat Emergjente tha se sulmet ruse në kullën televizive të Kievit vranë pesë persona dhe lanë pesë të tjerë të plagosur. 2 prej tyre ishin duke vendosur lule pranë një memoriali në kujtim të holokausti, memorial në Kiev,  

Kryetari i bashkisë së Kievit, Vitali Klitschko ka shpërndarë një video të goditjes së kullës. Klitschko tha se një nënstacion elektrik që furnizonte kullën dhe një dhomë kontrolli në kullë u dëmtuan.

Nord Stream 2, një kompani me bazë në Zvicër, po shqyrton falimentimin. Kompania - e angazhuar në ndërtimin e gazsjellësit midis Rusisë dhe Gjermanisë dhe e goditur rëndë nga sanksionet ndaj Moskës - dhe ka pushuar nga puna punonjësit e saj. Sot, në një intervistë për kanalin e televizionit publik zviceran, Silvia Thalmann, drejtoreshë e Çështjeve Ekonomike, sqaroi: “Nord Stream 2 është në gjendje të falimentuar dhe e gjithë fuqia punëtore prej 106 personash është pushuar nga puna. Kompania duhej të paraqiste bilancin e saj, ose thënë ndryshe, të shpallte falimentimin”.

Pamje të trishta vijnë nga qyteti Kharkiv në Ukrainë pas bombardimeve nga ushtria ruse. Dorca ruse bombarduan me raketa një zonë banimi në Kharkiv, qyteti i dytë më i madh i Ukrainës të hënën, duke vrarë nëntë civilë, përfshirë tre fëmijë dhe plagosur 37 të tjerë.

Nëndetëset bërthamore ruse janë nisur për stërvitje në Detin Barents, ndërsa raketat e lëvizshme janë vendosur me të njëjtin objektiv në rajonin Irkutsk të Siberisë lindore.

Stërvitja u vendos pas urdhrit të Presidentit Vladimir Putin për të alarmuar forcat bërthamore të Rusisë. Flota Veriore Ruse tha se shumë nga nëndetëset bërthamore ishin të përfshira në stërvitje për të "trajnuar manovra në kushte stuhie".

Në Facebook, Shtabi i Përgjithshëm i Forcave të Armatosura të Ukrainës raportoi shkatërrimin e 198 tankeve ruse, 29 avionëve dhe po aq helikopterëve rusë më 1 mars. Por ka edhe shumë automjete të braktisura dhe të marra nga forcat e Kievit. Në këto imazhe të marra në rajonin e qytetit Sumy, në veri të Kharkiv, rusët braktisën të gjitha pajisjet e tyre pranë një fshati dhe u larguan duke krijuar një magazinë të vërtetë.

Ashpërsimi i luftimeve mes Ukrainës dhe Rusisë përgjatë orëve të fundit, ka sjellë reagimin e menjëhershëm të NATO-s. Ministrat e Jashtëm të NATO-s do të mbajnë një takim urgjent këtë të premte për të diskutuar mbi situatën në Ukrainë. Takimi do të zhvillohet në selinë e NATO-s në Bruksel.

Ky është takimi i dytë i Ministrave të Jashtëm të NATO-s, të cilët javën e kaluar vendosën të ndihmojnë me armatime Ukrainën, por mohuan kategorikisht futjen e forcave të armatosura në konflikt.

Presidenti ukrainas Volodymyr Zelensky i ka kërkuar homologut amerikan Joe Biden që të japë një mesazh më të fortë dhe "të dobishëm" në lidhje me pushtimin rus të Ukrainës para qytetarëve amerikane. Zelenski foli në një intervistë ekskluzive me CNN dhe Reuters nga bunkeri në Kiev, në të cilën ai po udhëheq përballjen e ushtrisë së tij me trupat ruse.

"Është shumë serioze... Unë nuk jam në një film," tha Zelensky, një ish-aktor i komedie. "Unë nuk jam ikonë, mendoj se Ukraina është ikonë... Ukraina është zemra e Evropës dhe tani mendoj se Evropa e sheh Ukrainën si diçka' të veçantë' për këtë botë. Kjo është arsyeja pse [bota] nuk mund ta humbasë këtë"

Shërbimet e urgjencës ukrainase thonë se pesë persona u vranë në sulmin rus në kullën televizive në Kiev. Qeveria ukrainase thotë se shpërthimi ishte rezultat i një sulmi nga forcat ruse. Ministria e Brendshme tha se disa pajisje ishin dëmtuar dhe se "kanalet nuk do të funksionojnë për një kohë".

Ministria e Jashtme e Ukrainës tha se sulmi barbarë i Rusisë ndaj një antene televizive, ndodhi pranë një vendi përkujtimor që përkujton viktimat e Babyn Yar. Babyn Yar ishte një nga masakrat më të mëdha të hebrenjve gjatë Holokaustit nazist. Në memoriale kujtohe ata që vdiqën, duke përfshirë një memorial të veçante edhe për fëmijët.

Ka shkuar në mbi 660.000 mijë numri i qytetarëve të larguar nga Ukraina. Sipas OKB-së, kjo shifër do të vijojë të rritet dhe mund të shkojë në rreth 4 milionë.

Refugjatët po kalojnë kufijtë drejt vendeve fqinje në perëndim, duke përfshirë Poloninë, Rumaninë, Sllovakinë, Hungarinë dhe Moldavinë.

Polonia ka pranuar deri më tani mbi 377.000 refugjatë, sipas OKB-së. Qeveria polake thotë se nga 50.000 qytetarë po mbërrijnë çdo ditë. Hungaria dhe Rumania po japin ndihma në para për ushqim dhe veshje..

Republika Çeke ka aktivizuar një plan i cili do të ndihmojë refugjatët të aplikojnë për një lloj të veçantë vize përmes një procedure të thjeshtuar.

Polonia po përgatit gjithashtu një tren mjekësor për të transportuar ukrainasit e plagosur dhe ka hartuar një listë me 1230 spitale për t'i dërguar ata.

OKB-ja thotë se deri në orën 12:30 GMT më 1 mars:

Në Hungari kishin mbërritur 89.561 refugjatë ukrainas

Në Moldavi 56.064

Në Sllovaki 46.868

Në Rumani 38.461

Në Bjellorusi 329

51.797 njerëz kanë lëvizur nga këto vende në të tjera në Evropë.

