Nesër rifillon mësimi pas festave, ja ku do të shkojnë fëmijët që dolën nga hotelet

Në datë 3 janar ishte vendosur që banorët e prekur nga tërmeti që janë strehuar në hotele të dilnin për t'u zhvendosur në banesat me qira të subvencionuara nga vetë shteti. Por duke qenë se një pjesë e banorëve nuk po gjenin shtëpi me qira dhe të tjerë u ankuan për bonusin e miratuar që është shumë i vogël, pasi çmimet janë rritur, autoritetet lokale dhe qendrore vendosën që të shtyjnë afatin e daljes nga hotelet, por jo për të gjithë.

Në Durrës, bashkia sqaroi se 480 familjet që kanë qenë në banesa me qira kur ra tërmeti i 26 nëntorit, duhet të dalin nga hotelet që janë vendosur. Gjithashtu, po sipas bashkisë edhe 25 familje që aktualisht janë në hotel, por që kanë përfituar bonusin duhet të largohen. Ndërkohë që familjet që u është shembur shtëpia apo është bërë e pabanueshme, por që janë në proces të marrjes së bonusit të qirasë do të vijojnë që të qëndrojnë në hotelet e Durrësit deri në një urdhër të dytë.

Përballë kësaj situate, ku disa prej familjeve duhet të largohen dhe të tjerat janë në proces, pyetja që lind është se si do të veprohet me fëmijët që për të mos humbur orët, mësimin në dhjetor e bënë në shkollat e përkohshme në hotelet që janë vendosur. Burime për Shqiptarja.com nga ministria e Arsimit, pohuan se të gjithë fëmijët që janë larguar nga hotelet dhe shkollën e tyre e kanë të dëmtuar nga tërmeti, mësimin do ta vijojnë në shkollat më të afërta. Ndërsa për të tjerët që do të vijojnë që të qëndrojnë në hotele, gjithcka do të vijojë si përpara Vitit të Ri me shkollat e përkohshme që janë ngritur në strukturat që janë akomoduar.

TAG:
• termet me viktima ne Shqiperi