Shkelën kufizimin, gjobiten 165 kalimtarë! Bllokohen 17 makina në Vlorë! E gjithë Shkodra në xhiro... Grumbuj njerëzish bashkë si në ditë festash, pa ruajtur distancën (VIDEO)

Policia e Shkodrës ka vijuar edhe ditën e sotme me kontrollin e personave të vetëkarantinuar dhe qytetarëve që kanë shkelur urdhrat e Ministrisë së Shëndetësisë për ndalim qarkullimi, lëvizjet në grup apo edhe personave që kanë ardhur nga jashtë dhe duhet të jenë në vetëkarantinë.

Policia ka kryer 255 rikontrolle të personave që janë të vetëkarantinuar për 14 dite, nga të cilët 54 janë konstatuar fizikisht, ndërsa 210 nëpërmjet telefonit. Janë mbajtur disa akte konstatimi ndaj shtetasve që kanë shkelur aktet normative dhe urdhrat e Ministrisë së Shëndetësisë, të cilët do kalojnë në komisionet përkatëse për sanksionim.

Policia thekson se lëvizja e qytetarëve është ulur ndjeshëm këto ditë, ndërsa situata vijon e qetë.

Në lidhje me verifikimin e rasteve të familjeve në nevojë me pako ushqimore, asistencën telefonike të pensionisteve për marrjen e pensionit si dhe është kërkuar përjashtimi nga detyrimet vendore dhe kamatëvonesat.

Edhe qytetarët e Beratit pas mbarimit të afatit për të lëvizur në orën 18:00 janë futur të gjithë në shtëpi.

Qytetarët e Elbasanit pas kanë respektuar 120 minutat për të dalë për të marrë ajër dhe më pas në orën 18:00 janë futur në shtëpi duke respektuar urdhrin për vetëkarantinim.

Tirana është mes qyteteve që e kanë respektuar deri diku urdhrin e dhënë nga qeveria përsa i përket lëvizjes së personave në oraret e përcaktuara, si dhe duke evituar qarkullimin në grup. Qytetarët kanë dalë nga shtëpia në orën 16:00, kanë vijuar të qëndrojnë jashtë për 2 orë, ndërsa ora 18:00 i gjeti të gjithë brenda.

Mirëpo, ajo çka lë për të dëshiruar tek kryeqytetasit është arsyeja e lëvizjes së tyre. Nëse shohim me kujdes videon e mësipërme, pavarësisht se lëvizin të vetëm duke ruajtur distancën, ndërmjet qytetarëve të ndërgjegjshëm ka edhe nga ata që “lejekalimin” për dy orët e pasditës të dhënë nga qeveria e kanë shfrytëzuar për lëvizje të kota, pa ndonjë objektiv të caktuar, por thjesht për të bërë një xhiro me biçiklet nga sheshi “Nënë Tereza”, për të shijuar rrezet e diellit, shëtitur kafshët nga liqeni apo edhe aktivitet fizik (vrap, ecje te lirë).

Ndërkaq, të shumtë janë edhe qytetarët të cilët kanë vendosur që në dy orarshin e pasdites, të dalin për të bërë blerje të caktuara për përmbushjen e nevojave të tyre, apo punë të tjera të rëndësishme. (Shfletoni për më tepër foto-galerinë e më poshtme).

Edhe fierakët nuk e kanë kuptuar ashtu siç duhet orarin e përcaktuar për lëvizjen e lirë të këmbësoreve. Sapo ora ka shënuar 16:00 në rrugë kanë vërshuar qytetarë e makina, duke “shpëtuar” nga karantina e vendosur, por me shkelje të rregullave.

Qytetarët kanë shëtitur në bulevardin kryesor dhe jo vetëm, ndërsa nuk kanë munguar as xhirot me biçikleta. Për vendosje maskash as që nuk bëhet fjalë, duke neglizhuar në këtë mënyrë rëndësinë e situatës së emergjencës shëndetësore dhe shijuar një pasdite normale pranvere.

Moskokëçarës dhe të pashqetësuar, duke u sjellë njëlloj sikur virusi vdekjeprurës COVID-19  të mos ekzistonte për ato dy orë, shkodranët vendosën të thyejnë rregullat e qeverisë, teksa kanë shfrytëzuar orarin 16:00-18:00 pasdite për të dalë nga shtëpia  për shëtitje tek pedonalja dhe ura e Bunës.