Refugjatëve u thuhet se nuk kanë nevojë për dokumente për të hyrë në vendet fqinje, por preferohet të kenë pasaportat e tyre të udhëtimit, certifikatat e lindjes së fëmijëve që udhëtojnë me ta dhe dokumentacionin mjekësor.

Megjithatë, shumë njerëz kanë pritur deri në 60 orë për të kaluar në pikat kufitare në Poloni, në mot të ftohtë, në radhë deri në 15 km (10 milje). Ata që hyjnë në Rumani kanë pritur deri në 20 orë.

Shumë prej tyre nuk kanë mundur të hipin në trenat që i çojnë jashtë qyteteve të Ukrainës.

Një ushtar rus është fotografuar në Çernobil. Qyteti ditët e fundit ka qenë skena e një beteje të ashpër mes trupave ruse dhe ushtrisë ukrainase.

Në një kohë kur sulmet e Rusisë në Ukrainë vazhdojnë, mijera demonstrues kanë vërshuar duke protestuar në rrugët e Moskës. Pavarësisht se rrezikojnë të arrestohen nga policia çdo ditë, ato sërish kanë dalë të protestojnë.

Grupi i të drejtave të njeriut OVD-Info që gjurmon arrestimet politike thotë se ka pasur 6,440 ndalime në demonstratat kundër luftës në qytete të ndryshme anembanë vendit. Zëdhënësi i Kremlinit Dmitry Peskov u përpoq të minimizonte shkallën e protestave, duke thënë se ndërsa Putin "dëgjon mendimin e të gjithëve", ai gjithashtu njeh "pjesën e atyre që kanë një këndvështrim të ndryshëm dhe atyre që janë dashamirës ndaj një operacioni kaq të nevojshëm".

Pse Rusia është e dëshpëruar të marrë në kontroll qytetin e Ukrainës, Mariupol?

Mijëra trupa ruse dhe luftëtarë separatistë të mbështetur nga Moska janë përpjekur të pushtojnë qytetin juglindor të Ukrainës, Mariupol për gati një javë.

Forcat ruse, të cilat kanë bombarduar rëndë qytetin port me rreth 500,000 banorë, tani kanë ndërprerë energjinë elektrike për qytetin. Udhëheqësi separatist me bazë në Donetsk, Denis Pushilin, ka thënë se ushtarët e tij po përpiqen të rrethojnë qytetin.

Beteja është ndezur në Mariupol, sepse qyteti ndodhet në pozicionin strategjik kyç në Detin Azov, që ndan forcat ruse në gadishullin e aneksuar të Krimesë dhe trupat separatiste të mbështetura nga Moska në Ukrainën lindore, shkruan BBC.

Rusia është përpjekur të angazhohet në zbarkime të dyfishta të trupave në rajon për ditë me radhë. Nëse Moska pushton Mariupolin, atëherë Putin mund të krijojë një urë tokësore midis forcave të saj në Ukrainën juglindore dhe Krimesë.

Megjithatë më e rëndësishmja është se qyteti është gjithashtu një port i madh. Anijet eksportojnë në këtë qytet grurë në të gjithë botën. Imagjinoni se çfarë përfitimesh do të kishte Rusia nëse do të pushtonte qytetin “thesar” të Ukrainës.

Ushtarët rusë kanë grabitur ushqime në një dyqan në fshatin Bobrovitsa në rajonin e Chernihiv të Ukrainës. Në rrjet po qarkullojnë video nga momenti kur ushtarët futen në dyqan dhe vjedhin ushqime.

Situata me luftën në Ukrainë ka vërë në alarm gjithë Evropën. Britania e Madhe ka qenë një ndër vendet më të shqetësuara për veprimet e Rusisë. Kjo ka vënë në gjendje gatishmërie të gjitha autoritetet atje.

Në një vështrim të thjeshtë në fligh radar shikohen shumë qartë një numër shumë i madh avionësh dhe helikopterësh ushtarakë duke patrulluar të gjithë territorin britanik.

Helikopterët

Avionët luftarakë në fluturim

Rusia ka sulmuar një kullë televizive në kryeqytetin Kiev, ka thënë këshilltari i Ministrisë së Brendshme të Ukrainës. Pamjet tregojnë një shpërthim të fuqishëm në zonë. Më herët, ministria ruse e mbrojtjes paralajmëroi banorët e Kievit se po përgatitej të godiste objektivat në kryeqytet.

Ministri i Jashtëm i Ukrainës Dmytro Kuleba i kërkoi homologut të tij kinez në një telefonatë të martën që të përdorë lidhjet e Pekinit me Moskën për të ndaluar pushtimin ushtarak të Rusisë ndaj fqinjit të saj, tha në një deklaratë ministria e jashtme e Ukrainës.

Sipas deklaratës, Ministri i Jashtëm i Kinës  Wang Yi i tha Kuleba se Pekini ishte i gatshëm të bënte çdo përpjekje për të ndihmuar në përfundimin e luftës përmes diplomacisë. Kina, e cila është afruar më shumë me Moskën vitet e fundit, ndërkohë që ka pasur gjithashtu lidhje të përzemërta diplomatike dhe lidhje të forta tregtare me Ukrainën, ka refuzuar të dënojë sulmin e Rusisë ndaj vendit ose t'i quajë veprimet e saj atje një pushtim.

Telefonata mes të dyve është e para që raportohet që nga sulmi i Rusisë ndaj fqinjit të saj të enjten e kaluar. Ajo u iniciua nga Kuleba, sipas ministrisë së jashtme të Kinës. Ëang përsëriti thirrjen e Kinës për një zgjidhje të krizës përmes negociatave, duke thënë se ajo mbështet të gjitha përpjekjet ndërkombëtare që mund të ndihmojnë në arritjen e një zgjidhjeje politike, tha ministria e jashtme kineze në një deklaratë.

Kryeministri i Mbretërisë së Bashkuar Boris Johnson ka thënë se perëndimi është “gati për një krizë të zgjatur”, ndërsa trupat ukrainase rezistojnë me çdo lloj mjeti kundër forcave ruse.

