TIRANË- Ndërtuesi Ilir Shtufi, i arrestuar me urdhër të SPAK pas goditjes së dy grupeve kriminale, rezulton të ketë udhëtuar drejt Greqisë të njëjtën ditë që agjentët e BKH-së po ekzekutonin urdhër arrestet. Sipas policisë greke, biznesmeni i lidhur me Shkëlzen Berishën është futur në territorin e Greqisë përmes një pike kalimi kufitar, orët e para të 12 qershorit ndërsa SPAK kishte nisur me kërkimet për të arrestuar personat për të cilët ishte lëshuar urdhërarrest, si edhe për të sekuestruar pasuritë e anëtareve të dy grupeve kriminale. Nuk dihet nëse Shtufi ka pasur dijeni që ndaj tij ishte lëshuar urdhër arrest dhe tentoi të arratisej, apo ishte në udhëtim.

Policia greke thotë se menjëherë pasi ka marrë sinjalizim për Shtufin se është në kërkim, kanë organizuar operacionin për kapjen e tij ndërsa ndodhej në një hotel në qytetin e Selanikut. Pritet të nisin procedurat e ekstradimit. 

Shtufi u arrestua si anëtar i një prej dy grupeve kriminale që u çmontuan nga Prokuroria e Posaçme, i atij të Luçiano Koçekut. Ai akuzohet nga SPAK se pastronte paratë e grupit kriminal që përfitoheshin nga trafiku i drogës.

Shtufi, njihet edhe si lidhje e afërt e Shkëlzen Berishës, djalit të ish-kryeministrit Sali Berisha. Ai është ndërtues i disa kullave në Tiranë, mes tyre gradaçelës që do të quhet “Mali i Tiranës”, e cila pritet të jetë 65 kate, 58 kate lart e 7 kate nën tokë e 185 m e lartë. 

Njoftimi i Policisë greke:

Arrestimi i një të huaji në Selanik, i kërkuar ndërkombëtarisht për pjesëmarrje në një organizatë kriminale dhe pastrim parash

Një i huaj u arrestua dje, më 12 qershor 2026, në Selanik, ndaj të cilit po zhvilloheshin kërkime ndërkombëtare në një vend fqinj për pjesëmarrje në një organizatë kriminale dhe pastrim parash.

Arrestimi u krye nga oficerët e policisë së Nën-Drejtorinë për Luftimin e Krimit të Organizuar të Greqisë Veriore, pas përdorimit të informacionit të marrë nëpërmjet Shoqatës së Policisë Greke dhe aktivizimit të kanaleve të bashkëpunimit ndërkombëtar policor të Drejtorisë së Bashkëpunimit Ndërkombëtar Policor të Shtabit të Policisë Helene (INTERPOL).

Hetimi zbuloi se personi i lartpërmendur kishte hyrë në vendin tonë në orët e para të së njëjtës ditë nga një stacion kufitar në Greqinë Veriore. Shërbimet policore kompetente u mobilizuan menjëherë, në kuadër të të cilave ai u lokalizua në një hotel në Selanik dhe u shoqërua për ekzaminim të mëtejshëm.

Në të njëjtën kohë, nëpërmjet procedurave të përcaktuara të bashkëpunimit policor ndërkombëtar, u konfirmua se ndaj tij ishte në pritje një Njoftim i Kuq Ndërkombëtar për Kërkim nga Autoritetet e vendit të tij me qëllim arrestimin dhe ekstradimin e tij për vepra penale që lidhen me pjesëmarrjen në një organizatë të strukturuar kriminale dhe pastrim parash, që rrjedhin, ndër të tjera, nga rastet e trafikimit të drogës.

Pas informacionit nga Prokurori kompetent i Apelit të Selanikut, ndaj tij u lëshua një urdhër arresti i përkohshëm dhe ai u arrestua, me qëllim ndjekjen e procedurave të përcaktuara.

Operacioni policor u krye nga oficerë policie të Departamentit për Luftimin e Dhunës së Organizuar në Sport, me ndihmën e Departamentit për Ndjekjen Penale të Krimeve Kundër Jetës dhe Pronës dhe Departamentit të Informacionit dhe Veprimeve Speciale të Nëndrejtorisë për Luftimin e Krimit të Organizuar të Greqisë Veriore.

Personi i arrestuar do të dërgohet para organit kompetent të ndjekjes penale.