Ministrja Denaj shuan çdo dyshim: Nuk ka rritje pagash në 2020!

TIRANE - Për vitin e ardhshëm nuk pritet të ketë rritje pagash në asnjë sektor. Ministrja e Financave Anila Denaj ka pranuar sot për mediat se në buxhetin e ardhshëm nuk është parashikuar fond për paga shtesë, por buxheti mbështet reformat e qeverisë.

 “Ky do të jetë një buxhet që mbështet të gjitha reformat e qeverisë shqiptare, që janë ato në arsim, shëndetësi dhe bujqësi. Konteksti i pagave këtë vit është adresuar, ne kaluam në mars një vendim qeverie, i cili filloi efektivitetin e tij në prill; kuptohet që kjo shtrihet edhe për vitet e tjera, sepse ajo vijon. Për vitin në vijim, konteksti i rritjes së pagave nuk është parashikuar, por kjo nuk do të thotë që, në varësi të treguesve makroekonomikë, të mos realizohet” deklaroi ministrja e Financave dhe Ekonomisë.

Po ashtu, Denaj ka shpjeguar edhe arsyen se përse në 2020-ën  është menduar të ketë reduktim të investimeve publike.

 “Investimet do të jenë në ulje sepse vijmë nga një bazë më e ulët e këtij viti në raport me përfundimin e vitit. Kemi të bëjmë sigurisht ende me një parashikim konservativ dhe deri në fund të vitit unë do të rezervoja më shumë optimizëm edhe për realizimin e të ardhurave, që është prezantuar në draftin e parë” u shpreh Denaj.

Këto deklarata ministrja e Financave i bëri pas përfundimit të takimit të Forumit Global për Pensionet Private që u zhvillua për herë të parë në Shqipëri. Në fokus të Forumit ishte zhvillimi sa më i madh i tregut të pensioneve private, duke e konsideruar këtë një zgjidhje alternative për rritjen e të ardhurave të pensionistëve.

/r.k./Shqiptarja.com

TAG:
• pagat
• Ministria e Financave
• anila denaj