Moska tani ka vendosur deri në 75% të forcës së saj pushtuese mes luftimeve intensive në të gjithë vendin. Ushtarët ukrainas po mbrohen, ndërsa pretendojnë se kanë vrarë ose plagosur rreth 5710 trupa ruse, megjithatë ende kjo shifër nuk është verifikuar.

Harta! Ku ka sulmuar dhe pushtuar Rusia në këto 6 ditët e luftës?

Trupa ruse kanë arritur të hyjnë në qytetin jugor të Khersonit , ku janë përfshirë në luftime intensive me ato ukrainase. BBC ka verifikuar pamjet e mediave sociale që tregojnë shpërthime në periferinë veriore të qytetit

Në lindje, zyrtarët në qytetin e dytë më të madh dhe të rëndësishëm në Ukrainë, Kharkiv  thonë se të paktën 10 persona janë vrarë në granatimet e qëllimshme të zonave të banuara. Presidenti Volodymyr Zelensky thotë se sulmet e Moskës kundër civilëve përbëjnë krime lufte.

Mariupol , një qytet port në Ukrainën juglindore, i është ndërprerë energjia elektrike dhe forcat ruse po e bombardojnë pa pushim në një përpjekje për të marrë qytetin dhe për të krijuar një urë tokësore midis ushtrive të tyre në rajonet e kontrolluara nga separatistët në lindje dhe Krimenë e aneksuar.

Një autokolonë masive e blinduar ruse po godet kryeqytetin ukrainas të Kievit.

Të martën pasdite, Rusia paralajmëroi se do të kryejë sulme në selinë e shërbimeve të sigurisë dhe qendrën e luftës në Kiev dhe u bëri thirrje vendasve të evakuohen

Në qytetin verilindor të Okhtyrka, deri në 70 ushtarë ukrainas thuhet se janë vrarë në një sulm artilerie ruse.

Franca ka ndarë mbi 100 milionë euro të tjera ndihmë financiare dhe humanitare për Ukrainën. Lajmi u bë me dije nga Ministria e Jashtme franceze në një deklaratë për mediat.

“Përballë situatës në Ukrainë të shkaktuar nga pushtimi i Rusisë dhe në përgjigje të kërkesës së autoriteteve ukrainase, Franca ka vendosur të mobilizojë një paketë financiare prej 100 milionë euro për Ukrainën”, thuhet në deklaratë.

Franca gjithashtu do të ofrojë ndihmë për refugjatët ukrainas në Poloni, thuhet në deklaratë.

Franca ka dërguar tashmë 33 tonë ndihmë urgjente në Ukrainë, e cila përfshin tenda, batanije dhe çanta gjumi, në Ukrainë. Ato iu dorëzuan autoriteteve ukrainase të hënën.

Ministri turk i Mbrojtjes Hulusi Akar i ka kërkuar homologut të tij rus Sergei Shoigu armëpushim të menjëhershëm në Ukrainë për arsye humanitare.

Në një telefonatë, Akar i tha Shoigut se Turqia do të vazhdojë përpjekjet për paqen rajonale dhe dërgesat e ndihmave humanitare, tha ministria në Twitter. Aleati i NATO-s, Turqia kufizohet me Ukrainën dhe Rusinë në Detin e Zi dhe ka lidhje të mira me të dyja.

Të hënën, Turqia tha se u kishte kërkuar të gjitha vendeve që të mos kalonin ngushticat e saj në Detin e Zi sipas një pakti të vitit 1936, duke kufizuar kalimin e disa anijeve luftarake ruse.

Një nga njerëzit më të pasur të Rusisë thotë se lufta në Ukrainë duhet të ndalet sa më shpejt që të jetë e mundur pasi është një "tragjedi" për të dyja palët. Mikhail Fridman tha se nuk mund të komentojë më shumë, pasi mendon se kjo do të ishte e rrezikshme, jo vetëm për të personalisht, por edhe për kolegët dhe stafin e tij.

Një makinë tip Fuoristradë ruse që ka tentuar të hyjë në Kharkiv, qytet i cili u bombardua mëngjesin e sotëm. Në një video tregohet momenti kur qytetarët i kanë hipur sipër makinës për të mos e lejuar të kalojë, ndërsa mjeti ka shtuar gazin duke e shtypur njërin prej tyre.

Ish-presidenti rus Dmitry Medvedev ka kritikuar komentet e ministrit francez të financave Bruno Le Maire, i cili më herët tha se "Franca po bënte një luftë ekonomike kundër Rusisë për pushtimin e saj në Ukrainë"

"Ruajeni gjuhën, zotërinj," shkroi në Tëitter të martën Medvedev, i cili është zëvendëskryetari aktual i Këshillit të Sigurimit të Rusisë . "Mos harroni se në historinë njerëzore, luftërat ekonomike shpesh shndërroheshin në të vërteta."

Më herët të hënën, Le Maire tha se BE do të "fillojnë luftë totale ekonomike dhe financiare kundër Rusisë".

Ministria ruse e mbrojtjes ka lëshuar një paralajmërim për banorët e Kievit se po përgatitet të godasë objektivat në kryeqytetin ukrainas.

Në një deklaratë, zyrtarët rusë thanë se forcat e tyre po përgatiten të nisin "sulme me precizion të lartë" kundër "qendrave teknologjike të Shërbimit të Sigurisë të Ukrainës dhe qendrës së 72-të kryesore PsyOps në Kiev".

“Ne u bëjmë thirrje qytetarëve ukrainas të cilët po përdoren nga nacionalistët për të kryer provokime kundër Rusisë, si dhe banorët e Kievit që banojnë pranë stacioneve të transmetimit të largohen nga shtëpia e tyre”, thuhet në deklaratë.

Zyrtarët pohuan se sulmet po kryhen për të "parandaluar sulmet e informacionit kundër Rusisë".

Ndërsa sirenat bien vazhdimisht në qytetin lindor të Dnipro , qytetartë e Ukrainës i drejtohen nën tokës në një bunker bërthamor të ndërtuar në Luftën e Ftohtë. Dekada më vonë, ajo po strehon qindra njerëz në Ukrainën e sotme ndërsa lufta e Vladimir Putin përshkallëzohet.

