Kanye West elektrizon Tiranën! Mijëra të rinj mbushin ‘Eagle Stadium’! Të huajt: Tirana na pëlqeu, do vijmë sërish (VIDEO)

Mijëra admirues ndoqën koncertin e artistit amerikan Kanye West në një atmosferë të paharrueshme, mbrëmjen e kësaj të shtune në “Eagle Stadium” në kryeqytet. I parashikuar për në orën 20.00 eventi historik nisi një orë me vonesë, derisa të gjithë pjesëmarrësit kaluan elementët e sigurisë për të hyrë në stadium.

Prej orës 17:00 dashamirës të muzikës së tij që kishin blerë bileta, u grumbulluan rreth stadiumit.

Shumica prej tyre, të cilët Report Tv i intervistoi, ishin të huaj. Teksa mes emocionesh prisnin nisjen e koncertit, ata vlerësuan jo vetëm këngëtarin, si një nga më të mëdhenjtë e muzikës botërore, por u shprehen se Tirana u ka lënë mbresa dhe se do të ktheheshin ta vizitonin.

“Nuk e prisja që do të më pëlqente kaq shumë. Nuk do të jetë hera e fundit që vij këtu. Me siguri do të rikthehem sërish. E dëgjoj Kanye-n që kur isha i ri, kështu që të jem këtu është si një ëndërr e madhe për mua. Jam plotësisht gati”, tha një i ri nga Greqia.

"Kemi ardhur nga Tepelena për koncertin, por jetojmë në Irlandë.  Më pëlqen Kanye West, presim një atmosferë të mirë nga koncerti", tha një vajzë.

"Lexova për koncertin, ndaj vendosa ta shfrytëzoj mundësinë dhe arrita të siguroj disa bileta. Kështu që ja ku jam. Pres shumë gjëra, sepse ai është një nga muzikantët më të mëdhenj të të gjitha kohërave", tha një tjetër nga Suedia.

“Jemi nga Polonia dhe kjo është hera jonë e parë në Shqipëri. Po, kemi ardhur për të parë Kanye Ëest. Kemi dy ditë që jemi këtu, por do të qëndrojmë gjithsej pesë ditë. Pres të krijoj një kujtim që do të më mbetet për gjithë jetën”, tha turisti.

“Jemi nga Greqia, Shqipëria është mahnitëse. E duam Shqipërinë", tha një grup të rinjsh.

Më pas momenti i shumëpritur. Një atmosferë e admirueshme në skenën e posaçme me të njëjtën strukturë që përdor gjithnjë artisti në turet botërore.

“Eagle Stadium”, me kapacitet prej 60 mijë vendesh u ndërtua posaçërisht në kilometrin e parë të autostradës Tiranë-Durrës.

Për të shkuar atje u vunë në dispozicion autobusë të dedikuar. Shërbime ofruan edhe linjat e transportit publik.

Të premten, reperi bëri provat gjenerale, ndërsa gjatë qëndrimit të shkurtër në Tiranë, u prit edhe nga kryeministri Edi Rama.

Rama i tregoi artistit amerikan ambientet e zyrës së tij, sallën e hartave si dhe pikturat. Kreu i qeverisë bashkë me Kanye West shkrepën edhe një foto me librin e shumëdebatuar 'The Albanian Files'.

Koncerti u mbajt mes polemikash, pasi për të shmangur anulimin e tij, qeveria disbursoi mbi 4 milionë euro nga buxheti.

Rendit zhvillimet sipas orarit:

Të Fundit Të Parat