PD nis ‘analizën’ për disfatën e 11 majit, por Berisha nuk dorëhiqet: Zgjedhjet ishin farsë, iki vetëm me votë! Protesta edhe jashtë Tirane

Sali Berisha i shpallur non grata nga SHBA, është “frymëzuar” nga mesazhi i Donald Trump për Ditën e Pavarësisë, ku uroi shqiptarët. Berisha thotë se u inkurajua që të shpëtojë shqiptarët nga regjimi i Ramës, duke thënë se Trump kishte nënvizuar në mesazh luftën ndaj organizatave kriminale.

“Lidhjet e Edi Ramës me kartelet e drogës, tashmë janë të padiskutueshme. Ata të cilët presidenti Trump i ka cilësuar si organizata terroriste si Sinaloa e Meksikës, kanë qenë të pranishëm në takime me Edi Ramën, kanë përfituar licenca kazinosh dhe hotelesh. Mendoj se mesazhi i urimit të sekretarit Rubio dhe të presidenti Trump, prek apo trajton problemin më themelor që kemi sot ne si komb apo si vend, drogën, krimin dhe luftën kundër tyre. Kjo përbën një inkurajim në përpjekjen tonë të madhe për të shpëtuar shqiptarët nga ky regjim i bazuar në drogën dhe krimin”, tha Berisha.

Sali Berisha pretendon se anëtarja e PD, Anila Aliaj nuk është përjashtuar nga partia pas sherrit me Flamur Nokën. Ishte vetë ajo që në një postim në rrjetet sociale tha se u përjashtua, por Berisha pretendon të kundërtën duke thënë se PD është një parti e hapur.

“Ajo zonja që foli me Nokën nuk është larguar nga partia, askush nuk mund të largojë asnjë anëtar apo simpatizant se i tha këto Berishës apo Nokës. Kjo nuk ekziston në këtë parti, zonja nuk mund të përjashtohet nga partia. Në rastin ekstrem se ndodhi, ta supozojmë, zonja ka rrugën të hapur për ankesën ndaj padrejtësisë që mund të pretendojë se i është bërë. Ajo zgjodhi mediat, bëri një zgjedhje të saj, por në dijeninë time ajo nuk është përjashtuar, nuk ka asnjë vendim të asnjë forumi. Ne jemi PD e mendimit të lirë”, u shpreh kreu i PD.

Kreu i PD Sali Berisha ka folur në lidhje me takimin e mbajtur nga Ervin Salinji me më të votuarit në procesin e Primareve. Në një komunikim me qytetarët në rrjetet sociale, Berisha u shpreh se askush nuk ka qenë i përjashtuar nga partia, por u justifikua për humbjen duke thënë se Rama i vodhi zgjedhjet.

“Kandidatët e primareve në tërësi i kam takuar ose telefonuar. Salianji ka qenë disa herë në këtë zyrë, Alimehmeti edhe më shpesh. Askush nuk është i përjashtuar, ka patur një problem serioz dhe ky problem ka qenë angazhimi ynë total në mbrojtjen e votës. Në rast se ju rikujtoni deklaratat e mia. Kanë qenë dy: me Ramën zgjedhje nuk ka dhe kjo është përsëritur jo njëherë, por dhjetëra hera. Unë e di se në rast se një kryeministër vendos të mos zhvillojë zgjedhje por farsë, opozita nuk fiton kurrë. I ka të gjithë mjete, siç thotë ODIHR, për të rrëmbyer votën. Rama është i tillë dhe unë këtë e kam denoncuar me dhjetëra herë. Zotimi tjetër ka qenë që do mbroj votën. Pra, do bëj gjithçka për të vërtetuar se ishin zgjedhje apo farsë, votë e lirë apo e rrëmbyer. Zgjedhjet që zhvillohen në kushtet e partisë shtet, nuk janë kurrë të lira veçse farsë elektorale”, tha Berisha.

Kreu i PD, Sali Berisha mori edhe njëherë në mbrojtje GJKKO për vendimin për pezullimin e Belinda Ballukut nga detyra si zv.kryeministre. Berisha akuzoi kryeministrin Edi Rama se po e mbron Ballukun, duke e ankimuar vendimin në Kushtetuese, pasi vetë ai është bashkautor në vjedhje.

“Super skandali Rama Balluku ka marrë përmasa të papara. Për herë të parë në historinë e Europës, një kryeministër, padit Gjykatën që pezulloi nga detyra zv.kryeministren hajdute. Rama u tha shqiptarëve se pezullimi s’ka ndodh ndonjëherë në Europë. Pezullimi nuk është i shpeshtë në Europë, sepse në Europë sapo ngrihet një akuzë, i akuzuari jep dorëheqjen. Në Shqipëri, jo vetëm që nuk jep dorëheqjen, por merr edhe mbështetjen e kryeministrit për të paditur në Kushtetuese. Në gjykatë nuk shkoi Balluku, e pezulluara, por Edi Rama. Për shkak të problemit madhor të vet, se ai është bashkautor në këto vjedhje. Është ai që dërgoi Ballukun në Ankara dhe takoi kompanitë turke që morën 50 mln euro më shumë për Tunelin, se sa kompania që de facto ndërtoi tunelin”, tha Berisha.