Bunkeri fillimisht ishte për punëtorët e fabrikës, por vetë uzina ishte braktisur shumë kohë më parë. Në një shkallë të vetme dhe përtej një dere të trashë metalike, muret janë të suvatuara me postera udhëzues se si të vishni një maskë gazi ose kostum mbrojtës.

Krahas një tabele që përshkruan "mësimet e Çernobilit", vullnetarët kanë grumbulluar biskota, pako çaji dhe konserva rreth një televizori sovjetik.

Kryeministri rus Mikhail Mishustin njoftoi masat e kontrollit të kapitalit për të ndaluar një eksod të bizneseve të huaja nga vendi, raportuan të martën agjencitë shtetërore ruse të lajmeve TASS dhe RIA.

“Për të mundësuar bizneset të marrin vendime të informuara, është përgatitur një projekt-dekret presidencial për të vendosur kufizime të përkohshme në daljen e aseteve ruse. Ne presim që ata që kanë investuar në vendin tonë do të mund të vazhdojnë të punojnë këtu. Jam i sigurt se presioni i sanksioneve përfundimisht do të ulet dhe ata që nuk do të kufizojnë projektet e tyre në vendin tonë, duke iu dorëzuar parullave të politikanëve të huaj, do të fitojnë”, tha kryeministri rus.

Mishustin tha se do të ketë takime të përditshme për të provuar dhe trajtuar ndikimin ekonomik të sanksioneve.

“Është e rëndësishme të monitorohet situata aktuale në kohë reale dhe të merren menjëherë të gjitha masat e nevojshme,” tha ai.

Një peticion në gjuhën ruse Change.org kundër luftës në Ukrainë ka mbledhur më shumë se një milion nënshkrime dhe anëtarët e organizatave ruse. Aktivisti veteran i të drejtave të njeriut Lev Ponomarev nisi një peticion "Jo luftës" që ka mbi 1 milion nënshkrime që nga pasditja e hershme e Moskës të martën.

Një faqe interneti ruse —  https://we-are-not-alone.ru/  — ka grumbulluar peticione të mbi tre duzina organizatave profesionale ruse që përfaqësojnë akademikë, artistë, gazetarë, muzikantë, ekonomistë dhe profesione të tjera.

Qyteti i dytë më i madh në Ukrainë, Kharkiv, është bombarduar ditën e sotme nga forcat ruse, ku shkatërrimi është i madh, ndërsa të paktën 10 viktima dhe 20 të plagosur janë raportuar deri tani. Fotot po shfaqen që tregojnë dëmin e shkaktuar nga sulmi i Rusisë këtë mëngjes në qendër të qytetit

Në foton e mësipërme, mund të shohim shpëtimtarët duke hequr mbeturinat nga godina administrative lokale e goditur. Rreth një duzinë njerëz janë nxjerrë nga rrënojat sipas Shërbimit Shtetëror të Emergjencave të Ukrainës.

Raketat dhe raketat ruse goditën gjithashtu një shtëpi opere dhe sallë koncertesh në sheshin qendror të Lirisë.

Mediat ruse si Ria Novosti ka bërë të ditur se nesër mund të zhvillohet raundi i dytë i bisedimeve Kiev-Moskë

Dje rreth 6 orë zgjatën bisedimet mes palëve në Gomel të Bjellorusisë. Pas diskutimeve palët janë kthyer për konsultime në vendet përkatëse dhe pritet një raund i dytë bisedimesh. Kreu u delegacionit rus ka dhënë sinjale pozitive kur ka deklaruar se pika të rëndësishme të përbashkëta janë gjetur gjatë bisedës që mund të çojnë në rezultate pozitive. 

Presidenti i Ukrainës thotë se sulmet në qytetin lindor të Kharkiv janë terrorizëm shtetëror të kryer nga Rusia.

Duke iu drejtuar Parlamentit Evropian me videokamera, Volodymyr Zelensky e cilësoi sulmin e Rusisë në qendër të Kharkiv një krim lufte dhe një veprim plotësisht të vetëdijshëm.

"Raketat, bombat dhe artilerit, duhet të ndalet menjëherë. Rusia duhet të shkatërrohet ekonomikisht. Ne duhet të tregojmë se njerëzimi është në gjendje të mbrojë veten," thotë ai.

Më herët ai postoi një fotografi ku shfaqej duke nënshkruar një kërkesë për anëtarësimin e Ukrainës në Bashkimin Evropian.

Sekretari i përgjithshëm i NATO-s, Jens Stoltenberg, në një konferencë për shtyp me presidentin polak Andrzej Duda, pas vizitës së tyre në bazën ajrore Lask, i bëri thirrje Rusisë që të ndalojë luftën në Ukrainë dhe t'i rikthehet diplomacisë. Stoltenberg u shpreh se ata do të mbrojnë çdo territor të NATO-s.

“Rusia duhet të ndërpresë armiqësitë, të tërheqë trupat e saj nga Ukraina dhe të përfshihet në negociata me vullnet të mirë. Në këto orë për herë të parë po vendosim forcat e reagimit të NATO-s dhe trupat franceze po mbërrijnë në Rumani. Ne do të mbrojmë çdo territor të NATO-s. Ne jemi një Aleancë mbrojtëse. Ne nuk kërkojmë konflikt me Rusinë. Ata duhet të ndalojnë luftën dhe t'i rikthehen diplomacisë. Lufta e Putinit i prek të gjithë dhe aleatët e NATO-s janë të bashkuar", tha ai.

Italia ka shpallur gjendjen e jashtëzakonshme humanitare deri më 31 dhjetor të këtij viti, si përpjekje për të ndihmuar Ukrainën pas pushtimit nga Rusia. Kryeministri italian, Mario Draghi tha sot në Senat se ky është angazhim solidariteti dhe se nuk do të ketë pasoja për italianët.

"Italia është e gatshme të bëjë më shumë, si përmes organizatave kryesore humanitare aktive në zonë, ashtu edhe me donacione materiale. Në Këshillin e Ministrave të djeshëm ne ndamë 10 milionë euro, nga Fondi Kombëtar i Emergjencave, për të siguruar ndihmë dhe ndihmë për popullsinë ukrainase. Për ta bërë këtë, u shpall gjendja e jashtëzakonshme humanitare, e cila do të zgjasë deri më 31 dhjetor dhe që ka për qëllim të vetëm sigurimin e ndihmës maksimale nga Italia në Ukrainë. Është një angazhim solidariteti, që nuk do të ketë pasoja për italianët dhe që nuk ndryshon vendimin për përfundimin e gjendjes së jashtëzakonshme për Covid-19 më 31 mars”, tha ai.