Sikurse shihet edhe në videot e mësipërme, situata në Shkodër është sikur nuk ka ndodhur asgjë... Grumbuj njerëzish që lëvizin të gjithë bashkë në turmë njëlloj si në ditë festash, të mërzitur nga të qëndruarit brenda, mesa duket i kanë marrë masat e reja shtrënguese të qeverisë  për parandalimin e përhapjes së koronavirusit si një sfidë me vete.  

13 lokale që hapën dyert e biznesit duke thyer urdhrin janë gjobitur. Policia njofton se gjatë kontrolleve u konstatuan dhe u ndëshkuan me masë administrative gjobë me nga 100 mijë lekë secili, 13 administratorë lokalesh, konkretisht: 6 në qarkun Tiranë , 3 në qarkun Durrës, 2 në qarkun Shkodër, 1 në qarkun Lezhë dhe 1 në qarkun Fier.

Po dje, sipas policisë në Shkodër, gjatë kontrolleve për respektimin e vetëkarantinimit është konstatuar një shqiptar nga Kosova me inicialet E. D. i kthyer nga Kosova më datë 17.03.2020, i cili kishte dalë nga banesa dhe është ndëshkuar me masë administrative 700.000 lekë.

Policia e shtetit deklaron se vijojnë kontrollet dhe monitorimet pa ndërprerë, me qëllim zbatimin e masave në funksion të parandalimit të COVID-19.

Në të gjithë vendin, gjatë 24 orëve të fundit janë evidentuar 78 drejtues mjetesh që kanë shkelur urdhrin e ndalim qarkullimit, të cilët janë ndëshkuar me heqje të lejes së drejtimit sikur e parashikon Akti Normativ për 3 vite, si dhe janë  bllokuar. Po gjatë 24 orëve të fundit, sipas policisë janë arrestuar në flagrancë 4 drejtues mjetesh, për drejtim mjeti në gjendje të dehur dhe në kundërshtim me urdhrin për ndalim qarkullimi, konkretisht: 1 në Dibër, 1 në Tiranë, 1 në Shkodër dhe 1 në Korçë.

Në Tiranë, pas orës 10:00 ka qenë qetësi. Qytetarët që kanë dalë nga shtëpia pas kësaj orë numërohen me gishtat e dorës, dhe ato janë gjobitur me 10 mijë lekë për shkelje të rregullave. Në pamjet e sjella me dron duket qartë se frika ndaj ndëshkimeve, ka frikësuar qytetarët e Tiranës që janë mbyllur në shtëpi.

Brenda katër orëve janë gjobitur 165 kalimtarë të pabindur që nuk kanë respektuar urdhrin që ndalon qarkullimin pas orës 10:00.

"Respektimi i masave kufizuese, në të mirë të vetes dhe të njerëzve përreth. Në zbatim të masave kufizuese për parandalimin e përhapjes së COVID-19, në të gjithë territorin e vendit, shërbimet e Policisë së Shtetit kanë ushtruar dhe vijojnë të ushtrojnë kontrolle për zbatimin e një prej masave kufizuese, asaj të kufizimit të daljes vetëm në fashat orare 06:00 – 10:00 dhe 16:00 –18:00, për të gjithë qytetarët.

Në të gjithë vendin, prej orës 10:00 deri në këto momente janë ndëshkuar me masë administrative me vlerën 10.000 lekë secila, 165 shtetas, të cilët nuk kanë respektuar oraret kufizuese. Policia e Shtetit apelon për të gjithë qytetarët që secili të kontribuojë për të parandaluar përhapjen e COVID-19, duke respektuar me rigorozitet masat kufizuese të ndërmarra për këtë qëllim", njofton Policia e Shtetit.

Në Fushë- Krujë dhe Kukës nuk janë ndalur xhiro, madje edhe krah njëri-tjetrit, duke shkelur njëherazi dy urdhra, atë të ndalim qarkullimit pas orës 10:00 dhe në grupe.

