Festë dhe protestë, Kosova 18 vite shtet i pavarur! Mijëra shqiptarë kërkojnë drejtësi për liderët e UÇK-së: Jo politikë! U bashkohet edhe Osmani

Kreu i "Shqipëria Bëhet", Adriatil Lapaj ishte në protestën e oeganizuar në Prishtinë, për lirimin e ish-krerëve të UÇK-së, të cilët ndodhen të burgosur në Hagë.

Për Report Tv, Lapaj u shpreh se ish-krerët e UÇK-së duhet të lirohen nga akuzat, pasi lufta çlirimtare e popullit të Kosovës nuk mund të njollosej.

Sipas tij, nëse ata dënohen, do ishte atentat për çdo popull që lufton me shtypësit.

“Është një madhështi e kësaj pjese të kombit tonë. Edhe ne jemi bashkuar. Më bëhet zemra mal që shikoj që vëllezërit dhe motrat tona në Kosovë po ndërtojnë një shtet model dhe po ecin drejt këtyre niveleve. E jashtëzakonshme. Është një proces i cili duhet të finalizohet me patjetër me çlirimin nga çdo akuzë të çlirimtarëve, sepse nuk mundet të njolloset lufta çlirimtare e popullit të Kosovës. Është luftë kundër okupatorit, për të mbrojtur nënat, motrat, dientiteti. Është bërë nga këta heronj dhe duhet të kthehen fitimtarë dhe jam i bindur që do të kthehen të tillë. Do ishte atentat shumë i madh për çdo popull në botë që la luftuar apo lufton me shtypësit, padrejtësi e madhe për mijëra dëshmorët e këtij populli, ndaj dhjetëra fëmijëve të vuajtur dhe grave të përdhënuara nga okupatori.”, tha ai.

Report Tv ka pyetur disa qytetarë të cilët ishin në protestën e organizuar në sheshin "Skënderbeu" në Prishtinë, për lirimin e ish-krerëve të UÇK-së, të cilët ndodhen në Hagë.

Ata u shprehën se Pavarësia e Kosovës nuk është e plotë pa ta dhe se mbahen padrejtësisht në burg.

“Liri çlirimtarëve. Padrejtësisht mbahen në burgje. Liri çlirimtarëve, është historia e popullit tonë.

“Unë jetoj në Gjermani, dhe çdo protestë jam përkrahëse e krerëve të UÇK, luftuam për lirinë tonë që sot po e gëzojmë, nuk është e plotë pa ta. Nëse nuk lirohen ata, ne nuk jemi të lirë. Pa ta nuk ka liri. Ata e sollën lirinë përkrah me Europën dhe Amerikën. Nëse ata dënohen, duhen dënuar edhe ata që ndihmuan për këtë liri. Ata duhet të ishin serbët që bënë masakra dhe jo ata që luftuan për vendin e tyre.", thanë disa qytetarë.

Të tjerë qytetarë deklaruan se ish-krerët e UÇK-së janë të pastër si loti dhe vetë UÇK-ja është historia e Kosovës.

“Ja uroj festën e Pavarësisë gjithë shqiptarëve, për këtë ditë u derdh shumë gjak. Ne jemi të pastër si loti, katërshja që është në Hagë, janë të pastër si loti. Shpresoj të lirohen. Nëse ata dënohen, vetëm drejtësi nuk është.

Drejtësi, jo politikë. E padrejtë, ata kanë luftuar për ne. Duhet të jemi të fortë dhe të vazhdojmë kështu. Jemi të gjithë në një mendim, UÇK është historia e Republikës së Kosovës.", thanë ata.

Ish-luftëtarja e UÇK-së, Shqipe Krasniqi, ka thënë se si sot, kurrë më të bashkuar e më të zëshme nuk e ka parë Kosovën. Shqipe Krasniqi tha se në ditën e Pavarësisë nuk janë mbledhur vetëm për të festuar, por për të kujtuar sakrificën e popullit.

“Kam parë familje të poshtëruara, nëna që qanin fshehurazi, studentë të përndjekur vetëm pse ishin shqiptarë. Kam parë baballarë të përulur dhe nëna që qanin fshehurazi që fëmijët të mos ua shihnin lotin Kam parë gra që i përcillnin bijtë në luftë me zemra të copëtuara por me kokën lartë. Ato nuk dolën në histori me tituj, por historia nuk do të ekzistonte pa to. Heshtja është dorëzim dhe ky popull nuk di të dorëzohet. Si shumë vajza dhe gra shqiptare e mora armën dhe dola në front. Jo pse e doja luftën por sepse e doja lirinë. Shtëpitë na u dogjën e fshatrat na u zbrazën. Një gjë nuk u dogj e as nuk u shua, dhe ai është shpirti i këtij populli”, ka thënë ajo.

Këngëtari i njohur Ilir Shaqiri është ngjitur në skenën e protestës në Prishtinë bashkë me djalin, Korabin, dhe nipin. Tre breza në skenë si një simbolikë për të shkuarën, të tashmen dhe të ardhmen, të cilët kanë emocionuar me një këngë patriotike.