Shumë delegacione, duke përfshirë Ukrainën dhe disa vende perëndimore, bojkotuan fjalimin e Sergei Lavrov në Konferencën e Çarmatimit të Gjenevës mëngjesin e sotëm duke u larguar nga salla. Diplomatët u ngritën dhe u larguan nga dhoma kur u shfaq video-mesazhi i pararegjistruar i ministrit rus, në shenjë proteste kundër pushtimit të Ukrainës nga Moska.

Lavrov tha në mesazhin e tij se 'regjimi i Kievit po komploton për të zhvilluar arsenalin e tij bërthamor' dhe se ai është një kërcënim për sigurinë ndërkombëtare. “Ne po punojmë për të parandaluar shfaqjen e armëve bërthamore në Ukrainë”, shtoi ai.

Trupa bjelloruse janë tashmë në Ukrainë. “Kyiv Independent” shkruan duke specifikuar se “sipas Parlamentit, trupat bjelloruse kanë hyrë në rajonin ukrainas të Chernihiv për të ndihmuar Rusinë në luftën e saj kundër Ukrainës”.

Kujtojmë se diktatori Alexander Lukashenko tha se nuk do të ndërhynte dhe nuk do të bëhej pjesë e luftës për të ndihmuar Rusinë.

Më të bashkuar se kurrë, me një zë të vetëm qindra qytetarë të Kharkivit kanë kënduar himnin ukrainas përballë tankut rus.

Guximi dhe rezistenca e pandalshme e ukrainasve është vërtet frymëzuese!

Këta janë qytetarë të Kharkiv, vendit ku mëngjesin e sotëm humbën jetën nën bombardimet ruse 9 persona, mes tyre edhe 3 fëmijë.

Njeri pranë tjetrin si një mur, ata në këtë mënyrë janë munduar të pengojnë trupat rusë të kalojnë. Videoja po bën xhiron e rrjetit.

Zyrtarët ushtarakë ukrainas kanë pohuar se 5,710 trupa ruse janë vrarë në pesë ditët e para të luftimeve intensive në vend. Në një video-mesazh të postuar në Facebook, një zëdhënës i shtabit të përgjithshëm të vendit shtoi se mbi 200 ushtarë rusë janë kapur rob nga forcat ukrainase.

Zyrtari pohoi gjithashtu se 198 tanke ruse, 29 avionë, 846 automjete të blinduara dhe 29 helikopterë janë shkatërruar.

Kanalet Youtube-t e mediave më të rëndësishme ruse “ RussiaToday” dhe “Sputnik” janë bllokuar në të gjithë Evropën.

"Për shkak të luftës në Ukrainë, ne po bllokojmë kanalet e YouTube të lidhura me Russia Today dhe Sputnik në të gjithë Evropën, duke hyrë në fuqi menjëherë. Sistemeve tona do të duhet pak kohë për t'u përfunduar. Ekipet vazhdojnë të monitorojnë situatën vazhdimisht për të ndërhyrë me shpejtësi," tha një zyrtar. zëdhënësi i YouTube në Twitter.

Në orët e fundit, Facebook dhe Twitter kanë njoftuar gjithashtu një goditje platformave të mediave të lidhura me shtetin rus, të akuzuar për dezinformim në pushtimin rus të Ukrainës.

Armët e destinuara për në Ukrainë nuk do të kalojnë tranzit nëpër territorin hungarez. Kryeministri Viktor Orban deklaroi: “Kemi vendosur që nuk do të pranojmë këto dërgesa”. Hungaria kufizohet me Ukrainën për 140 kilometra dhe vendimi, shpjegoi kryeministri, lidhet me praninë e mbi 100,000 qytetarëve nga Hungaria në rajonin e Ukrainës perëndimore të Zakarpattia.

"Siguria e tyre do të vihej në rrezik. Është në interes të qytetarëve hungarez që Hungaria të mbetet jashtë kësaj lufte", shtoi ai.

“Ishte qartë një krim lufte”, këto ishin fjalët e presidentit ukrainas Zelensky-t për bombardimin e Kharkivit, ku u vranë dhjetëra civilë.

Nëntë persona, duke përfshirë tre fëmijë, u vranë të hënën pasi bombat shënjestruan ndërtesa banimi në qytetin e dytë më të rëndësishëm, pas Kievit.

Zelensky tha se kishte dëshmi të dëshmitarëve okularë se civilët ishin bombarduar qëllimisht.

"Ishte qartë një krim lufte. Qytet paqësor. Zona banimi paqësore. Nuk ka objekte ushtarake. Dhjetëra të dhëna të dëshmitarëve okularë dëshmojnë se ishte një shkatërrim i qëllimshëm i njerëzve. Rusët e dinin se ku po qëllonin., tha ai.

Unioni Ndërkombëtar i patinazhit (ISU) pezulloi të martën patinatorët rusë dhe bjellorusë nga pjesëmarrja në të gjitha garat ndërkombëtare të patinazhit në akull, pas pushtimit rus të Ukrainës. Ata do të ndalohen të marrin pjesë në kampionatet e ISU dhe ngjarje të tjera.

"Këshilli ISU ripohon solidaritetin e tij të plotë me anëtarët e ISU-së në Ukrainë, Federatën Ukrainase të Patinazhit të Shpejtë dhe Federatën Ukrainase të patinazhit artistik. Këshilli i ISU do të vlerësojë mundësitë për ndihmë të shpejtë humanitare për anëtarët e tij ukrainas të ISU", thuhet në deklaratë.

Të njëjtat rregulla do të zbatohen për "zyrtarët e listuar në Komunikimet dhe/ose rregulloret përkatëse të ISU-së në Rusi dhe Bjellorusi", thuhet në deklaratë.

Organi drejtues tha se pezullimi do të hyjë në fuqi të menjëhershme dhe do të qëndrojë në fuqi deri në një njoftim tjetër.

