Gjyqi ndaj Leonard Dukës nis me tensione e përplasje në GJKKO! Nëna e Santiago Malkos: O maskara, ma vrave djalin 25 vjeç! Si del ti aty, dënojeni me vdekje!

Tirane- Gjykata e Posaçme nisi sot mes tensioneve dhe përplasjeve seancën për të pandehurin Leonard Duka, i akuzuar si kreu i grupit të quajtur “Klani Duka” dhe organizatori i vrasjes së ish-policit Santiago Malko, në muajin Gusht të vitit 2019 në zonën e "Porcelanit", në Tiranë.

Për Leonard Dukën seanca e sotme ishte e para në procesin gjyqësor ndaj ish policit Santiago Malko, dy muaj pasi u ekstradua nga Belgjika në Shqipëri. Përballja e parë e të pandehurit me nënën e viktimës, Bukuri Malko krijoi tensione dhe përplasje të forta në sallë, ku u desh ndërhyrja e forcave të sigurisë të mbanin situatën nën kontroll.  Mamaja e të ndjerit ka shpërthyer në ulërima dhe fyerje ndaj të pandehurit, duke ndërhyrë disa herë gjatë procesit, madje edhe pasi seanca përfundoi, duke i shkuar Dukës te kafazi

“O maskara, ma vrave djalin 25 vjeç, o qen! Si del ti aty...?!”, ishin akuzat e saj drejtuar Dukës.

LEXO EDHE:
Simon Hadaj: Çfarë di Dumani që e tmerron Sali Berishën?

Mes ulërimave ajo iu drejtua togave të zeza dhe kërkoi dënim me vdekje për të pandehurin. që akuzohet se i vrau djalin. 

U desh ndërhyrja e punonjësve te sigurisë dhe e disa punonjësve të gjykatës, të mbanin në kontroll nënën e Malkos, e cila dëshpërimisht kërkonte drejtësi për djalin e saj.

Kryesuesja e seancës Rudina Palloj e pyeti Leonard Dukën nëse donte të jepte dëshminë e tij në lidhje me vrasjen për të cilën akuzohej, duke qenë se ishte hera e parë që paraqitet në këtë seancë dhe ai kërkoi kohë të njihej me aktet, kërkesë e cila u pranua nga gjykata.

Deklarimet e mia do i jap pasi të njihem me aktet. Deklarimet do i jap një herë tjetër. Dua më shumë kohë” tha ai.

Kurse prokurori i dosjes së SPAK, Behar Dibra, u shpreh:

“E konsideroj si kërkesë të padrejtë. Ne ramë dakord seancën e kaluar që ai të fliste sot”.

Këtu ndërhyri përsëri mamaja e Santiagos

“Nuk ka çfarë lexon fare. Burgim me vdekje!”

Gjyqtarja Rudina Palloj i tërhoqi vëmendjen:

“Kërcënimet janë të ndaluara në sallë të gjyqit!”

Avokatja e Dukës shprehu dakordësi me klientin e saj. 

'Sot nuk jemi gati, por seancën e radhës vijojmë prapsimet dhe kur klienti të jetë gati të përgjigjet”.

Nga ana e saj Gjyqtara u shpreh se meqenëse i pandehuri shfaqi pëlqim për t’u pyetur, por kërkoi kohë, vlerëson se nuk mund ta detyrojë atë të pyetet

“Është çështje vullneti. Në këto kushte do i jepet kohë”, tha gjyqtarja e çështjes.

Nga kafazi i qelqtë ai pati edhe një mesazh për prokurorin e çështjes, Behar Dibra,  i cili sipas tij po e dënonte pa prova.

“Prokurori është i njëanshëm, më akuzon si organizator i vrasjes së Santiago Malkos. Dhe kam vënë re që do të më dënojë… Prokurori mos të korruptohet nga kriminelet e vendit por të bëjë detyrën. Po kërkon të më dënojë pa fakt, pa asgjë”  tha Duka.

Teksa seanca u shty për më 24 Tetor, në orën 12:30, që i arrestuari të japë shpjegimet e tij në lidhje me ngjarjen. ndodhi edhe incidenti i radhës.

Në fund të seancës, mamaja e Santiago Malko u ngrit nga vendi dhe iu drejtua kafazit ku ishte Leonard Duka. Në këto momente ndërhyri dhe siguria e togës së shoqërimit, duke e ndaluar. E pranishme në sallë ishte edhe motra e të ndjerit, e cila u konfrontua me dy avokatet e Leonard Dukës, pas përfundimit të seancës së sotme.

Leonard Duka akuzohet si organizator i vrasjes së Santiago Malkos i njohur si krahu i djathtë i Ervis Martinajt në muajin gusht të vitit 2019 në Tiranë. Dyshohet se ngjarja ka ardhur pas konfliketeve që Duka kishte me Martinajn. Duka u ekstradua në 2 Gusht të këtij viti nga Belgjika në Shqipëri. Anëtarët e tjerë të grupit janë gjykuar dhe hetuar në mungesë, teksa ai pritet të përballet me akuzat e ngritura nga SPAK, në këtë dosje.

Raportoi: Gazetarja Keti Banushi

A.Q/S.G/Shqiptarja.com

TAG:
• leonard duka
• spak
• KLANI DUKA
• santiago malko
• GJKKO
• Behar Dibra
• rudina palloj