'Të rrethojmë parlamentin e mos lejojmë deputetët!' Kërcënimet nga sheshi para Kryeministrisë, thirrje protestuesve: Merrni vezë e miell me vete

Gazetari i televizionit të familjes së Sali Berishës, Visuar Dalipi, që njihet edhe si ‘Banka e Fundit’, nga faqja që ai menaxhon në rrjetet sociale në një prononcim për mediat para se të niste protesta e 32-të bëri thirrje për bllokim të rrugëve kyçe në kryeqytet.

Pas kësaj deklarate Taulant Balla përmes një postimi në rrjete sociale shprehet se këto janë mbeturina politike dhe sociale që morën peng protestën dhe përzunë qytetarinë e bukur të bulevardit.

 “Pak më parë po ju flisja për mbeturina politike dhe sociale që morën peng protestën, imponuan dhunën dhe përzunë qytetarinë e bukur të bulevardit.

A mund t’ia lejojë vetes qytetaria t’i bindet këtij më poshtë?

Kurrë!

Edhe pak ditë”, shkruan Balla në rrjetet sociale.

Pas përfundimit të fjalimeve para Kryeministrisë protestuesit kanë nisur marshimin në rrugët e Tiranës.

Me thirrjet ‘Rama n’burg, Berisha n’burg’, si dhe me flamuj e simbole kombëtare, protestuesit kërkojnë largimin e të gjithë klasës politike aktuale.

Një mësues historie tha gjatë fjalës së tij para Kryeministrisë se këto janë ditët ku po shkruhet historia sipas tij.

“Këto janë ditët kur po shkruhet historia. Unë kam një ëndërr, dua që pas 10 ose 20 vjetëve t’u shpjegoj nxënësve të mi se Shqipëria po bëhet se ne rrëzuam një klasë politike të kalbur, dua t’ju tregoj se penisonet e gjyshërve të tyre kanë pensione si të gjithë moshatarët e tyre në Europë. Dua t'u them se drejtësia është e shpejtë dhe i jepet atij që e meriton. Dua të t'u them se Shqipëria nuk ka frikë të ngrihet sa herë u shkelet e drejta e tyre”, tha Marjan Zhuli.

Andi Tepelana, një prej organizatorëve të protestave që po zhvillohen prej 32 ditësh në Tiranë, u kërkoi qytetërëve që t'i bashkohen protestës së para Kuvendit.

"Nesër me vezë me vete, me miell me vete, do jemi aty për t'i treguar këtij parlamenti të krimit, për t'i thënë që nuk na përfaqësojnë",- tha Tepelena

Një prej protagonistëve të protestave që po zhvillohen në Tiranë bëri thirrje për një tjetër tubim para Kuvendit, për të penguar hyrjen e deputetëve.

Protestuesi lajmëroi se është planifikuar që pas asaj të djeshmes, një tjetër protestë të mbahet nesër në orën 10:00 para Parlamentit, dhe i kërkoi Policisë së Shtetit të mos cenojnë qytetarët.

"Njoftim për nesër, në orën 10:00, është se do të ndalojmë deputetët që të hyjnë në parlamentin tonë. Siç e kemi parë të gjithë, dje forcat e policisë kanë ushtruar një dhunë të neveritshme ndaj protestuesve paqësorë që ka parë Europa këto 10 vitet e fundit, prandaj të gjithë bashkë te Kuvendi nesër në orën 10.

Thirrje punonjësve dhe drejtuesve të Policisë së Shtetit të kenë shumë kujdes se kë prekin me dorë, se qytetarët shqiptarë kanë në dorë jo vetëm t'i pushojnë nga puna, por edhe t'i çojnë në burg. Parlamenti është i yni dhe jo i atyre",- tha protestuesi.

Pedagogu Lush Susaj u bëri thirrje qytetarëve që t'i bashkohen masivisht protestës, duke e cilësuar atë si një betejë për të ardhmen e vendit. Në fjalën e tij, ai u shpreh se është rritur në "sheshet e lirisë" dhe se do të vazhdojë të protestojë kundër asaj që e konsideron keqqeverisje.