Yaryna Arieva dhe Sviatoslav Fursin, u martuan nën zhurmën e bombardimeve, ndërsa disa orë më vonë pasi kurorëzuan dashurinë e tyre, morën armët dhe dolën në terren për të luftuar për atdheun e tyre, Ukrainën.

Çifti u fotografua fillimisht në ceremoninë tradicionale të martesës së tyre dhe më pas...vjen kontrasti. Ajo hoqi fustanin e bardhë dhe ai kostumin e zi dhe veshën uniformën ukrainase të luftës për mbrojtur tokën e tyre.

Të veshur me xhaketa kamuflazhi dhe duke mbajtur armë në dorë, çifti në një intervistë për CNN kanë thënë se muajin e tyre të mjaltit po e kalonin duke luftuar kundër trupave ruse që pushtuan atdheun e tyre.

Bjellorusia nuk ka plane t'i bashkohet operacionit ushtarak të Rusisë në Ukrainë. Kështu shkruan agjencia shtetërore bjelloruse e lajmeve Belta, teksa citon presidentin bjellorus, Alexander Lukashenko. Po ashtu Lukashenko mohoi akuzat e Kievit se trupat ruse po sulmonin Ukrainën nga territori i Bjellorusisë.

Komanda operacionale ukrainase konfirmon sulmin e sotëm në mëngjes nga forcat ruse me një raketë të lëshuar kundër selisë së qeverisë rajonale në Kharkiv, qyteti i dytë më i madh në Ukrainë. BBC raporton, duke shtuar se sipas Kievit qëllimi ishte vrasja e guvernatorit të Kharkiv dhe ekipit që drejton mbrojtjen e qytetit me të. Ndërtesa e Administratës Shtetërore Rajonale strehon zyrat e qeverisjes vendore. Ndodhet në "Sheshin e Lirisë" - sheshin kryesor të Kharkiv dhe një pikë referimi arkitekturore. 

Të paktën dhjetë persona u plagosën, duke përfshirë 3 fëmijë, ndërsa janë plagosur 35.  Në një shpërthim në qytetin e dytë më të madh të Ukrainës, Kharkiv, tha Shërbimi Shtetëror i Emergjencave të Ukrainës në një postim në Telegram të martën.

Shpërthimi shkatërroi një ndërtesë qeveritare, sipas videove të incidentit të postuara nga Ministria e Punëve të Jashtme të Ukrainës (MOFA) dhe zyrtarë të qeverisë ukrainase.  

“Rusia po bën luftë në kundërshtim me të drejtën ndërkombëtare humanitare. Vret civilë, shkatërron infrastrukturën civile. Objektivi kryesor i Rusisë janë qytetet e mëdha që tani qëllohen nga raketat e saj”, shkroi Ministria e Punëve të Jashtme të Ukrainës në Twitter të martën, duke shpërndarë një video që tregon atë që duket të jetë një sulm me raketa në ndërtesën e Administratës Shtetërore Rajonale të Kharkiv.

Bombardimi i ndërteses qeveritare në Kharkiv

Afrimi i kolone së madhe të armaturës ruse ka shtuar frikën në Ukrainë, në një kohë ku raportohet se pjesë të tjera të vendit, zona të populluara janë rrethuar nga Rusia, duke përdorur "taktika mesjetare" dhe duke u mohuar atyre ushqimin, ujin dhe furnizimet thelbësore.

Disa raketa ruse kanë bombarduar një lagje banimi në Kharkiv. Kamerat e sigurisë në bllokun e pallateve kanë kapur një seri shpërthimesh në parkimin e zonës. Autoritetet ukrainase thonë se shtatë persona kanë vdekur dhe të paktën 44 të tjerë janë plagosur në luftimet e fundit në qytet

Që në nisje të sulmeve ruse, Kharkiv ishte një nga qytete më të goditura ku janë zhvilluar dhe luftimet më të ashpra, ku forcat ruse kanë kontrollin e zonës.

5 ditë luftë dhe rezistencë për ukrainasit ndaj sulmeve dhe bombardimeve ruse. Banesa, kopshte, shkolla, baza ushtarake dhe shumë objekt të tjera janë shkatërruar plotësisht  nga raketat ruse, ndërsa numri i viktimave dhe të plagosurve rriten gjithnjë e më shumë.

Ukraina vazhdon rezistencën e saj ndaj sulmit rus në natën e 6 të pushtimit. Fotogaleria tregon momentet më të trishta të luftimeve, ku vdekja, frika dhe shkatërrimi shikohet përmes fotove.

Rusia ka ndaluar hyrjen e avionëve të regjistruar në Zvicër në hapësirën e saj ajrore, tha autoriteti federal i aviacionit të vendit, Rosaviatsiya, në një deklaratë të martën.

Lëvizja ishte në hakmarrje për një lëvizje të ngjashme nga Zvicra, thuhet në deklaratë.

Zvicra hoqi dorë nga angazhimi i saj ndaj "neutralitetit zviceran" në favor të miratimit të sanksioneve kundër Rusisë, tha të hënën presidenti zviceran Ignazio Cassis, duke shtuar se masat e Bernës do të jenë në përputhje me ato të miratuara tashmë nga Bashkimi Evropian.

Sanksionet përfshijnë mbylljen e hapësirës ajrore zvicerane për të gjitha fluturimet nga Rusia, duke përfshirë avionët privatë, me përjashtim të fluturimeve humanitare, fluturimeve kërkimore dhe situatave emergjente.

Më 28 shtator 2021, Sherif Tiraspol u shfaq papritur në hartën gjeografike të futbollit. Skuadra me qendër në Tiraspol, kryeqyteti i Transnistrisë, shtet i pa njohur nga OKB dhe pjesë përbërëse e Moldavisë, fitonte ndaj Real Madrid në Champions League.

Vetëm disa muaj më vonë, trajneri Yuriy Vernydub, është rikthyer për t’i bërë njerëzit të flasin sërish. Tekniku 56-vjeçar, me origjinë nga Zytomyr (150 km nga Kievi), la Moldavinë për të përqafuar pushkën dhe për të mbrojtur Ukrainën e tij, ku banon një pjesë e familjes së tij.