E mbijetuara e dhunës seksuale, Vasfije Krasniqi Goodman, është ngjitur në podiumin e protestës në Prishtinë me shumë emocione. Ajo tha se kjo ishte pjesëmarrja e saj e parë në paradën e ushtrisë dhe “një ndjenjë e jashtëzakonshme që vetë bijat e Adem Jasharit sot mbrojnë Kosovën”.

E përlotur, ajo tha se liria erdhi nga gjaku dhe si e mbijetuar nga dhuna seksuale, ajo do që zëri i saj dhe i viktimave të dëgjohet, teksa bëri thirrje për lirimin e ish-krerëve të UÇK-së.

“Sot kjo ditë e shenjtë për popullin tonë, 18-vjetori i Pavarësisë, është një ditë krenarie për të gjithë ne dhe një përkujtim për të gjithë ata që u flijuan për lirinë tonë. Ajo nuk erdhi vetvetiu, ajo u flijua në gjak, sakrificë që qëndron në shekuj. Kam nderin që të flas si e dërguar speciale nga presidentja Vjosa Osmani si e mbijetuar seksuale që zëri i viktimave po dëgjohet anembanë botës. Ne flasim për drejtësi dhe krimet që kreu Serbia në Kosovë. Ne jemi të gjithë këtu për t’i liruar nga Haga sepse popullin shqiptar e bashkon cenimi i lirisë dhe padrejtësia. Faleminderit që i shërbyet atdheut kur kishte nevojë më së shumti! Kadri Veseli, Hashim Thaçi, Rexhep Selimi... Ata duhet të lirohen! Ata mbrojtën popullin e vet!”, tha Krasniqi.

Familjarët e liderëve të UÇK-së, Hashim Thaçit, Kadri Veselit, Jakup Krasniqit dhe Rexhep Selimit, të bashkuar po e ndjekin nga Haga protestën që po mbahet në Prishtinë.

Reperi i njohur, Lyrical Son (Festim Arifi) dhe një nga pjesëtarët e platformës “Liria ka Emër”,është ngjitur në skenë për të çelur protestën ‘Drejtësi, jo politikë’, me një këngë patriotike.

Ai performoi këngën “Ushtria Çlirimtare” duke ngjallur emocione tek të gjithë pjesëmarrësit.

“Kur liria cenohet, ne duhet ta kthejmë me zor. Liri!”, thirri ai pasi përfundoi.

Mijëra qytetarë janë mbledhur në sheshin “Skënderbeu” në Prishtinë në marshin “Drejtësi, jo politikë”, në mbështetje të ish-krerëve të Ushtrisë Çlirimtare të Kosovës (UÇK) që po gjykohen në Hagë.  Mijëra shqiptarë nuk i ndali as moti i keq dhe dëbora që ka përfshirë Prishtinën.

Përparim Rama  dhe Endrit Thaçi

Në marshimin e paqes në ditën e pavarësisë së Kosovës që zhvillohet në mbështetje të 4 ish-krerëve të UÇK-së që po gjykohen në Hagë, pjesëmarrës dhe djali i ish-presidentit Hashim Thaçit, Endrit Thaçi, ashtu si dhe djemtë e Kadri Veselit. Në marshim janë pjesë dhe figura të fushave të tjera përveç politikës, si Yll Limani, Festim Arifi, Albina Kelmendi e të tjerë.

Presidentja Vjosa Osmani i është bashkuar protestës që po mbahet në Prishtinë për liderët e UÇK-së. Osmani shihet pranë kreut të Grupit të PS, Taulant Balla dhe kreut të BDI-së, Ali Ahmetit.

Taulant Balla u bëri thirrje sot të gjithë shqiptarëve që t’i bashkohen marshimit në mbështetje të ish komandantëve të Ushtrisë Çlirimtare të Kosovës nën moton ‘Drejtësi, jo politikë’.

Në postimin e tij të fundit në Facebook, kreu i grupit parlamamentar të Partisë Socialiste u shfaq në krah të Endrit Thaçit, djalit të Hashim Thaçit dhe këngëtarit Ylli Limani.

“Të gjithë shqiptarët, në Kosovë, në diasporë, në Shqipëri, Maqedoni të Veriut, Mal të Zi, Çamëri, ejani në Prishtinë” tha Balla

Marshimi i sotëm organizohet nga platforma “Liria ka Emër”. Tubimi do të mbahet në sheshin “Skënderbeu”.

Organizatorët parashikojnë një pjesëmarrje prej 200 mijë qytetarësh nga të gjitha trevat. Sipas tyre marshimi synon të kundërshtojë procesin gjyqësor ndaj ish-drejtuesve të UÇK-së dhe të kërkojë trajtim të paanshëm në drejtësi.

Programi përfshin pjesë muzikore dhe aktivitete të ndryshme.  Autoritetet kanë angazhuar forca policore, zjarrfikës dhe ekipe emergjente për të garantuar rendin dhe sigurinë. Organizatorët kanë siguruar transport me autobusë nga të gjitha komunat për të mundësuar pjesëmarrjen në kryeqytet.