Nesër Kuvendi pa deputetët e përjashtuar të PD, Opozita vijon aksionin, Bardhi: S'i nënshtrohemi aktit antikushtetues! Do të votohet raporti i KLSH-së

Tirane- Kuvendi do të mblidhet nesër në seancë parlamentare. Seanca është caktuar të mbahet në orën 10:00 ndërkohë deputetët e PD-së kanë deklaruar se do të vijojnë aksionin opozitar atë të 'mosbindjes civile'.

Kryetari i grupit parlamentar të Partisë Demokratike, Gazment Bardhi deklaroi sot se, aksioni opozitar do të vijojë, ndërsa siguroi se nesër deputetët e përjashtuar të opozitës do të shkojnë në seancë.

Në një prononcim për mediet pas mbledhjes së grupit parlamentar të Partisë Demokratike, Bardhi u shpreh mesditën e sotme se, “PD e konsideron veprimin e mazhorancës ndaj deputetëve të opozitës si akt provokimi të papranueshëm dhe sigurisht askush nga deputetët tanë nuk mund t’i nënshtrohet vendimeve personale në një shtet që Edi Rama e ka shndërruar në shtet personal”.

“Të dënosh deputetët pa ligj, të përjashtosh gjysmën e grupit parlamentar të opozitës nga Kuvendi. T’ i detyrosh ata që praktikisht në 2 muaj të mos kenë mundësi për të ushtruar mandatin e tyre është një akt antikushtetues të cilit ne kemi vendosur të mos i nënshtrohemi dhe pa diskutim që nesër të gjithë do të jemi në seancë plenare”

LEXO EDHE:
Protesta e opozitës, Veliaj: Ata që vandalizuan mbrëmë Tiranën nuk janë demokratët e vërtetë! Saliu nuk është arsye e fortë për të përçarë qytetin

“Padyshim që Edi Rama mund të na vërë përballë ushtrinë, policinë, siç ja ka vënë në fakt çdo qytetari që nuk i nënshtrohet urdhrave arbitrare antiligjore të kësaj mazhorance, mund t’ia vendosë edhe deputetëve të opozitës”, theksoi Bardhi.

24 deputetë u përjashtuan nga akviteti parlamentar për një periudhë 40 ditore deri në 2 muaj pas seancës plenare të 30 shtatorit. 

Seanca plenare
Parlamenti ka bërë publike rendin e ditës, ku ndër të tjera do të hidhet për votim dhe raporti për veprimtarinë vjetore të KLSH-së për vitin 2023. Pritet të jetë dhe interpelanca me ministren e Turizmit Mirela Kumbaro kërkuar nga deputeti Agron Shehaj. Do të hidhet për votim edhe Violanda Theodhori që u zgjodh me short si anëtare e re në Këshillin e Lartë Gjyqësor nga radhët e shoqërisë civile, ndërsa gara për Këshillin e Lartë të Prokurorisë futet në një procedurë formale me vetëm një kandidat, Erjon Fejzullën.

S.G/Shqiptarja.com

TAG:
• PD kaos ne kuvend