Një zgjedhje e guximshme, e cila lidhet me iniciativat e sportistëve të tjerë ukrainas, të etur për të dalë në fushë për një kauzë më të lartë.

Yuriy Vernydub (në mes) me uniformë ushtarake

Janë shfaqur imazhe të dhimbshme të disa fëmijëve në Ukrainë, prej të cilëve disa  pacientë me kancer, që po trajtohen në bodrumin e një spitali në Kiev. Bodrumi duhej të shndërrohej në një strehë të improvizuar për bomba dhe departament pediatrik, në mënyrë që të shmangeshin granatimet nga forcat ushtarake ruse.

Zyrtarët ukrainas sapo kanë konfirmuar se të paktën 70 ushtarë u vranë në një sulm artilerie ruse në bazën e tyre ushtarake të dielën.

Sulmi ndodhi në Okhtyrka, në rajonin Sumy, i cili aktualisht është nën rrethim nga forcat ruse.

Parlamenti i Ukrainës sapo ka postuar në Twitter një homazh për ushtarakët, duke thënë "Lavdi e përjetshme për heronjtë e Ukrainës". Parlamenti tha se ata u vranë nga raketat.

Kievi është nën një sulm "pa ndalim" nga trupat ruse. Kryetari i bashkisë së kryeqytetit ukrainas, Vitali Klitschko, tha se qyteti mund të rezistojë "për një kohë të gjatë".

Zyrtarët ukrainas thonë se trupat ruse kanë filluar një sulm në Kherson, një qytet në jug midis Mykolaiv dhe New Kakhovka.

"Sipas dëshmitarëve okularë, armiku po përparon nga aeroporti në autostradën Nikolaev dhe një unazë pranë fabrikës së magazinimit të ftohtë", njoftoi Shërbimi Shtetëror i Ukrainës për Komunikime Speciale dhe Mbrojtjen e Informacionit në kanalin e tij Telegram në orën e kaluar.

Më herët, BBC Ukraine raportoi se shpërthime të fuqishme janë dëgjuar pranë aeroportit Kherson.

Administrata shtetërore rajonale e Kherson shkroi gjithashtu në Facebook se qyteti është i rrethuar nga trupat ruse, por nuk është kapur.

Ministri i Jashtëm ukrainas, Dmytro Kuleba, ka shkruar pak më parë se Sekretari i Shtetit i Shteteve të Bashkuara të Amerikës, Antony Blinken, i kishte ofruar vendit të tij, i cili është nën sulm nga Rusia, më shumë mbështetje në formën e sanksioneve dhe armëve. Kuleba dhe Blinken patën një bisedë telefonike. 

"Unë theksova se Ukraina dëshiron paqen, por për sa kohë që ne jemi nën sulmin e Rusisë, ne kemi nevojë për më shumë sanksione dhe armë. Sekretari më siguroi për të dyja. Ne koordinuam hapat e mëtejshëm", tha ai.

 “Rusia përdori një armë të ndaluar termobarike gjatë luftimeve në Ukrainë të hënën” u tha ambasadorja e Ukrainës në SHBA ligjvënësve amerikanë dhe mediave, në një konferencë.

“Ata përdorën bombën me vakum sot, e cila në fakt është e ndaluar nga konventa e Gjenevës,” u tha Oksana Markarova, gazetarëve pasi doli nga konferenca e kongresit, raporton BBC ndërkohë që thekson se ky pretendim nuk është verifikuar ende, shkruan Gazeta Online Reporteri.net.

E pyetur se çfarë mund të bëjnë më shumë Shtetet e Bashkuara, Markarova theksoi nevojën e Ukrainës për më shumë armë dhe vazhdimin e sanksioneve kundër Rusisë.

“Ne punojmë në mënyrë aktive me administratën, Presidentin dhe gjithashtu me Kongresin për të marrë më shumë armë, kështu që ne kemi nevojë për më shumë armë,” u tha ajo gazetarëve.

Armët termobarike nuk përdorin municion konvencional. Ato janë të mbushura me një eksploziv me presion të lartë dhe thithin oksigjen nga mjedisi përreth për të gjeneruar një shpërthim jashtëzakonisht të fuqishëm dhe valë presioni. Përdorimi i tyre është parë edhe më parë në republikën ruse të Çeçenisë, sipas Human Rights Watch. Të shtunën u raportuaa se një raketë termobarike ishte parë në afërsi të qytetit rus të Belgorod.

Firma shtetërore e naftës dhe gazit algjeriane është gati të furnizojë BE-në me gaz shtesë nga teprica e saj, ka thënë shefi i kompanisë.

Kjo është në rast të rënies së furnizimit me gaz për shkak të pushtimit rus të Ukrainës. CEO i Sonatrach, Toufik Hakkar tha se kapaciteti i paplotësuar në tubacionin Transmed që lidh Algjerinë me Italinë mund të përdoret për të rritur furnizimin.

Gazi algjerian përbën rreth 11% të importeve të gazit në Evropë.

Shtetet e Bashkuara kishin kontaktuar Algjerinë dhe vendet e tjera për alternativa të furnizimit me gaz në rast se pushtimi rus do të çonte në furnizime të ulëta në Evropë.

Imazhet e sapo publikuara nga kompania satelitore Maxar Technologies tregojnë kolonën ruse 65 km  të gjatë që po shtyn drejt Kievit.

Fotot tregojnë kolonën pranë qytetit të Ivankiv, në veri të kryeqytetit ukrainas, sipas Maxar.

Autoritetet turke kanë mbyllur ngushticën e Bosforit dhe të Dardaneleve për të gjitha anijet ushtarake. Vendimi i Turqisë bazohet në Konventën e Montreux të vitit 1936, sipas së cilët ajo Turqia ka kontroll mbi dy ngushticat që lidhin Detin e Zi, i cili ndodhet në bregun jugor të Ukrainës, me Mesdheun.

Konventa garanton kalimin e lirë të anijeve që i përkasin vendeve të Detit të Zi, përfshirë këtu dhe Rusinë, në kohë paqeje, por i lejon Turqisë të mbyllë ngushticat për të gjitha anijet luftarake të huaja në kohë lufte ose nëse ajo vetë kërcënohet. Të paktën katër anije ruse po prisnin vendimin e Turqisë për të kaluar nga Deti Mesdhe.

