Nesër seanca për ndryshimet kushtetuese në Maqedoninë e Veriut, qeveria kërkon mbështetje nga deputetët

Kuvendi i Maqedonisë do të mbajë ditën e nesërme (18 korrik) seancën plenare për ndryshimet kushtetuese. Para seancës, kryeministri Dimitar Kovaçevski theksoi se shumica prej dy të tretave nuk i duhet Qeverisë, por përmes ndryshimeve kushtetuese do bëhen më shpejt pjesë e Bashkimit Europian.

Sipas tij, nuk ka pasur vërejtje thelbësore nga opinioni dhe opozita lidhur me tekstin e ndryshimeve kushtetuese, sepse, siç thotë ai, nuk cenohet identiteti maqedonas.

“Debati dhjetë ditor në Kuvend është mundësi e mirë që qytetarët edhe një herë të sigurohen se është proces, që është realizimi i qëllimit të dytë strategjik, pas anëtarësimit të vendit tonë në NATO, dhe sa më shpejt ta kryejnë këtë proces, aq më shpejt do të bëhemi anëtarë të BE-së”, tha Dimitar Kovaçevski – Kryeministër.

LEXO EDHE:
Rama thumbon Kurtin? Ndërhyrjet në Maqedoni synojnë destabilizim! Lufta për pushtet dobëson dhe përçan faktorin politik shqiptar

Kovaçevski shtoi se këtë herë ekziston mundësia që vetoja për anëtarësim në Bashkimin Evropian të vijë nga vendi, e jo nga ndonjë shtet tjetër. Kryeministri akuzoi se opozita po përhap histeri për gjoja bullgarizim, por pasi dështoi, filloi të përdorë termin “diktati bullgar”.

“Kjo është më e reja tani – diktati bullgar. Ata vijnë nga Bashkimi Evropian dhe thonë – ky nuk është propozim bullgar, ky është propozim i BE-së. SHBA thotë gjithashtu se ky është propozim i BE-së. Dikur thanë se do të ndryshonin kornizën negociuese, por nuk e thonë më këtë”, Dimitar Kovaçevski – Kryeministër.

Përkundër tentimit të kryeministrit për të ndryshuar mendje, nga VMRO-DPMNE theksuan sërish se nuk e ndryshojnë qëndrimin e tyre.

“Kovaçevski nuk ka deputetë për të ndryshuar Kushtetutën, le të përgatitet për largim të shpejtë. Po të kishte Kovaçevski deputetë për ndryshimet kushtetuese, do t’i kishte votuar shumë kohë më parë. Nesër do të shihet sërish se nuk do të ketë asnjë ndryshim të Kushtetutës. Gjithçka që po bën Kovaçevski është duke mbajtur peng shtetin për shkak të dëshirës së tij për të qëndruar në pushtet edhe një ditë,” – VMRO-DPMNE.

Ndërkohë letër deputetëve sot u ka dërguar edhe shefi i diplomacisë Bujar Osmani. Ai theksoi se nga vendimi i tyre do të varet nëse vendi do t’i vazhdojë negociatat apo do t’i ndërpresë ato për një periudhë më të gjatë pa garanci për sukses.

Ndryshimet në kushtetutë duhet të bëhen për përfshirjen e pakicës bullgare në preambulën e saj, si popull shtetformues dhe bazohen në atë që njihet si “propozim francez” për zgjidhjen e mosmarrëveshjeve të Maqedonisë së Veriut me Bullgarinë.

Në rast se kjo nuk ndodh, atëherë Sofja mban të drejtën e përdorimit të vetos, apo bllokimit të bisedimeve, ashtu siç bëri edhe në vitin 2020.

Opozita maqedonase është kundër ndryshimeve, pasi sipas saj, “pala bullgare nuk do të ndalet me kushtëzimet e saj edhe sikur të miratohen këto ndryshime”.

SI.E./Shqiptarja.com

TAG:
• Maqedoni e Veriut
• Dimitar Kovaçevski