"Është e ardhmja juaj, ndaj ngrihuni dhe ta fshijmë nga faqja e dheut këtë sistem. Jam një njeri që kam lindur në sheshet e lirisë në përballje me diktaturat dhe do të vdes po në sheshet e lirisë. Ambasadat e BE-së dhe SHBA-së, na ndihmoni të heqim qafe këtë qeveri që po kriminalizon dhe dëbon shoqërinë. Shkatërrimi i sistemit shëndetësor dhe arsimor nuk sjell asgjë të mirë, por mbjell vetëm krim dhe probleme edhe për BE-në dhe SHBA-në. Ju që protestoni meritoni titullin qytetar, ndërsa ata që fshihen ndoshta do të bëjnë pasuri, por mbeten mjeranë",- tha pedagogu.

Ish-drejtuesi i lartë i Policisë së Shtetit, Mit’hat Havari, para Kryeministria e cilësoi si të pajustifikueshme dhunën e ushtruar, sipas tij, nga policia gjatë protestës së djeshme para Kuvendit.

“Dhuna e policisë ishte joproporcionale, një dhunë e pajustifikueshme. Ne kemi parë rastin e George Bush-it, kur dikush e goditi me këpucë dhe asgjë nuk ndodhi. Këta që janë këtu nuk janë ata që hedhin molotovë.

Momentalisht situata është e tillë sa një rezervuar me ujë: nëse derdhet një pikë, nuk ka më gjë që e ndal. I di vështirësitë e policisë. Është institucioni më i diskriminuar dhe më i keqpërdorur, i trajtuar si skllevër.

Në 36 vite janë vrarë 300 policë, bij nënash, për këta bastardë. Studentët e Akademisë së Policisë janë helmuar dy herë nga tenderët e korrupsionit. Populli thotë se peshku qelbet nga koka. Rama në burg, Berisha në burg! Rroftë demokracia, liria dhe Shqipëria”, tha ai.

Në protestën e radhës para Kryeministrisë, protestuesit sollën një “bust” simbolik me pankartë të kryeministrit Edi Rama, duke e krahasuar me ish-diktatorin Enver Hoxha.

“Do të përgatitemi për të rrëzuar, o dorëzohu o rrëzohu”, tha protestuesi.

Edhe në protetsën e 32-të që po zvillohet në Tiranë, protestuesit kërkuan zbatimin e 5 kërjesave drejtuar qeverisë dhe kryeministrit Edi Rama, ndaj të cilit kërkohet dorëheqja e parevokueshme.

“Krahas aksionit të ditës së sotme, ne vazhdojmë të qëndrojmë të palëkundur në pesë kërkesat, të cilat janë artikuluar përgjatë 32 ditëve të kësaj proteste historike, ku kërkesa e parë, kryesore dhe e panegociueshme është dorëheqja e menjëhershme e kryeministrit Rama dhe e qeverisë së tij. Këto kërkesa nuk janë formuluar në broshura apo statute, por janë artikuluar dhe formuluar në këtë shesh nga të gjithë ne”, tha një qytetar.

Në ditën e 32-të të protestës, një nga protestuesit kërkoi sërish dorëheqjen e Ramës dhe Berishës nga ana tjetër.

“Nga ky shesh mund të them se jeni motor i lëvizjes së fundit. Bëtë atë që opozita nuk e bëri opër 36-vjet. Kush e beson që armiku i këtij që kemi pas është administrate. Armiku i gjithë Shqipërisë quhet Edi Rama bashkë me të gjithë ata politikanët e tjerë. Këtu (në shesh) ka plot të rinj me doktoratura. Edhe një mesazh për patronazhistëtt, jo me vezë por me vezë të prishura do t’i godasim.  Me Erjonin nuk ia vlen të merresh, kone. Ku i ke 13 milionë eurot e fermerëve, pse nuk i çon në SPAK? Imagjino kur vidhni lekët e Europës çfare bëni me tonat.

Taulant Ballës i them se do ikësh me turp, do ikësh zvarrë. Këta të PD janë ku thërret qameti, Berisha ik se shkova 40 vjeç dhe po merrem me ty. Largohuni të gjithë”! Këtu do të flasim me gjuhën e përditshme jo me gjuhën e intelektualëve”, tha Erlind Xhindi.