Në studion e emisionit ‘Repolitix’ me gazetarin Denis Minga në Report Tv është diskutuar mbrëmjen e sotme për operacionin e Policisë të realizuar disa javë më parë, që çoi në pranga Ergys Agasin, të akuzuar për dosjen e AKSHI-t dhe ish-punonjësin e Policisë, Uljan Shpataraku.

Ish-prokurori Ervin Karanxha tha gjatë fjalës së tij se gjatë arrestimit të Agasit u gjetën prova të rëndësishme, që shërbyen edhe për vendosjen e masës së sigurisë ‘arrest shtëpie’ ndaj ish-kreut të SHISH, Vlora Hysenit.

Ai tha gjithashtu se Agasi, duke qenë i shpallur në kërkim, ka gabuar që bënte lëvizje të pakontrolluara dhe sipas Karanxhës, këto gabime çuan në prangosjen e tij.

Referuar deklarimeve të Shpatarakut në Polici, i cili ka pretenduar se nuk e njihte Agasin, por e kishte marrë rastësisht në rrugë, Karanxha tha se ish-polici ka bërë një gabim taktik, pasi s’duhet të fliste pa u njohur me provat.

“Mendoj se nuk ka patur dekonspirim. Zoti Agasi ka bërë gabim, sepse si çdo person në kërkim, nuk mund të lëvizësh lirshëm. Duhet të jesh më i kufizuar. Gjatë kapjes ka pasur edhe prova të rëndësishme në lidhje me ngjarjen. Një pjesë e provave të kapura kanë shërbyer si prova për masën e sigurisë ndaj Hysenit. Shpataraku ka bërë një gabim taktik. Pa u njohur me prova s’mund të flasësh, jo takova Bertin etj. Shpataraku bën pretendimin e tij. Ka folur pa u njohur me dosjen. Mirë është të njihesh me dosjen. Ai ka folur pa qenë i sigurt. Do të verifikohen fashikujt”, tha mes të tjerash Karanxha.

Nga ana tjetër, avokati Edmond Petraj tha gjatë fjalës së tij se operacioni për Arrestimin e Agasit dhe Shpatarakut i ngjante më shumë me një triller, që nuk kishte lidhje me realitetin.

Petraj tha se i dukej e pabesueshme që një i kërkuar si Agasi të bënte gjithë ato lëvizje. Gjëja e dytë e pabesueshme sipas tij, është kohëzgjatja e operacionit, pasi sipas tij, Policia mund ta prangoste menjëherë sapo e pikasi, pa i lënë kohë të bënte me orë të tëra lëvizje.

“Mua s’më bind fare ky lloj operacioni. E para që një i kërkuar të bëjë gjithë këto lëvizje… qëllimi i Policisë ka qenë kapja e këtij personi. Pse nuk e kanë kapur gjatë gjithë itinerarit. Aty ka një boshllëk të jashtëzakonshëm. Mua më le pika dyshimi. Më duket më shumë një trill i sajuar bukur, sesa një operacion për të cilin themi që ka bërë atë apo ka bërë këtë. Një avokat me eksperiencë që merret me këtë pjesë, e para njëherë që nuk ngre fare peshë në procesin që ai ka. E dyta, po të bësh analizën sesi është kapur, unë nuk e paralelizoj dot profesionalisht sesi me atë boshllëk prej 4 orë e 41 minutash dhe me një hark kohor me një vëzhgim të tillë të plotë dhe paska zgjatur nga mëngjesi deri në dark, nuk më bind”, tha mes të tjerash Petraj.

Rendit zhvillimet sipas orarit:
Ora 22:48
Operacioni për arrestimin e Agasit/ Meçe: Tregon se Policia jonë nuk qenka e blerë! Avokati: Blutë ruajtën momentin e duhur, edhe Toto Rina është mbajtur për orë të tëra në ndjekje

Avokati Përparim Caca dhe analisti Arben Meçe kanë diskutuar në studion e emisionit ‘Repolitix’ me gazetarin Denis Minga në Report Tv mbi operacionin për arrestimin e Ergys Agasit dhe ish-punonjësit të Policisë, Uljan Shpataraku.

Caca tha gjatë fjalës së tij se Policia ka ruajtur momentin e duhur pas disa orësh ndjekjeje për ta vënë në pranga. Gjatë debateve me të ftuarit e tjerë, ai shtoi se edhe mafiozi italian Toto Rina është mbajtur për orë të tëra në ndjekje para arrestimit dhe kjo sipas tij s’ka asnjë problem.

“Ka një vendim për një masë sigurie që duhej ekzekutuar. Tashmë ai është kapur. Është zbatuar një vendim gjykate. Kur bëhet një operacion i caktuar, ajo që mua më bën përshtypje është se gjithmonë SPAK ka thënë se ka pasur dyshime dhe problem t’i besonte Policisë. Këtu nuk jemi në atë situatë. Është pikërisht policia që e arreston Agasin. Edhe Toto Rina është mbajtur me orë në vëzhgim. Policia ka parë momentin e volitshëm kur duhej arrestuar, që nuk ka pasur nga të shkonte”, tha mes të tjerash Caca.

Nga ana tjetër, analisti Arben Meçe tha se operacioni për arrestimin e Agasit dhe Shpatarakut, i finalizuar nga blutë, tregon se Policia e Shtetit nuk është e blerë.

Megjithatë Meçe shtoi se disa detaje të operacionit mbeten për t’u sqaruar, pasi sipas tij, kanë shumë paqartësi.

“Gjithë skenari që ju na sollët për analizë flet për një raportim të Policisë. Raportimi i Policisë fillon dhe mbaron me një aksion të drejtpërdrejtë të saj. Në gjithë aksionin e Policisë nuk shoh as BKH e as SPAK. Personi është shpallur në kërkim nga GJKKO dhe është nën juridiksionin e BKH-së. Këtu ka një pikëpyetje. Sepse Policia thotë ‘informatori na tha ne dhe ne vepruam’. Ndërkohë nuk ka një sekuencë që në momentin e parë që Policia merr një informacion, menjëherë njofton prokurorin. Aq më tepër që duhet të njoftonte edhe BKH që të ishte prezent. Gjithë raporti nuk flet fare për këtë gjë. Ajo që mua më pëlqen është se paskemi një Polici që nuk qenka e blerë”, tha mes të tjerash Meçe.

 

R.Xh/Shqiptarja.com