Korçarët kanë qenë dhe vijojnë të mbetet qyteti shembull, të cilët janë ndërgjegjësuar dhe kanë respektuar të gjitha rregullat e vendosura nga qeveria për parandalimin e përhapjes së koronavirusit. Në rrugë, pas orës 10:00 ishin shumë pak qytetarë, numëroheshin me gishtat e dorës, por siç raporton gazetarja Gladiola Hoxha, ato nxitonin për të shkruar në shtëpitë e tyre. E njëjta panoramë është raportuar edhe në Lushnje dhe Laçit, ku rrugët kanë qenë të boshatisura.

Dita e sotme ka qenë me e qetë se dje, megjithatë nuk kanë munguar qytetarët e pabindur të cilët kanë shkelur urdhrin për të mos dalë në rrugë pas orës 10:00 të mëngjesit dhe 18:00 të pasditës.

Më konkretisht në qytetin e Fierit janë shoqëruar 6 shoqëruar në Komisariat, e ndërsa 10 të tjerë janë gjobitur me 10 mijë lekë gjobë pasi vijonin të qëndronin në jashtë edhe pas orës 10:00.

Në Vlorë, 6 këmbësorë janë gjobitur, ndërsa u janë bllokuar automjetet e 17 shoferëve, pasi lëviznin në qytet pa një autorizim. 3 të tjerë janë proceduar penalisht pasi kanë drejtuar makinën pa patentë.

Të pabindur ka pasur edhe në qytetin e Elbasanit, më konkretisht 8 këmbësorë.

Përjashtim nuk bën as Gjirokastra, ndonëse sot ka pasur shumë pak lëvizje se ditët e tjera. Në qytetin e gurtë brenda dy orësh janë hequr 3 patenta si dhe u janë sekuestruar dy qytetarëve biçikletat që lëviznin në rrugë pas afatit të caktuar.

Me urdhrin e bërë publik ditën e djeshme nga kryeministrit Edi Rama, kush lëviz në rrugë jashtë afatit të përcaktuar, do të gjobitet me 10 mijë lekë dhe përjashtim nga paketa financiare.

Një qytetar ka thyer rregullat duke qëndruar pas orës 10:00 jashtë shtëpisë, ndonëse kjo gjë tashmë është e ndaluar. Ai ka hapur muzikë me zë të lartë dhe ka nisur të kërcejë i vetëm muzikë latine. Ai është pikasur nga një polic i policisë Bashkiake, i cili i ka shkuar aty pranë, nga pas dhe i ka kërkuar që të shkojë në shtëpi. Qytetari është treguar shumë i bindur dhe ka mbledhur magnetofonin dhe rrobat dhe është larguar.

Berati është bindur urdhrit të firmosur ditën e djeshme, për të mos dalë nga shtëpia pas orës 10:00. Siç shihet në këto pamje në qytet nuk ka asnjë njeri jashtë.

Në Vlorë, është dashur ndërhyrja e policisë për të shpërndarë njerëzit të cilët po thyejnë njëkohësisht dy urdhra, qëndrimin në grupe dhe pas orës 10:00. Të "pabindur" janë treguar sërish të moshuarit, që kanë vijuar të qëndrojnë në lulishte. Ato janë këshilluar që të shkojnë në shtëpi, në të kundërtën do të ndëshkohen.E njëjta panoramë është përsëritur edhe në Shkodër, qytet ky që nuk është ndërgjegjësuar aspak dhe ka shkelur çdo masë të vendosur nga qeveria, duke u bërë rrezik për përhapjen e koronavirusit. 

Në Durrës, qytetarët kanë respektuar rregullin e vendosur dje! Pas orës 10:00 nuk ka lëvizje të njerëzve apo xhiro në bregdet, siç u raportua një ditë më parë.

Ora 10:00 ishte afati i fundit ku qytetarët mund të lëviznin në këmbë, që përkon edhe me oraret kur duhet të shkojnë në punë. Frika nga gjoba apo ndëshkimet e parashikuara me aktin normativ për koronavirusin, ka mbyllur qytetarët e Tiranës në shtëpi. Në Bulevardin e Ri, i cili ka qenë zona më problematike përgjatë këtyre ditëve, nuk ka pasur asnjë lëvizje.