Ministri i Jashtëm turk Mevlut Çavusoglu foli sot mbi vendimin, duke thënë: “Ne zbatuam atë që thotë Montreux dhe do ta bëjmë tani e tutje”.

Ky vendim i jep një goditje të rëndë Rusisë në luftën që ajo po zhvillon në Ukrainë. Bëhet me dije se

Shpërthime të fuqishme janë dëgjuar në Kherson, në jug të Ukrainës. Ata besohet se vinin nga afër aeroportit.

Një qytet port që shtrihet në lumin Dnieper, Kherson është vetëm në veri të gadishullit të Krimesë.

Të dielën, Moska tha se forcat e saj kishin "bllokuar plotësisht" qytetin.

Ka pasur të paktën 406 viktima civile të raportuara në Ukrainë, duke përfshirë të paktën 102 të vrarë vetëm gjatë ditëve të fundit, tha të hënën nënsekretari i përgjithshëm i Kombeve të Bashkuara për Çështjet Humanitare dhe Koordinatori i Ndihmës Emergjente Martin Griffiths, duke cituar numra nga Zyra e Komisioneri i Lartë i OKB-së për të Drejtat e Njeriut.

Griffiths iu drejtua Këshillit të Sigurimit të OKB-së përmes telekonferencës nga Gjeneva të hënën, duke shtuar se numri real i viktimave civile “mund të jetë dukshëm më i lartë, pasi shumë viktima të raportuara ende nuk janë konfirmuar”.

“Fotografia është e zymtë – dhe mund të përkeqësohet akoma. Sulmet ajrore dhe luftimet në zonat urbane po dëmtojnë objektet kritike civile dhe po prishin shërbimet thelbësore si shëndeti, energjia elektrike, uji dhe kanalizimet, gjë që në fakt i lë civilët pa bazat për jetën e përditshme”, tha Griffiths.

Përpjekjet humanitare në terren: Aktualisht janë 119 organizata humanitare që veprojnë në Ukrainë, megjithëse kapaciteti i tyre për të ofruar ndihmë ka qenë i kufizuar për shkak të veprimeve ushtarake, sipas Griffiths. Ai gjithashtu bëri thirrje për “garanci nga palët në konflikt se punëtorët dhe lëvizjet humanitare do të mbrohen edhe gjatë ditëve më të rënda të konfliktit dhe nuk do të presin që konflikti të qetësohet”.

Ndërsa për momentin janë 520,000 refugjatë nga Ukraina në vendet fqinje. Kjo shifër është rritur "në mënyrë eksponenciale, orë pas ore. Kjo sipas OKB. Filippo Grandi, Komisioneri i Lartë i Kombeve të Bashkuara për Refugjatët (UNHCR), nëpërmjet telekonferencës nga Gjeneva, tha në Këshillin e Sigurimit se ai ka punuar në krizat e refugjatëve për gati 40 vjet dhe “rrallë ka parë një eksod kaq të shpejtë në rritje të njerëzve – më i madhi, sigurisht, brenda Evropës, që nga luftërat ballkanike. ”

“Mbi 280,000 kanë ikur në Poloni. 94,000 të tjerë në Hungari, afro 40,000 janë aktualisht në Moldavi; 34,000 në Rumani, 30,000 në Sllovaki; dhjetëra mijëra në vende të tjera evropiane. Ne jemi gjithashtu të vetëdijshëm se një numër i konsiderueshëm ka shkuar në Federatën Ruse”, tha Grandi.

Ambasadori i Ukrainës në Organizatën e Kombeve të Bashkuara Sergiy Kyslytsya ka bërë një deklaratë të fortë gjatë mbledhjes së kësaj të hëne. Gjatë fjalimit të tij, Sergiy Kyslytsya tha se ai mund të vrasë veten ashtu si Adolf Hitleri në maj të vitit 1945 në bunkerin e tij në Berlin të Gjermanisë. Ndërsa shtoi se nuk ka nevojë për armët bërthamore.

"Do të luftojmë deri në fund për të mbrojtur territorin". Ky ka qenë premtimi i  Presidentit të Ukrainës, Volodimir Zelinksy në një postim në Facebook pak më parë.

Ai ka publikuar një videon në rrjetin social në Facebook,  krah së cilës shkruan se ukrainasit do të luftojnë deri në fund për të mbrojtur tokat e tyre.

Rusia ka kryer 56 sulme raketore kundër Ukrainës në 5 ditët e fundit. Këtë e tha presidenti ukrainas Volodymyr Zelensky, duke shpjeguar se Rusia ka lëshuar 113 raketa lundrimi që nga fillimi i konfliktit.

Në përgjigje të "bombardimeve", Zelensky tha se ka ardhur koha për të konsideruar një zonë të ndaluar fluturimi për raketat, avionët dhe helikopterët rusë. Një kërkesë e nënkuptuar për të vepruar për vendet perëndimore.

Presidenti ukrainas Volodymyr Zelensky nënshkroi një urdhër ekzekutiv që prezanton një sistem të përkohshëm të heqjes së vizave për të huajt që dëshirojnë të bashkohen me Legjionin Ndërkombëtar për Mbrojtjen Territoriale të Ukrainës duke filluar nga 1 marsi 2022.

Urdhëresa e 28 shkurtit 2022 u postua në faqen e internetit presidenciale. Urdhri do të jetë në fuqi "gjatë periudhës së gjendjes ushtarake".

Presidenti ukrainas Volodymyr Zelensky ka akuzuar Rusinë për krime lufte në luftëtarët e Kharkiv.

"Sot forcat ruse sulmuan brutalisht Kharkivin me predha artilerie. Ishte qartë një krim lufte," tha Zelensky. "Kharkovi është një qytet paqësor, ka zona banimi, nuk ka struktura ushtarake.

Dhjetëra rrëfime të dëshmitarëve okularë tregojnë se nuk është një breshëri e vetme, por e shkatërrimit të qëllimshëm të njerëzve: rusët e dinin se ku po qëllonin," denoncoi ai. "Patjetër që do të ketë një gjykatë ndërkombëtare për këtë krim - është një shkelje e të gjitha konventave. Askush në botë nuk do t'ju falë për vrasjen e popullit paqësor ukrainas," shtoi ai.